Massai Lomo Roha ni si Josia tu Patik ni Jahowa

Tikki marumur ualu taon ma si Josia gabe raja di Juda. Di tikki i, godang do halak na mamakke ilmu sihir dohot manomba patung. Tikki marumur 16 taon si Josia, diparsiajari ibana ma cara na sittong lao manomba Jahowa. Dung marumur 20 taon, dihancurhon ibana ma sude patung dohot mezbah di sude harajaon i. Dung marumur 26 taon, dipadenggan ibana ma muse bagas joro ni Jahowa.

Dapot ni Sintua Malim Hilkia ma gulungan na marisi Patik ni Jahowa di bagas joro. Si Musa do ra na manurat gulungan on. Dilehon si Sapan sekretaris ni raja i ma gulungan i tu si Josia jala dijahahon ma i. Tikki dibege si Josia i, diboto ibana ma nungnga leleng bangso i dang mangoloi Jahowa. Didok si Josia ma tu si Hilkia, ‘Muruk situtu do Jahowa tu hita. Lao ma ho jala sukkun ma Jahowa asa dipaboa aha na ikkon taulahon.’ Dialusi Jahowa ma i marhite sahalak nabiah na margoar si Hulda. Didok ma, ‘Nungnga ditinggalhon halak Juda Au. Hukumokku ma nasida, alai dang tikki mamaretta si Josia. Alana dioloi ibana do Au.’

Dung dibege si Josia i, lao ma ibana tu bagas joro jala dipapungu ma sude halak Juda. Dijahahon ibana ma Patik ni Jahowa di jolo ni bangso i. Marjanji ma si Josia dohot bangsona mangoloi Jahowa sian nasa roha ni nasida.

Nungnga leleng halak Juda dang mangarayahon Paska. Jadi dijahahon si Josia ma patik na mandok ikkon dirayahon nasida do Paska ganup taon. Dung i didok ibana ma tu bangso i, ‘Ikkon tarayahon do Paska tu Jahowa.’ Diparade si Josia ma sude binatang na lao gabe persembahan tu Jahowa, jala diatur ma asa adong akka parende di bagas joro i. Dung dirayahon nasida Paska, dirayahon nasida ma muse Perayaan Roti na so Marragi saleleng pitu ari. Di tikki ni Nabi Samuel do perayaan on parpudi diulahon. Massai lomo do roha ni si Josia tu Patik ni Jahowa. Molo ho, lomo do roham marsiajar taringot Jahowa?