Janji ni Halak Israel tu Jahowa

Dua bulan dung kaluar sian Mesir, sahat ma halak Israel di Dolok Sinai jala markemah ma nasida disi. Disuru Jahowa ma si Musa naek tu dolok i. Didok Jahowa ma, ‘Nungnga Hupalua halak Israel. Molo unduk nasida tu Au jala diulahon patikku, gabe bangsokku ma nasida.’ Turun ma si Musa jala dipaboa ma hata ni Jahowa i tu bangso Israel. Songon dia do tanggapan ni nasida? Didok bangso i ma, ‘Olo do hami mangulahon sude paretta ni Jahowa.’

Naek ma muse si Musa tu dolok i. Didok Jahowa ma, ‘Di ari patoluhon, naeng makkatai Au tu ho. Paboa ma tu nasida asa unang adong na naek tu Dolok Sinai.’ Turun ma si Musa jala didok ma tu bangso i asa paradehon diri lao manangihon Jahowa.

Di ari patoluhon, diida nasida ma sillam dohot ombun na golap di dolok i. Dibege nasida ma muse soara ni ronggur dohot soara ni tarompet. Turun ma Jahowa tu dolok i di bagasan api. Mabiar situtu ma bangso Israel. Humutur ma dolok i jala gok ma timus di sakalilingna. Lam gogo ma soara ni tarompet i. Dung i didok Debata ma, ‘Au do Jahowa. Dang boi hamu manomba debata na asing.’

Naek ma muse si Musa tu dolok i. Dilehon Jahowa ma patik tu bangso i. Marhite patik i diboto nasida ma cara manomba Jahowa jala marpangalaho na denggan. Disuratton si Musa ma i jala dijahahon tu halak Israel. Marjanji ma nasida tu Debata, ‘Ulahononnami do sude paretta ni Jahowa.’ Alai tutu do diulahon nasida i?