Manomba Jahowa Rap Dohot Keluarga

Songon na dipaboa di buku on, godang prinsip ni Bibel na boi mangurupi hita dohot keluarganta. Lomo roha ni Jahowa hita marlas ni roha. Songon naung dijanjihon, molo jumolo do tasomba Ibana, ”tambahononna do sude angka ondeng!” (Mateus 6:33) Lomo do rohaNa hita gabe alealeNa. Sada hasurungan do di hita maraleale tu Jahowa. Patogu ma paralealeon tu Debata ganup tingki.​—Mateus 22:37, 38.

1 PATOGU MA PARALEALEONMU TU JAHOWA

SONGON ON MA HATA NI BIBEL: ”’Jala gabe Ama ma Ahu di hamu, jala hamu gabe anak dohot boru di Ahu,’ ninna Tuhan Sigomgom parluhutan.” (2 Korint 6:18) Lomo roha ni Jahowa hita gabe alealeNa. Marhite tangiang hita boi jonok tu Ibana. Dipangido Jahowa do hita asa ”sai martangiang.” (1 Tessalonik 5:17, Bibel siganup ari) Disarihon do sude na ringkot di hita. (Pilippi 4:6) Molo rap martangiang hamu dohot keluarga, boi ma idaon nasida pos ni rohamu tu Debata.

Asing ni martangiang tu Debata, ringkot do tatangihon Ibana. Tatangihon ma Debata marhite marsiajar sian hataNa, Bibel dohot sian angka buku na marojahan tu Bibel. (Psalmen 1:1, 2) Rimangi ma aha na diparsiajari hamu. (Psalmen 77:12, 13) Na manangihon Debata do hita tongtong molo ro hita tu parpunguan.​—Psalmen 122:1-4.

Patoguhon paralealeonta do muse tu Jahowa molo tataringoti Jahowa tu donganta na asing. Lam jotjot taulahon songon on, lam solhot ma hita tu Ibana.​—Mateus 28:19, 20.

NA BOI ULAHONONMU:

• Parade ma tingki ganup ari laho manjaha Bibel dohot martangiang

• Sarihon ma jumolo na ringkot di partondion rap dohot keluarga sian na rekreasi

2 MANGHALASHON MARSIAJAR BIBEL NA SASARIPE

SONGON ON MA HATA NI BIBEL: ”Pajonok hamu tu Debata, dung i pajonohanna ma tu hamu!” (Jakobus 4:8) Porlu tontuhononmu tingki ganup minggu marsiajar Bibel na sasaripe. (1 Musa 18:19) Alai na rumingkot, ingkon taingot ma Debata di parngoluonta siganup ari. Asa togu haporseaon ni keluarga, ajarhon ma taringot tu Debata tingki ”hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse.” (5 Musa 6:6, 7) Songon hata ni si Josua na mandok, ”Alai anggo ahu dohot donganku sajabu, ingkon Jahowa do oloannami.”​—Josua 24:15.

NA BOI ULAHONONMU:

• Jotjot ma hamu manungkun tu dongan saripemu dohot ianakhonmuna aha na dihaporluhon nasida