Si Rut Dohot si Naomi

Tikki masa kelaparan di Israel, adong ma sahalak borua ni Israel na margoar si Naomi pinda tu Moab rap dohot suamina dohot dua anakna. Di pudian ni ari, mate ma suamina. Mangoli ma anakna na dua i tu boru Moab, i ma si Rut dohot si Orpa. Hape, mate ma muse anakna na dua i.

Tikki dibege si Naomi dang adong be kelaparan di Israel, mulak ma ibana tusi. Didongani si Rut dohot si Orpa do ibana. Alai di pardalanan, didok si Naomi ma, ‘Istri na burju do hamu jala parumaen na burju. Mulak ma hamu tu Moab, asa muli muse hamu.’ Didok nasida ma, ‘Holong do rohanami tu ho! Dang olo hami maninggalhon ho.’ Sai disuru si Naomi do asa mulak nasida. Ujungna, mulak ma si Orpa. Alai molo si Rut, toktong do didongani ibana si Naomi. Didok si Naomi ma tu ibana, ‘Nga mulak be si Orpa tu bangsona dohot tu debatana. Ihutton ma ibana jala mulak ma ho tu jabu ni omakmu.’ Alai didok si Rut ma, ‘Dang olo au maninggalhon ho. Bangsom nama gabe bangsokku, Debatam nama gabe Debatakku.’ Menurutmu, songon dia do perasaan ni si Naomi mambege i?

Sahat ma si Rut dohot si Naomi di Israel. Baru mulai dope panen barli tikki i. Alani i, dohot ma si Rut papunguhon sisa panen di ladang ni si Boas, anak ni si Rahab. Nungnga dibege si Boas, burju do si Rut tu si Naomi. Didok ma tu parkarejona asa godang disisahon nasida barli i tu si Rut.

Tikki botari, disukkun si Naomi ma si Rut, ‘Di ladang ni ise do ho sadari on?’ Didok si Rut ma, ‘Di ladang ni si Boas.’ Didok si Naomi ma, ‘Keluarga ni amang simatuam do si Boas i. Disi ma ho dohot akka parkarejona borua, asa aman ho.’

Karejo do si Rut di ladang ni si Boas sahat tu na sae musim panen. Diparrohahon si Boas ringgas jala burju do si Rut. Di tikki i, molo mate sahalak bawa jala dang adong dope anakna, boi do istrina i menikah tu sahalak sian keluarga ni bawa i. Alani i, menikah ma si Boas tu si Rut. Adong ma anak ni nasida, goarna si Obed. Si Obed ma oppung ni Raja Daud. Marlas ni roha ma akka dongan ni si Naomi. Didok nasida ma, ‘Parjolo, dilehon Jahowa do si Rut na burju tu ho. Jala saonari dilehon do tu ho sada pahoppu. Tarpuji ma Jahowa.’