Jesus Mambahen Tanda Halongangan di Kapernaum

Nunga dijou Jesus si Petrus, si Andreas, si Jakobus, dohot si Johannes gabe sijala jolma. Di tingki ari Sabbat, laho ma nasida tu sinagoga na di Kapernaum. Mangajari ma Jesus disi, jala longang do roha ni halak manangihon ibana. Ai ndang songon angka siboto surat ibana mangajari, jala tarida do na sian Debata na niajarhonna i.

Di tingki i, ro ma sahalak baoa na sinonggopan ni suru-suruan na jahat. Gogo ma didok baoa i, “Marhua ho ro tuson, ale Jesus halak Nasaret? Na laho ripashononmu do hami? Huboto do manang ise ho, na Badia ni Debata do ho!” Alai disonggak Jesus ma suru-suruan na jahat i. Ninna ma, “Sip ho, kaluar ma sian ibana!”​—Markus 1:24, 25.

Didabuhon suru-suruan na jahat i ma baoa i tu tano, mangkutur ma ibana jala marsurak. Alai “ndang manang mahua baoa i dibahen” suru-suruan na jahat i. (Lukas 4:35) Longang ma roha ni halak na di sinagoga i. Didok nasida ma, “Aha do on? . . .  Marhuaso do ibana palaohon angka suru-suruan na jahat jala dioloi do ibana.” (Markus 1:27) Gabe tarsar ma barita i tu sude halak di Galilea.

Ditadingkon Jesus ma sinagoga i, laho ma ibana dohot angka siseanna tu jabu ni si Simon manang si Petrus. Di tingki i, marsahit mohop do simatua boru ni si Petrus. Dipangido nasida ma asa dipamalum Jesus ibana. Ditiop Jesus ma tanganna jala diurupi ma ibana jongjong. Laos satongkin i malum ma simatuana i. Pintor laho ma ibana paradehon sipanganon tu Jesus dohot tu angka siseanna.

Hira-hira naeng borngin, marroan ma angka jolma mamboan na marsahit tu jabu ni si Petrus. Laos satongkin i, sude halak na di kota i marpungu disi laho dipamalum. “Dipamboani sude halak ma tu Jesus angka na marsahitna be, na manaon marragam sahit. Diampehon ibana ma tanganna tu ganup na marsahit i laho pamalumhon nasida.” (Lukas 4:40) Tutu, songon na tarsurat i, boi do dipamalum Jesus sude sahit. (Jesaya 53:4) Dipalao ibana do suru-suruan na jahat sian jolma. Tingki kaluar angka suru-suruan na jahat i, gogo ma didok nasida, “Anak ni Debata do ho.” (Lukas 4:41) Alai disonggak Jesus do suru-suruan na jahat i jala ndang dipaloas nasida paboahon manang aha pe. Diboto nasida do molo Jesus i Kristus. Alai, ndang lomo roha ni Jesus, gabe dirimpu halak angka suru-suruan na jahat i manomba Debata na sintong.