Dosa ni Raja Daud

Dung mate si Saul, gabe raja ma si Daud. Marumur 30 taon ma ibana tikki i. Di sada borngin, diida si Daud ma sahalak borua na bagak sian loteng ni istanana. Si Bat-seba do goarna, jala istri ni si Uria do ibana. Disuru si Daud ma si Bat-seba tu istana. Mangulahon seks ma nasida, ujungna hamil ma si Bat-seba. Alai dang lomo roha ni si Daud adong na mamboto i. Alani i, didok ma tu panglima ni tentarana asa dibahen si Uria di baris na parjolo tikki marporang. Gabe mate ma si Uria di parporangan, dung i menikah ma si Daud dohot si Bat-seba.

Diida Jahowa do sudena i. Alani i, disuru ma Panurirang Natan manjuppangi si Daud. Didok si Natan ma tu si Daud, ‘Adong ma sahalak bawa na mamora jala gok dombana. Adong ma muse sahalak bawa na pogos. Holan sada do dombana, gelleng dope jala holong do rohana tu dombana i. Hape dibuat na mora i ma domba ni na pogos i.’ Gabe muruk ma si Daud jala didok ma, ‘Ikkon dipamate do na mora i!’ Dialusi si Natan ma, ‘Ho do bawa i!’ Marsak hian ma si Daud, jala didok ma, ‘Nungnga mardosa au tu Jahowa.’ Dihukum Jahowa do si Daud alani dosana i. Gabe susa ma ibana dohot keluargana. Alai, dang dipamate Jahowa si Daud ala jujur jala rendah hati do ibana.

Lomo do roha ni si Daud lao mambangun bagas joro ni Jahowa. Alai, anakna do na dipillit Jahowa lao mambangun i. Goarna si Salomo. Dilehon si Daud ma akka na porlu tusi, jala didok ibana, ‘Ikkon bagak do bagas joro ni Jahowa i. Huurupi pe si Salomo mangulahon i ala poso dope ibana.’ Dilehon si Daud ma godang hepeng, jala dilului ma akka tukkang na ahli lao mambangun i. Dipapungu ma mas dohot perak, jala diboan ma hau aras sian Tirus dohot Sidon. Sebelum mate si Daud, dilehon ibana do gambar ni bagas joro i tu si Salomo. Didok ma, ‘Disuru Jahowa do au mambahen gambar on. Urupan ni Jahowa do ho. Unang mabiar ho. Togu ma ho jala ulahon ma i.’