Malaikat Gabriel Manjuppangi si Maria

Adong ma keluarga ni si Elisabet na margoar si Maria, tinggal di Nasaret na di Galilea do ibana. Nungnga naeng menikah ibana dohot sahalak tukkang hau na margoar si Josep. Dung onom bulan si Elisabet hamil, ro ma malaikat Gabriel manjuppangi si Maria. Didok ma, ‘Horas ma di ho Maria! Massai las do roha ni Debata mangida ho.’ Dang diattusi si Maria lapatan ni hata i. Didok si Gabriel ma muse, ‘Na lao hamil ma ho, jala tubuhononmu ma sada anak. Bahen ma goarna Jesus. Na lao gabe Raja do ibana, jala sahat tu saleleng ni lelengna do Harajaonna.’

Didok si Maria ma, ‘Dang mungkin hamil au. Ai dang menikah dope au.’ Alai didok si Gabriel ma, ‘Dang adong na so tarbahen ni Jahowa. Lao tubuhononmu ma anak marhite-hite tondi parbadia. Si Elisabet keluargami pe hamil do saonari.’ Dung i didok si Maria ma, ‘Naposo ni Jahowa do au. Saut ma na didokmi.’

Dung i, lao ma si Maria manjuppangi si Elisabet. Tikki didok si Maria ‘Horas!’ tu si Elisabet, gogo ma bergerak poso-poso na di butuha ni si Elisabet. Dung i, mandapot tondi parbadia ma si Elisabet jala didok ma, ‘Maria, lomo do roha ni Jahowa mangida ho. Sada hasangapon do ro omak ni Messias tu jabukku.’ Didok si Maria ma, ‘Hupuji ma Jahowa sian nasa rohakku.’ Disi ma si Maria tinggal saleleng tolu bulan. Dung i, mulak ma ibana tu jabuna di Nasaret.

Dung diboto si Josep na hamil si Maria, naeng dibatalhon ibana ma pertunanganna dohot si Maria. Alai ro ma malaikat tu nipi ni si Josep, didok ma, ‘Menikah ma ho tu si Maria. Unang mabiar ho. Dang adong diulahon ibana na sala.’ Dung i, menikah ma si Josep dohot si Maria.