Bagas Joro tu Jahowa

Dung gabe raja ni Israel si Salomo, disukkun Jahowa ma ibana, ‘Aha ma pangidoonmu sian Au?’ Dialusi si Salomo ma, ‘Poso dope au, dang huboto aha na lao ulahonokku. Lehon ma tu au bisuk asa denggan au mamimpin akka naposomon.’ Didok Jahowa ma, ‘Ala dipangido ho do asa marbisuk ho, bahenokku ma ho gabe halak na umbisuk di tano on. Lehonokku ma muse hamoraon. Jala molo dioloi ho Au, ganjang ma umurmu.’

Dibangun si Salomo ma bagas joro ni Debata. Dipakke do mas, perak, hau, dohot batu permata na dumenggan lao mambangun bagas joro i. Adong marribu bawa dohot borua na ahli na dohot mambangun i. Dung pitu taon, sae ma bagas joro i jala dilehon ma i tu Jahowa. Adong do disi sada mezbah inganan manutung persembahan. Marsinggang ma si Salomo di jolo ni mezbah i jala martangiang ma ibana. Didok ma, ‘Ale Jahowa, gelleng do nian bagas joro on di Ho. Alai jalo ma persembahannami on jala tangihon ma tangiangnami.’ Songon dia do dibahen Jahowa mangalusi tangiang ni si Salomo? Dung sae si Salomo martangiang, dibahen Jahowa ma api sian langit manutung persembahan i. Sian on, taboto ma na las do roha ni Jahowa mangida bagas joro i. Jala halak Israel pe marlas ni roha do mangida i.

Ala marbisuk Raja Salomo, gabe terkenal do ibana di sude luat ni Israel sahat tu inganan na dao. Marroan do akka halak tu ibana mangido asa diurupi. Hea do ro Ratu Syeba manjuppangi ibana. Dibahen ma sukkun-sukkun na maol lao manguji ibana. Tikki dibege Ratu Syeba alus ni Raja Salomo, didok ma, ‘Najolo, dang porsea au tu hata ni halak taringot ho. Alai saonari porsea do au, umbisuk do ho sian na hea hubege. Sai dipasu-pasu Jahowa Debatami ma ho.’ Marlas ni roha do halak Israel di tikki i. Alai dang sadia leleng, muba do i.