Tembok ni Jerusalem

Di tikki ni si Esra, adong sahalak bawa na margoar si Nehemia tinggal di kota Susan na di Persia. Pelayan ni Raja Artasasta do ibana. Di sada tikki, ro ma sahalak keluarga ni si Nehemia sian Juda. Didok ma, ‘Dang aman akka halak na mulak tu Jerusalem i. Alana, dang dipadenggan dope tembok naung hancur i.’ Gabe lungun ma roha ni si Nehemia. Martangiang ma ibana asa dipaloas raja ibana mulak tu Jerusalem lao mangurupi akka halak na disi.

Di sada tikki, marsak ma si Nehemia diida raja. Didok raja ma tu ibana, ‘Songon na murhing bohim. Dang hea huida ho songon on. Aha na masa?’ Didok si Nehemia ma, ‘Lungun rohakku ala dang dipadenggan dope tembok ni hutakku na adong di Jerusalem.’ Disukkun raja ma, ‘Aha na boi huurupi?’ Martangiang ma si Nehemia di bagasan rohana. Dung i didok ma, ‘Loas ma au mulak tu Jerusalem padenggatton tembokna.’ Diloas ma ibana lao, jala disuru ma asa adong na manjaga ibana saleleng di pardalanan. Dibahen raja i ma ibana gabe gubernur ni Juda, jala dilehon ma akka hau tu ibana lao mambahen gerbang ni kota i.

Dung sahat si Nehemia di Jerusalem, dipareso ma tembok ni kota i. Dipapungu ma akka malim dohot akka pamimpin. Didok ma tu nasida, ‘Sega hian do tembok i. Ikkon tapadenggan do i.’ Dung i dipadenggan nasida ma tembok i.

Alai sai diejek akka musuna do halak Israel. Didok ma, ‘Holan nakkok pe serigala tu tembokmuna i, sega do i.’ Alai dang olo halak Israel manangihon i. Torus do nasida karejo. Lam timbo jala lam kuat ma tembok i.

Dung i, berencana ma akka musu i naeng menyerang Jerusalem. Tikki diboto halak Israel rencana ni musu i, gabe mabiar ma nasida. Alai didok si Nehemia ma, ‘Unang mabiar hamu. Didongani Jahowa do hita.’ Dung i, disuru si Nehemia ma asa adong halak na manjaga akka parkarejo na mambangun tembok i. Alani i, dang boi be akka musu ni nasida mangganggu.

Ujungna sae ma tembok i dohot gerbangna holan di bagasan 52 ari. Diajak si Nehemia ma sude halak Lepi tu Jerusalem lao mangaresmihon tembok i. Sude halak mangalehon persembahan tu Jahowa jala marlas ni roha. Dibahen si Nehemia ma dua punguan ni parende. Sada sian punguan i rap dohot si Esra. Jala sada punguan nai rap dohot si Nehemia. Dung i, nakkok ma nasida tu tembok i. Mardalan ma nasida makkalilingi kota i huhut marende. Na sada punguan tu kanan jala na sada nai tu kiri sahat tu na pajuppang nasida di bagas joro. Tarbege do soara ni nasida sahat tu na dao.