Malaikat ni Jahowa Manjaga si Hiskia

Nungnga dikuasai halak Asiria harajaon ni Israel na sappulu marga. Saonari naeng dikuasai si Sanherib raja ni Asiria do muse na dua marga nai, i ma harajaon ni Juda. Mulai ma dikuasai ibana kota ni Juda i sada-sada. Alai sian sude kota i, kota Jerusalem ma na unlomo rohana naeng dikuasai ibana. Dang diboto si Sanherib na sai dijaga Jahowa do kota Jerusalem.

Si Hiskia do raja ni Juda tikki i. Dilehon ibana do godang hepeng tu si Sanherib asa unang ditaluhon Jerusalem. Nang pe nungnga dijalo si Sanherib hepeng i, alai tetap do disuru akka tentarana na jago lao menyerang Jerusalem. Mabiar ma akka halak na tinggal disi, ala nungnga massai jonok tentara ni Asiria tu kota i. Alai didok si Hiskia ma tu nasida, ‘Unang mabiar hamu. Gogo do nian tentara ni Asiria i, alai umgogo do hita sian nasida bahenon ni Jahowa.’

Disuru si Sanherib ma Rabsake asa lao mangejek halak Jerusalem. Didok Rabsake i ma tu nasida, ‘Dang boi Jahowa mangurupi hamu. Unang olo hamu dioto-otoi si Hiskia. Dang adong debata na boi menyelamatton hamu sian hami.’

Disukkun si Hiskia ma tu Jahowa aha do na ikkon diulahon ibana. Didok Jahowa ma, ‘Unang mabiar hamu tu hata ni Rabsake i. Dang boi buaton ni si Sanherib Jerusalem.’ Dibahen si Sanherib ma surat tu si Hiskia. Didok di surat i, ‘Menyerah ma hamu. Dang boi Jahowa menyelamatton hamu.’ Martangiang ma si Hiskia, didok ma, ‘Jahowa, selamatton ma hami, asa sude mamboto holan Ho do Debata na sittong.’ Didok Jahowa ma tu ibana, ‘Dang na lao ro halak Asiria tu Jerusalem. Sai jagaonku do kota on.’

Dirippu si Sanherib, satokkin nai taluhononna ma Jerusalem. Alai di borngin i, disuru Jahowa ma sada malaikat mambunu 185.000 tentara ni Asiria na markemah di luar ni tembok Jerusalem. Mate ma akka tentara ni si Sanherib na jago i. Ujungna mulak ma ibana. Songon naung didok Jahowa, sai dijaga Ibana do si Hiskia dohot kota Jerusalem. Molo di Jerusalem ho tikki i, porsea do ho tu Jahowa?