Keledai ni si Bileam Boi Makkatai

Nungnga naeng 40 taon halak Israel di padang belantara. Godang do kota naung ditaluhon nasida. Saonari, markemah ma nasida di Moab di sabola timur ni Sunge Jordan. Satokkin nai, sahat nama nasida tu Tano na Dijanjihon. Mabiar do si Balas raja ni Moab molo dibuat halak Israel tano ni nasida. Alani i, dijou ibana ma sahalak bawa na margoar si Bileam asa ro tu Moab lao mamburai manang mengutuk halak Israel.

Alai didok Jahowa ma tu si Bileam, ‘So tung dikutuk ho halak Israel.’ Alani i, dang jadi lao si Bileam. Dijou Raja Balas ma ibana paduahalihon. Marjanji do Raja Balas lao mangalehon sude pangidoan ni si Bileam. Alai, dang olo si Bileam. Dung i didok Debata ma, ‘Lao ma ho, alai holan hata na hupaboa do na ikkon sidokkononmu.’

Naik ma ibana tu keledaina jala lao ma ibana tu kota Moab. Berencana do ibana naeng mengutuk halak Israel, hape nungnga didok Jahowa asa unang diulahon ibana i. Saleleng di pardalanan, ro ma malaikat ni Jahowa tu ibana sappe tolu hali. Alai dang diida si Bileam malaikat i, holan keledaina do na mangida i. Kaluar ma keledaina i sian dalan jala naeng masuk tu ladang. Dung i dihapitton keledai i ma dagingna tu tembok ni dalan i, gabe tarhapit ma pat ni si Bileam. Ujungna, manukkap ma keledai i di tonga dalan. Sai dipukkuli si Bileam do keledai i pakke tukkot.

Dung tolu hali dipukkuli, dibahen Jahowa ma makkatai keledai i. Didok keledai i ma tu si Bileam, ‘Boasa sai dipukkuli ho au?’ Didok si Bileam ma, ‘Gabe hira na oto do au dibahen ho. Molo adong podangku, nungnga hupamate ho.’ Didok keledai i ma muse, ‘Nungnga martaon-taon au rap dohot ho. Hea do hubahen songon on tu ho?’

Dung i, dibahen Jahowa ma si Bileam boi mangida malaikat i. Didok malaikat i ma, ‘Nungnga dipasingot Jahowa ho asa unang dikutuk ho halak Israel.’ Didok si Bileam ma, ‘Nungnga sala hape au, mulak nama au.’ Alai didok malaikat i ma, ‘Lao ma ho tu Moab. Alai holan hata ni Jahowa ma paboa.’

Dioloi si Bileam do hata ni Jahowa i? Daong. Dikutuk si Bileam do halak Israel sappe tolu hali. Alai, dibahen Jahowa do kutukanna i gabe pasu-pasu tu halak Israel. Ujungna, diserang halak Israel ma halak Moab jala mate ma si Bileam disi. Aut sugari ditangihon si Bileam hata ni Jahowa, dang mate ibana kan?