Sabar do Jahowa tu si Jona

Kota ni halak Asiria do Ninive. Massai jahat do akka jolma na tinggal disi. Disuru Jahowa ma Nabi Jona tu Ninive lao pasingotton akka halak na disi asa muba nasida. Alai, dang dioloi si Jona i. Lao do ibana markapal tu Tarsis.

Tikki di tonga laut, gogo hian ma badai, gabe mabiar ma akka parkarejo ni kapal i. Martangiang ma nasida tu akka debata ni nasida jala ninna ma, ‘Boasa terjadi on?’ Ujungna didok si Jona ma tu nasida, ‘Au do na sala. Na lari do au sian Jahowa. Dabuhon hamu ma au tu laut on asa so badai on.’ Dang olo nasida mandabuhon. Alai sai didok si Jona do asa didabuhon ibana. Dung didabuhon ibana tu laut i, so ma badai i.

Didok roha ni si Jona, mate nama ibana. Tikki lam lonong ibana tu bagasan laut i, martangiang ma ibana tu Jahowa. Dibahen Jahowa ma asa diboddut dekke na balga si Jona. Alai dang mate si Jona. Sian butuha ni dekke i martangiang ma ibana. Didok ma, ‘Marjanji au, sai na oloakku do Ho.’ Dijaga Jahowa do si Jona saleleng tolu ari di butuha ni dekke i. Dung i disuru Jahowa ma asa diutahon dekke i si Jona tu darat.

Dung selamat si Jona, tetap do disuru Jahowa ibana lao tu Ninive. Dioloi si Jona do i. Lao ma ibana jala didok ma tu akka halak disi, ‘Opat pulu ari nai na lao dihancurhon nama kota Ninive on.’ Dang dirippu si Jona ditangihon halak Ninive do hape hatana i, jala muba ma nasida. Didok raja ni Ninive ma tu bangsona, ‘Ganup halak ikkon martangiang tu Debata jala muba. Atik boha dang jadi pamateonna hita.’ Tikki diida Jahowa nungnga muba halak Ninive i, dang saut be dihancurhon kota i.

Muruk ma si Jona ala dang saut dihancurhon kota i. Pikkirhon ma on: Sabar jala asi do roha ni Jahowa tu si Jona. Alai si Jona dang asi rohana tu halak Ninive. Murhing ma bohina, jala lao ma ibana tu luar ni kota i. Hundul ma ibana di sopo-sopo jala adong labu air di ginjang ni sopo-sopo i na mangalinggomi ibana. Alai tikki malos labu air i, gabe muruk do si Jona. Jadi didok Jahowa ma tu ibana, ‘Boasa asi roham tu labu air on, hape tu halak Ninive dang asi roham? Molo Au, asi do rohakku tu nasida, alani i ma gabe selamat nasida.’ Aha do parsiajaranna? Ummarga do halak Ninive sian suan-suanan.