Jahowa Mamillit si Josua

Nungnga marpulu taon si Musa mamimpin halak Israel. Satokkin nai lao mate nama ibana. Didok Jahowa ma tu ibana, ‘Dang ho na lao mamboan bangso Israel masuk tu Tano na Dijanjihon. Alai hupaloas pe ho lao mangida Tano na Dijanjihon i.’ Dipangido si Musa ma tu Jahowa asa dipillit pamimpin na baru. Dung i didok Jahowa ma tu si Musa, ‘Lao ma ho, juppangi ma si Josua. Jala dok ma tu ibana, ibana do na hupillit.’

Dipaboa si Musa ma tu bangso i, satokkin nai mate nama ibana. Jala nungnga dipillit Jahowa si Josua lao mamimpin bangso Israel tu Tano na Dijanjihon. Didok si Musa ma tu si Josua, ‘Unang pola mabiar ho. Urupan ni Jahowa do ho.’ Dung i, lao ma si Musa tu Dolok Nebo. Sian i, dipatudu Jahowa ma tu ibana tano na dijanjihon tu si Abraham, si Isak, dohot si Jakkob. Marumur 120 taon ma si Musa tikki mate ibana.

Didok Jahowa ma tu si Josua, ‘Sian Sunge Jordan ma hamu lewat lao masuk tu Kanaan. Urupanku do ho, songon Au mangurupi si Musa. Jaha ma Patikku ganup ari. Unang mabiar ho. Ikkon barani do ho. Lao ma ho jala ulahon ma parettakki.’

Disuru si Josua ma dua mata-mata tu kota Jeriko. Aha do na masa disi? Taboto ma i annon di cerita na mangihut. Alai, dung mulak mata-mata i sian kota Jeriko, didok nasida saonari ma tikki na pas masuk tu tano Kanaan. Marsogotna i, disuru si Josua ma asa siap-siap halak Israel. Disuru ma akka malim mamboan tabut parjanjian. Nasida ma na parjolo lao tu Sunge Jordan. Balga do aek di sunge i. Alai, dung masuk pat ni nasida tu aek i, so ma aek i jala lam koring ma sunge i! Mardalan ma akka malim i sahat tu tonga-tonga ni sunge i, jala jongjong do nasida disi sahat tu na sae sude halak Israel menyeberang. Gabe diingot nasida do ra aha na dibahen Jahowa tikki di Laut Merah.

Dung piga-piga taon sahat ma halak Israel di Tano na Dijanjihon. Dibangun nasida ma jabu dohot kota disi. Boi ma nasida marladang dohot manuan anggur. Gok do sipanganon dohot siinumon disi. Didok do tano i, tano na gok susu dohot madu.