Martangiang si Hanna Mangido Sada Anak

Adong ma halak Israel na margoar si Elkana. Goar ni istrina si Hanna dohot si Pininna. Umholong do rohana tu si Hanna. Godang do anak ni si Pininna, alai dang adong anak ni si Hanna. Alani i, sai didok si Pininna do hata na mambahen haccit roha ni si Hanna. Sai lao do si Elkana dohot keluargana ganup taon tu tabernakel di Silo. Di sada tikki, diida si Elkana ma si Hanna tangis. Didok ibana ma, ‘Unang ma sai tangis ho Hanna. Adong do au. Holong do rohakku tu ho.’

Lao ma si Hanna martangiang sahalakna. Sai tangis do ibana mangido asa diurupi Jahowa. Dung i marjanji ma si Hanna, ‘Molo dilehon Ho di au sada anak ale Jahowa, lehonokku ma ibana tu Ho saleleng ni ngoluna.’

Diida Sintua ni Malim Eli ma sai tangis si Hanna. Gabe dirippu ma naung mabuk si Hanna. Alai didok si Hanna ma, ‘Dang na mabuk au tuan. Na marsak do au, jala i do na hutangiakkon tu Jahowa.’ Gabe didok si Eli ma, ‘Anggiat ma dilehon Debata pangidoanmi.’ Dang marsak be si Hanna. Di bagasan sataon, tubu ma anakna jala dibahen ma goarna si Samuel. Pasti las hian do roha ni si Hanna kan?

Ditepati si Hanna do janjina tu Jahowa. Dukkon dang manusu be si Samuel, diboan si Hanna ma ibana tu tabernakel. Didok si Hanna ma tu si Eli, ‘On ma anakku na hupangido i. Lehonokku ma ibana tu Jahowa saleleng ni ngoluna.’ Ganup taon sai ro do si Elkana dohot si Hanna mangida si Samuel. Diboan do baju rompi na ganjang tu ibana. Dilehon Jahowa do muse tolu anak dohot dua boru nai tu si Hanna.