Si Daud Dohot si Saul

Dung mate si Goliat, dibahen Raja Saul ma si Daud gabe panglima ni tentarana. Sai monang do si Daud di parporangan. Gabe terkenal ma ibana. Molo mulak si Daud sian parporangan, manortori do akka borua huhut marende. Di ende i didok ma, ‘Marribu do na dipamate si Saul, alai marpulu ribu do na dipamate si Daud!’ Gabe cemburu ma si Saul tu si Daud. Jala naeng dipamate ma si Daud.

Malo do si Daud marharpa. Sada tikki, marharpa ma si Daud di jolo ni Raja Saul. Toppu ma dipatikkon raja i tombakna tu si Daud. Alai dang hona tu si Daud, gabe tu tembok do pattik tombak i. Mulai sian i, sai berupaya do si Saul naeng mambunu si Daud. Alani i, martabuni ma si Daud tu padang belantara.

Diboan si Saul do 3.000 tentarana lao mengejar si Daud. Masuk do nasida tu gua inganan ni si Daud dohot akka tentarana martabuni. Didok tentarana ma tu si Daud, ‘Saonari ma tikkina. Bunu ma si Saul i.’ Sipsip ma si Daud ro tu jonok ni si Saul, jala diseat ma saotik ujung ni rompi ni si Saul. Dang diboto si Saul i. Alai dukkon i, gabe manolsoli do si Daud ala dang diargai ibana raja na dipillit Jahowa. Diorai si Daud ma tentarana mambunu si Saul. Dung kaluar si Saul sian gua, gogo ma marsurak si Daud tu si Saul mandokkon boi hian do pamateonna si Saul di tikki i, alai dang olo ibana. Gabe muba do roha ni si Saul dung mambege i?

Daong. Sai naeng dipamate si Saul do si Daud. Tikki borngin, masuk ma si Daud dohot si Abisai tu perkemahan ni si Saul. Tarpodom do pengawal ni si Saul, i ma si Abner. Didok si Abisai ma, ‘On ma tikkina, tabunu ma ibana.’ Alai didok si Daud ma, ‘Jahowa ma na manghukum ibana. Tombak dohot panginumanna i ma tabuat, dung i lao ma hita!’

Nakkok ma si Daud tu dolok di jonok perkemahan ni si Saul. Gogo ma soarana mandok, ‘Abner, boasa dang dijaga ho rajami? Didia do senjata dohot panginumanna?’ Diboto si Saul do, soara ni si Daud do i. Didok si Saul ma, ‘Dang dibunu ho au, hape adong kesempatanmu mangulahon i. Huboto do, ho do annon gabe raja ni Israel.’ Dung i mulak ma si Saul tu istanana. Alai sasittongna, adong do keluarga ni si Saul na burju tu si Daud.