Diurupi Jahowa do si Jehosapat

Dihancurhon si Jehosapat, raja ni halak Juda ma sude patung dohot mezbah ni Baal na adong di luatna. Lomo do rohana asa sude jolma mamboto patik ni Jahowa. Alani i, disuru ibana ma akka pamimpin dohot halak Lepi mangajarhon patik ni Jahowa tu sude halak di Juda.

Mabiar do akka bangso na asing mangalo halak Juda. Ala diboto nasida, didongani Jahowa do halak Juda. Gariada diboan nasida do hadiah tu Raja Jehosapat. Alai di sada tikki, ro ma halak Moab, halak Ammon, dohot halak sian Seir mangalo Juda. Diboto si Jehosapat do porlu ibana bantuan sian Jahowa. Disuru ma sude bawa, borua, dohot dakdanak asa ro tu Jerusalem. Di jolo ni akka rakyatna i martangiang ma si Jehosapat, didok ma, ‘Ale Jahowa, molo dang urupi Ho hami, dang boi hami monang. Paboa ma aha na ikkon ulahononnami.’

Ditangihon Jahowa do tangiangna i. Didok Jahowa ma, ‘Unang mabiar ho. Urupakku do ho. Jongjong ma ho disi, paima ma jala ida ma paluaokku do ho.’ Songon dia do Jahowa paluahon nasida?

Manogotna i, dipillit si Jehosapat ma akka parende jala didok ma asa marbaris nasida di jolo ni akka tentara. Mardalan ma nasida sambil marende sian Jerusalem sahat tu inganan ni nasida marporang di Tekoa.

Gogo ma soara ni nasida marende mamuji Jahowa. Tikki na marende i nasida, dibahen Jahowa ma halak Ammon dohot halak Moab marsibunuan jala dang adong na selamat. Alai dipalua Jahowa do halak Juda, akka tentarana, dohot akka malim. Sude do halak na adong di sakaliling ni luat i mambege aha naung diulahon Jahowa. Jala diboto nasida ma, sai didongani Jahowa do akka naposona. Songon dia do Jahowa paluahon naposona? Marhite godang cara, jala dang porlu Jahowa diurupi jolma lao mangulahon i.