Sahalak Baoa na Mora dohot Si Lasarus

Nunga dipaboa Jesus tu siseanna asa marbisuk mamangke arta. Alai ndang holan siseanna mambege i, dohot do angka halak Parise. Jala ingkon marsiajar do nasida sian na nidok ni Jesus i. Boasa? Ala “holongan di hepeng do nasida”. Alai, gabe “direhei” nasida do na nidok ni Jesus.​—Lukas 15:2; 16:13, 14.

Nang pe songon i, ndang gabe metmet roha ni Jesus alani i. Gariada didok ibana do, “Didok hamu do na sintong dirimuna di adopan ni jolma, alai diboto Debata do rohamuna. Ai na sangap di jolma, na dihagigihon do i di Debata.”​—Lukas 16:15.

Sangap do halak Parise diida angka jolma, alai ndang sadia leleng muba ma sudena i. Patutoruon ni Debata ma angka halak na mora, parhuaso, dohot angka pamimpin agama. Alai patimboonna ma angka halak na lea, na marsitutu marale-ale tu Debata. Laho patorangkon taringot i, didok Jesus ma:

“Patik dohot na Sinurat ni Angka Panurirang do dibaritahon sahat tu tingki ni si Johannes. Dungkon i, dibaritahon ma Harajaon ni Debata gabe barita na uli jala ganup halak marsitutu masuk tusi. Nang pe salpu langit dohot tano on, alai ndang adong sada huruf pe sian Patik i na so digohi.” (Lukas 3:18; 16:16, 17) Songon dia do cara ni Jesus patorangkon angka na laho muba?

Ginjang do roha ni angka pamimpin agama Jahudi. Didok nasida, nunga diulahon nasida sude Patik ni si Musa. Tingki dipamalum Jesus sahalak baoa na mapitung di Jerusalem, didok nasida do, “Molo hami sisean ni si Musa do. Huboto hami, mangkatai do Debata tu si Musa.” (Johannes 9:13, 28, 29) Marhite Patik ni si Musa, boi do angka halak na lea dohot na pogos mananda Messias, i ma Jesus. Didok si Johannes Pandidi do Jesus Biru-biru ni Debata, laho patuduhon na Messias ibana. (Johannes 1:29-34) Alani i, gabe diboto angka na lea dohot angka na pogos ma taringot tu “Harajaon ni Debata” dung marbarita si Johannes. Gabe “barita na uli” ma on tu nasida.

Nunga masa Patik ni si Musa jala manogu-nogu tu Messias. Alani i, ndang porlu be i. Umpamana, diloas do di Patik ni si Musa marsirang molo adong dalanna. Alai Jesus mandok, “Ganup halak na manirangkon tunggane boruna jala dioli muse borua na asing, na mangalangkup do i. Jala manang ise na marhasohotan tu borua naung disirangkon i, na mangalangkup do ibana disi.” (Lukas 16:18) Sogo do roha ni halak Parise mambege i, ala lomo do roha ni nasida mambahen aturan ni nasida sandiri.

Dipaboa Jesus ma muse sada tudosan taringot tu dua baoa na muba parngoluon ni nasida. Tingki dipaboa Jesus tudosan i, disi do angka halak Parise na holongan di hepeng jala na sangap di adopan ni jolma.

Didok Jesus ma, “Adong ma sahalak baoa na mora, pangkeanna sian abit na piolet dohot linen. Sai sonang jala marlas ni roha do ibana ganup ari. Alai, adong ma sahalak pangido-ido na margoar si Lasarus, baroon do sude dagingna. Jotjot do ibana diboan tu harbangan ni jabu ni na mora i. Naeng dipangan ibana do rima-rima na madabu sian meja ni na mora i. Jala biang pe ro do mandilati barona i.”​—Lukas 16:19-21.

Ala holongan di hepeng do halak Parise, tontu nasida do “baoa na mora” na nidok ni Jesus di tudosanna i. Lomo do roha ni nasida mamangke baju na arga jala na palobihu. Mora do nasida, sangap, jala boi do nasida mandapot gumodang parbinotoan taringot tu Patik. Tingki didok Jesus nasida marpangkean na piolet, patuduhon na sangap do nasida. Jala tingki didok Jesus nasida marpangkean linen na bontar, patuduhon na dirimpu nasida do na sintong nasida.​—Daniel 5:7.

Songon dia do angka pamimpin agama na ginjang roha i mangida na pogos? Didok nasida do angka na pogos i am haarets, manang parhuta-huta, i ma angka halak na so mamboto Patik jala na so diajari taringot i. (Johannes 7:49) Dos do nasida songon “pangido-ido na margoar si Lasarus”, na male jala naeng dipangan nasida do “rima-rima na madabu sian meja ni na mora”. Songon si Lasarus na baroon, lea do angka halak na pogos didok angka pamimpin agama. Didok nasida, ndang lomo roha ni Debata mangida angka halak na lea dohot na pogos.

Songon i ma na masa saleleng on. Alai diboto Jesus na laho muba parngoluan ni angka halak na songon si Lasarus dohot angka halak na songon baoa na mora i.

MUBA PARNGOLUAN NI BAOA NA MORA DOHOT SI LASARUS

Dipaboa Jesus ma muse, “Di pudian ni ari mate ma pangido-ido i jala diboan angka suru-suruan ma ibana tu lambung ni si Abraham. Mate ma nang baoa na mora i jala dikubur ma. Tingki disiksa ibana di Kuburan, ditatap ma tu ginjang, sian na dao diida ma si Abraham dohot si Lasarus di lambungna.”​—Lukas 16:22, 23.

Diboto halak na manangihon Jesus i do naung leleng mate si Abraham. Dipaboa do di Surat na Badia ndang boi be angka naung mate marnida manang mangkatai, dohot ma i si Abraham. (Parjamita 9:5, 10) Alani i, songon dia do pangkilalaan ni nasida mambege tudosan i? Aha do na laho paboaon ni Jesus taringot tu angka halak na pogos dohot pamimpin agama na holongan di hepeng?

Dipatudu Jesus do na laho masa i tingki didok ibana, “Patik dohot na Sinurat ni Angka Panurirang do dibaritahon sahat tu tingki ni si Johannes. Dungkon i, dibaritahon ma Harajaon ni Debata gabe barita na uli”. Ala marbarita si Johannes dohot Jesus Kristus, muba ma parngoluan ni angka halak na songon si Lasarus dohot angka halak na songon baoa na mora.

Leleng do angka na pogos ndang diloas mamboto Patik ni Debata. Holan saotik do na boi dapot nasida, i pe sian rima-rima ni parbinotoan ni angka pamimpin agama. Alai diurupi ma nasida ala olo manangihon jala mangulahon angka na dipaboa si Johannes Pandidi dohot Jesus taringot tu Harajaon. Saonari, boi ma dapot ni nasida parbinotoan taringot tu Surat na Badia, tarlumobi marhite na diajarhon Jesus. Jala marhite i, gabe boi ma nasida marale-ale tu Debata.

Alai ndang olo angka halak na mora dohot angka pamimpin agama manangihon barita Harajaon na dipaboa si Johannes dohot na dipaboa Jesus. (Mateus 3:1, 2; 4:17) Gariada gabe muruk jala sogo do roha ni nasida mambege barita taringot tu api panguhuman i. (Mateus 3:7-12) Sasintongna las do roha ni angka pamimpin agama na holongan di hepeng i, molo ndang dibaritahon Jesus dohot angka siseanna barita sian Debata. Songon baoa na mora na di tudosan i do nasida na mandok, “Ale Abraham ompunami, asi ma roham tu ahu, suru ma si Lasarus mandaishon ujung ni jari-jarina i tu aek asa dipalambok dilangkon. Ai tung hansit do huhilala di api na marsigorgor on.”​—Lukas 16:24.

Alai ndang i na laho masa. Godangan pamimpin agama i, ndang olo mangihuthon “na sinurat ni si Musa dohot na sinurat ni angka Panurirang” asa manjalo Jesus, i ma Raja dohot Messias ni Debata. (Lukas 16:29, 31; Galatia 3:24) Nasida pe ndang olo patutoru diri ni nasida. Ndang ditangihon nasida angka na pogos naung mangihuthon Jesus jala na mandapot hasangapon sian Debata. Jala angka sisean ni Jesus pe, ndang boi mangganti na tarsurat i holan laho pasonangkon roha ni angka pamimpin agama. Di tudosan i, dipatudu Jesus ma on marhite hata ni si “Abraham” tu baoa na mora:

“Ingot ma anaha, nunga dijalo ho angka na denggan di ngolum. Alai si Lasarus susa do ngoluna. Saonari diapuli ma ibana dison, alai hansit ma taononmu. Asing ni i, adong do lombang na bagas na manirang hami dohot ho. Alani i, ndang adong manang ise na boi manaripar sian on tu ho, songon i ma nang halak na sian i ndang boi manaripar tu hami.”​—Lukas 16:25, 26.

Las do roha mamboto ujung ni parngoluon ni nasida, ai sintong do i. Gabe dipatutoru Debata do angka pamimpin agama na ginjang roha i. Alai gabe sangap ma angka na mangihuthon Jesus jala boi ma nasida marale-ale tu Debata. (Mateus 11:28-30) Piga-piga bulan dungkon i, dibahen ma parjanjian na imbaru laho manggantihon parjanjian Patik. (Jeremia 31:31-33; Kolosse 2:14; Heber 8:7-13) Di ari Pentakosta taon 33 M ma on masa. Dilehon Debata do tondi parbadiana tu angka sisean ni Jesus, alai ndang dilehon i tu halak Parise dohot tu angka pamimpin agama.