Diajarhon si Esra ma Patik ni Debata

Hira-hira 70 taon dung dipaloas halak Israel mulak tu Jerusalem, adong dope halak Israel na tinggal di Persia. Sahalak sian nasida, i ma Malim Esra na mangajarhon Patik ni Jahowa. Tikki diboto ibana na so diihutton halak na di Jerusalem Patik ni Debata, naeng lao ma ibana tu Jerusalem mangurupi nasida. Tikki i, Raja Artasasta do na berkuasa di Persia. Didok ma tu si Esra, ‘Dibahen Debata do ho marbisuk, jala boi mangajarhon Patikna. Lao ma ho, boan ma donganmu.’ Marpungu ma si Esra dohot akka halak na naeng lao tu Jerusalem. Martangiang ma nasida asa dijaga Jahowa saleleng di pardalanan. Dung i borhat ma nasida.

Dung opat bulan, sahat ma nasida di Jerusalem. Didok akka pamimpin na disi ma tu si Esra, ‘Dang dioloi halak Israel be Jahowa. Menikah do nasida tu borua na so manomba Jahowa.’ Aha do na diulahon si Esra? Martangiang ma si Esra di jolo ni godang halak, didok ma, ‘Ale Jahowa, nungnga godang na dilehon Ho tu hami, alai mardosa dope hami tu Ho.’ Gabe muba ma nasida. Alai, ikkon diurupi dope nasida mangulahon na denggan. Alani i, dipillit si Esra ma akka pamimpin dohot hakim lao menangani masalah i. Dung tolu bulan ditangani, diusir ma akka halak na so olo manomba Jahowa.

Sappulu dua taon dukkon i, sae ma dipajongjong tembok ni Jerusalem. Dipapungu si Esra ma akka halak di tano lapang lao manangihon ibana manjaha Patik ni Debata. Tikki dibukka si Esra bukku Patik i, jongjong ma akka halak. Tikki dipuji si Esra Jahowa, dohot do akka halak na jongjong i mamuji Jahowa huhut mangangkat tanganna. Dung i, dijahahon si Esra ma Patik ni Jahowa jala dipatorang ma artina. Denggan do i ditangihon nasida, gabe diboto ma naung mardosa nasida. Gabe tangis ma nasida. Marsogotna i, dijahahon si Esra ma muse Patik ni Debata tu nasida. Diboto nasida ma, ikkon dirayahon do Perayaan Pondok Daun satokkin nai. Jadi pittor dibahen nasida ma akka na porlu tu perayaan i.

Pitu ari ma lelengna Perayaan Pondok Daun i. Las do roha ni halak Israel jala dipuji ma Jahowa ala denggan do hasil panen ni nasida. Mulai sian jaman ni si Josua, dang hea dirayahon nasida perayaan na songon i. Dung sae perayaan i, marpungu ma akka halak lao martangiang. Didok ma, ‘Ale Jahowa, diselamatton Ho do hami. Diboan Ho do hami kaluar sian Mesir, dilehon Ho do hami mangan di padang gurun, jala dilehon Ho do tano na denggan on tu hami. Alai jotjot do hami mangalo Ho. Dang olo hami manangihon akka nabi na disuru Ho pasingotton hami. Alai sai sabar do Ho. Diingot Ho do janjim tu si Abraham. Saonari, marjanji ma hami lao mangoloi Ho.’ Disuratton nasida ma janji i, jala disegel akka pejabat, halak Lepi, dohot akka malim ma i.