Ditaluhon si Gidion ma Halak Midian

Di pudian ni ari, dang setia be halak Israel tu Jahowa, jala disomba nasida do debata na so sittong. Saleleng pitu taon, jotjot do ditakko halak Midian pinahan ni halak Israel jala disegai suan-suananna. Alani i, martabuni ma halak Israel tu gua manang tu dolok-dolok. Martangiang ma nasida tu Jahowa asa dipalua. Jadi, disuru Jahowa ma sada malaikat manjuppangi sahalak bawa na poso na margoar si Gidion. Didok suru-suruan i ma, ‘Nungnga dipillit Jahowa ho gabe tentara na jago.’ Alai didok si Gidion ma, ‘Ise ma huroa au? Ai dang halak na jago au. Songon dia ma bahenokku paluahon halak Israel?’

Sian dia do diboto si Gidion na dipillit Jahowa ibana? Dibahen si Gidion ma abit wol tu tano jala didok ma tu Jahowa, ‘Marsogot pagi, molo maraek abit on alani ombun, alai koring tano on, huboto ma na dipillit Ho do au.’ Marsogotna i, maraek ma abit wol i alai koring do tano i! Dipangido si Gidion ma muse, asa marsogotna i abit i na koring, alai tano i maraek. Songon i do na terjadi. Gabe pos ma roha ni si Gidion na dipillit Jahowa do ibana. Dung i dipapungu ibana ma tentara ni Israel lao mangalo halak Midian.

Didok Jahowa ma tu si Gidion, ‘Monang do bahenokku halak Israel. Alai pagodangku do tentaramon, gabe dirippu ho ma annon alani gogom do ho monang. Alani i, suru ma mulak akka tentara na mabiar.’ Mulak ma 22.000 tentara i, jala tinggal ma 10.000. Alai didok Jahowa ma muse, ‘Pagodangku dope on. Boan ma nasida tu sunge jala suru minum sian aek i. Pillit ma tentara na toktong marjaga-jaga tikki minum.’ Holan 300 tentara do na songon i. Alai marjanji do Jahowa boi do ditaluhon nasida 135.000 tentara ni Midian i.

Dung borngin, didok Jahowa ma tu si Gidion, ‘Alo ma halak Midian i saonari!’ Dilehon si Gidion ma tu akka tentarana tarompet na sian tanduk dohot gucci na balga na marisi obor. Didok ibana ma tu nasida, ‘Ihutton ma songon na hubahen on.’ Diombus si Gidion ma tarompetna, dipocahon ma guccina, jala diangkat ma oborna. Marsurak ma ibana, ‘Podang ni Jahowa dohot podang ni si Gidion!’ Dung i, dohot ma 300 tentara i mambahen songon i. Gabe mabiar ma halak Midian jala marlarian ma nasida. Ala nga kacau situasina, gabe marsipamatean ma nasida. On patuduhon, diurupi Jahowa do halak Israel mangalo musu.