Dihukum ma Sahalak Ratu na Jahat

Sian jandela ni istanana di Jisreel, diida Raja Ahab ma ladang anggur ni si Nabot. Lomo roha ni si Ahab mangida ladang i. Alani i, naeng dituhor ma i sian si Nabot. Alai dang olo si Nabot manjual i. Alana mangihutton Patik ni Jahowa, dang boi halak Israel manjual tano warisan ni nasida. Sittong do keputusan na dibahen si Nabot i. Alai songon dia do pandapot ni si Ahab tu keputusanna i? Gabe muruk ma ibana. Sappe dang olo ibana kaluar sian kamarna jala dang olo mangan.

Massai jahat do istri ni si Ahab, i ma Ratu Izebel. Didok ma tu si Ahab, ‘Ho do raja ni Israel. Boi do buatonmu manang aha pe lomo ni roham. Jala boi do bahenokku asa di ho tano i.’ Dibahen si Izebel ma surat tu akka pamimpin di kota i. Di surat i, disuru ibana do asa didok akka bawa i naung dileai si Nabot Debata, jala ikkon dilempari do si Nabot mamakke batu sappe mate. Diulahon akka bawa i do i. Didok si Izebel ma tu si Ahab, ‘Nungnga mate be si Nabot. Saonari, ho ma nappuna ladang anggur i.’

Dang holan si Nabot na hea dibunu si Izebel. Godang do tong halak na manomba Jahowa na dibunu ibana. Patung do disomba si Izebel, jala sai mangulahon na jahat do ibana. Diida Jahowa do hajahatonna i. Aha do na lao dibahen Jahowa tu ibana?

Dung mate si Ahab, anakna si Jehoram ma na gabe raja. Disuru Jahowa ma sahalak bawa na margoar si Jehu lao pamatehon si Izebel dohot keluargana.

Lao ma si Jehu tu Jisreel naeng manjuppangi si Izebel. Tikki di dalan dope, dijuppangi si Jehoram ma si Jehu, jala didok ma “Mamboan barita na denggan do haroromon Jehu?” Dialusi si Jehu ma, ‘Dang adong barita na denggan saleleng diulahon omakmu si Izebel dope akka na jahat.’ Pittor naeng ditinggalhon si Jehoram ma si Jehu. Alai dibuat si Jehu ma panahna, jala dipanah ma si Jehoram, dung i mate ma si Jehoram.

Dung i, lao ma si Jehu tu istana ni si Izebel. Tikki dibege si Izebel na ro si Jehu, pittor marbadak ma ibana, disuri obukna, jala hundul di jandela na di ginjang. Dung sahat si Jehu, didok si Izebel ma hata na so denggan tu ibana. Didok si Jehu ma tu akka pelayan ni si Izebel na jongjong di labbungna, “Dabuhon ma ibana tu toru!” Dionjarhon ma si Izebel sian jandela i, dabu ma ibana dung i mate.

Dukkon i, dibunu si Jehu ma muse 70 anak ni si Ahab. Dihancurhon ibana ma akka patung ni Baal na adong di luat i, jala dipamate ibana ma akka halak na manomba patung i. Sian cerita on taboto ma, diida Jahowa do sude na masa, jala diboto Ibana do andigan tikki na pas lao manghukum halak na jahat.