Si Daud Dohot si Goliat

Didok Jahowa ma tu si Samuel, ‘Lao ma ho tu jabu ni si Isai. Sada sian akka anakna ma na gabe raja ni Israel.’ Lao ma si Samuel tu jabu ni si Isai. Tikki diida si Samuel anak siakkanganna, didok rohana ma, ‘On do ra na dipillit Jahowa.’ Hape dang ibana na dipillit Jahowa. Didok Jahowa ma, ‘Dang rupa na huida, alai rohana do.’

Dipatudu si Isai ma onom anakna na asing. Alai didok si Samuel ma, ‘Dang adong sian nasida na dipillit Jahowa. On do sude anakmu?’ Didok si Isai ma, ‘Adong dope sada nai, anakku siappudan, goarna si Daud. Marmahan do ibana saonari.’ Tikki ro si Daud, didok Jahowa ma tu si Samuel, ‘On do na hupillit!’ Dung i, dibahen si Samuel ma miak tu ulu ni si Daud. Ibana ma na gabe raja ni Israel di ari na naeng ro.

Dang sadia leleng, marporang ma halak Israel dohot halak Palistim. Adong do tentara ni halak Palistim na massai balga songon raksasa. Goarna si Goliat. Ganup ari, diejek ibana do halak Israel. Gogo ma didok, ‘Suru ma sahalak bawa mangalo au. Molo monang ibana, gabe budakmuna ma hami. Alai molo au do na monang, hamu ma na gabe budaknami.’

Ro ma si Daud tu perkemahan ni tentara ni halak Israel lao mamboan sipanganon ni akka abangna. Dibege ibana do hata ni si Goliat i. Alani i didok ma, ‘Au ma na mangalo ibana!’ Alai didok Raja Saul ma, ‘Dakdanak dope ho, dang taralom i.’ Didok si Daud ma, ‘Urupan ni Jahowa do au.’

Dipakkehon si Saul ma baju porangna tu si Daud. Alai didok si Daud ma, ‘Dang hea hupakke songon on.’ Dibuat si Daud ma ambalang, i ma alat lao mangalempar batu. Dung i, dipillit ibana ma lima batu na liccin sian sunge. Didapotton ibana ma si Goliat. Didok si Goliat ma, ‘Ro ma ho. Asa hubahen ho gabe sipanganon ni pidong dohot binatang buas.’ Nang pe songon i, dang mabiar si Daud. Didok do, ‘Mamakke podang dohot tombak do ho mangalo au, alai molo au marhite goar ni Jahowa do mangalo ho. Dang hami na dialo ho, alai Debata do. Lehonon ni Debata ma hamu tu hami. Idaon ni sude halak ma, umgogo do Jahowa sian podang dohot tombak.’

Dilempar si Daud ma batu i mamakke ambalang sagogo ni gogona. Ala diurupi Jahowa, gabe hona ma batu i tu jidat ni si Goliat. Madabu ma si Goliat, jala mate. Dung i marlarian ma halak Palistim. Porsea do ho tu Jahowa songon si Daud?