Halak Samaria na Gabe Dongan na Burju

Ndang dao dope Jesus sian Jerusalem. Godang do halak Jahudi na ro mandapothon ibana. Deba naeng manangihon ibana mangajari, jala na asing naeng manguji ibana. Disungkun sahalak siboto Patik ma, “Guru, aha do sibahenonku asa dapot ahu hangoluan na saleleng ni lelengna?”​—Lukas 10:25.

Diboto Jesus do na laho manguji ibana baoa on. Ai godang do parbinotoanna taringot tu Patik. Disungkun ibana pe i, asa hansit do roha ni halak Jahudi mambege alus ni Jesus. Alani i, manat ma dialusi Jesus ibana asa tarboto na di roha ni baoa i.

Dung i disungkun Jesus ma ibana, “Aha do na tarsurat di Patik i? Songon dia do pangantusionmu taringot i?” Ala nunga diboto baoa i Patik ni Debata, dipaboa ma na tarsurat di 5 Musa 6:5 dohot 3 Musa 19:18 na mandok, “‘Ingkon haholonganmu do Jahowa Debatam sian nasa roham, sian nasa ngolum, sian nasa gogom, dohot sian nasa pingkiranmu’ jala ‘haholongi ma donganmu jolma doshon dirim.’” (Lukas 10:26, 27) Tutu do alusna i?

Dialusi Jesus ma, “Sintong do alusmi. Tongtong ma ulahon i, asa dapotmu hangoluan.” Alai naeng do ‘pasintongonna dirina’ laho patuduhon na sintong do na diantusi ibana jala sian ias ni rohana do burju tu na asing. Alani i disungkun ibana ma, “Ise do sasintongna donganku jolma?” (Lukas 10:28, 29) Sungkun-sungkun na mansai ringkot do on. Boasa?

Di roha ni halak Jahudi, holan na mangulahon hasomalan ni halak Jahudi do na boi didok ‘dongan’. Jala dirimpu nasida, on do lapatan ni 3 Musa 19:18. Alani i, mangalo Patik do di nasida molo mardongan tu halak na so Jahudi. (Ulaon ni Apostel 10:28) Sintong do ra di roha ni baoa on dohot di roha ni deba sisean ni Jesus, molo burju holan tu halak Jahudi. Alai ndang burju nasida tu halak na so Jahudi, ala ndang dietong i ‘donganna’.

Dipaboa Jesus ma sada tudosan laho patuduhon na sala do nasida, asa unang gabe hansit roha ni baoa i dohot halak Jahudi na asing. Ninna ma, “Adong ma sasahalak na turun sian Jerusalem tu Jeriko. Alai dirampok ma ibana di tonga dalan, dibuat ma pangkeanna dohot artana, dipungkuli, jala ditinggalhon ma ibana nunga naeng mate. Mamolus ma sahalak malim sian dalan i. Tingki diida ibana na hona rampok i, dipasiding ibana ma jala ditorushon pardalananna. Songon i do muse sahalak Lepi, dung sahat ibana di inganan i, diida ibana do na hona rampok i. Alai dipasiding ibana ma jala ditorushon pardalananna.Mamolus ma muse sahalak Samaria sian dalan i. Tingki diida ibana na hona rampok i, asi ma rohana.”​—Lukas 10:30-33.

Tangkas do diboto baoa i, maringanan di Jeriko do angka malim dohot halak Lepi na martugas di bagas joro. Alani i, ingkon turun do nasida 23 kilometer mardalan pat laho mulak tu jabu ni nasida. Godang do pangarampok di dalan i. Alai di cerita ni Jesus, ndang olo sahalak malim dohot halak Lepi mangurupi dongan nasida halak Jahudi na hona rampok. Halak Samaria do na mangurupi, hape ndang lomo roha ni halak Jahudi tu halak Samaria.​—Johannes 8:48.

Songon dia dibahen halak Samaria i tu ibana? Didok Jesus ma muse, “Didapothon ibana ma na hona rampok i. Dipaias ma lukana mamangke miak dohot anggur jala dibungkus ma lukana i. Dipanangkok ma ibana tu atas ni halodena jala diboan tu inganan parbornginan, asa diubati ibana disi. Marsogotna i, dibuat halak Samaria i ma dua dinar jala dilehon ma tu panjaga inganan ni parbornginan i. Ninna ma, ‘Urus ma ibana, molo hurang hepeng na hulehon i, hugarar pe tingki ro ahu muse.’”​—Lukas 10:34, 35.

Dung i disungkun Jesus ma baoa na manungkun i, “Pandapotmu, ise do sian na tolu halak on na gabe dongan jolma ni na hona rampok i?” Ndang lomo rohana mandok “halak Samaria”, alani i didok ibana ma, “Halak na patuduhon asi ni roha i do.” Sian alusna on, taboto ma na diantusi ibana do parsiajaran sian tudosan i. Dung i didok Jesus ma, “Laho ma ho, bahen ma songon i.”​—Lukas 10:36, 37.

Tangkas ma, denggan do cara ni Jesus mangajari. Olo do ra ndang tarjalo ni baoa i dohot halak Jahudi molo pintor didok Jesus dongan ni nasida do halak na so Jahudi. Alani i ma dipaboa Jesus sada tudosan. Gabe diboto nasida ma ise dongan na burju, i ma halak na patuduhon holong dohot asi ni roha songon na dipaboa di Surat na Badia.