Gabe Tarbagi ma Harajaon ni Israel

Saleleng manomba Jahowa si Salomo, dame do Israel. Alai, godang do istri ni si Salomo na so halak Israel jala akka panomba patung do nasida. Lam leleng, gabe dohot ma si Salomo manomba patung songon akka istrina i. Muruk ma Jahowa, didok ma, ‘Dibagi dua nama harajaon ni Israel. Lehonokku ma na umbalga tu sahalak sian parkarejom. Jala bagian na unggelleng ma tu keturunanmu.’

Terjadi ma songon na didok Jahowa i. Adong do sahalak parkarejo ni si Salomo na margoar si Jerobeam. Tikki di dalan, pajuppang ma ibana dohot Nabi Ahia. Diribak si Ahia ma bajuna gabe 12 bagian. Didok ma tu si Jerobeam, ‘Buaton ni Jahowa nama harajaon ni Israel sian keluarga ni si Salomo. Dibagi dua nama harajaon i. Buat ma sappulu di ho. Ai ho do na lao gabe raja di harajaon na sappulu marga.’ Diboto si Salomo ma i jala naeng dibunu ma si Jerobeam! Lari ma si Jerobeam tu Mesir. Alai dung mate si Salomo, anakna na margoar si Rehabeam ma na gabe raja. Tikki didok roha ni si Jerobeam nungnga aman be situasina, mulak ma ibana tu Israel.

Didok akka penasehat di Israel ma tu si Rehabeam, ‘Molo burju ho tu bangso on, setia do nasida tu ho.’ Alai ro ma dongan sebaya ni si Rehabeam mandok, ‘Unang ma paburjuhu ho tu bangso on! Paksa ma nasida karejo!’ Diihutton si Rehabeam do hata ni donganna i. Gabe kejam do ibana tu bangso i. Ujungna, mangalo ma na sappulu marga i tu ibana. Dibahen nasida ma si Jerobeam gabe raja ni nasida. Didok ma i harajaon ni Israel. Alai na dua marga nai, setia do tu si Rehabeam. Digoari ma i harajaon ni Juda. Nungnga tarbagi be na 12 marga i.

Dang lomo roha ni si Jerobeam molo lao rakyatna manomba Debata tu Jerusalem, ala disi do harajaon ni si Rehabeam. Mabiar do si Jerobeam gabe marpihak rakyatna tu si Rehabeam. Alani i, dibahen ibana ma dua patung anak ni lombu na sian mas. Didok ma tu rakyatna, ‘Padaohu do hamu lao tu Jerusalem. Dison ma hamu manomba Debata.’ Gabe disomba nasida ma patung i, jala dilupahon nasida ma muse Jahowa.