Disuru Jahowa ma si Jeremia Marbarita

Dipillit Jahowa ma si Jeremia gabe nabi tu halak Juda. Disuru ma ibana marbarita jala pasingotton halak Juda asa unang sai mangulahon akka na jahat. Didok si Jeremia ma, ‘Ale Jahowa, poso dope au jala dang malo au makkatai.’ Didok Jahowa ma tu ibana, ‘Unang mabiar ho. Paboaokku do aha na lao sidokkononmu. Jala urupakku do ho.’

Disuru Jahowa ma si Jeremia papunguhon akka malim. Dung i, ikkon didanggurhon ibana do botol na sian tano liat di jolo ni nasida, jala ikkon didok ibana do, ‘Ikkon songon on ma parhancur ni Jerusalem.’ Dung didok si Jeremia songon i, muruk situtu ma akka malim i. Dipukkul sahalak malim na margoar si Pashur ma si Jeremia, dung i dipasung ma ibana. Gabe dang boi bergerak ibana saborngin i. Manogotna i dipalua si Pashur ma ibana. Dung dipalua si Jeremia, didok ibana ma, ‘Dang ulahonokku be on. Dang olo be au marbarita.’ Alai tutu do songon i? Daong. Dipikkiri si Jeremia ma muse hatana i, jala didok ma, ‘Dos songon api do hata ni Jahowa di bagasan rohakku. Ikkon toktong do baritahonokku i.’ Toktong do marbarita si Jeremia.

Dung piga-piga taon, adong ma raja na baru di Juda. Sogo do roha ni akka malim dohot nabi na jahat tu barita na dipasahat si Jeremia. Didokkon nasida ma tu akka pamimpin ni Juda, ‘Ikkon dipamate do bawa on.’ Didok si Jeremia ma, ‘Molo dipamate hamu au, na pamatehon halak na so marsala do hamu. Alana hata ni Jahowa do na hupaboa, dang hatakku.’ Gabe didok akka pamimpin i ma, “Dang patut dipamate bawa on.”

Muruk do akka malim ala sai marbarita si Jeremia. Didok nasida ma tu raja asa dipamate si Jeremia. Didokkon raja i ma asa dibahen nasida lomo ni roha ni nasida tu si Jeremia. Dung i, ditakkup nasida ma si Jeremia jala dipamasuk tu sumur na marlumpur asa mate ibana. Lam leleng, lam bagas ma si Jeremia masuk tu lumpur i.

Sahalak pejabat istana na margoar si Ebedmelek mandok tu raja i, ‘Nungnga didabuhon akka malim i si Jeremia tu sumur! Molo dang tapakaluar ibana sian i, mate nama ibana.’ Didok raja i ma tu si Ebedmelek asa disuru 30 bawa manarik si Jeremia sian sumur i. Olo do hamu maniru si Jeremia na toktong marbarita nang pe adong na mangorai?