Tikki Dakdanak Jesus

Di Nasaret do tinggal si Josep, si Maria, rap dohot akka gellengna. Tukkang hau do ibana. Diajarhon ibana do tu akka gellengna taringot Jahowa dohot Patik. Ringgas do nasida tu sinagoga lao manomba Jahowa. Tiap taon, lao do nasida tu Jerusalem lao mangarayahon Paska.

Tikki marumur 12 taon Jesus, lao ma nasida sakeluarga tu Jerusalem. Godang do halak na ro tusi lao mangarayahon Paska. Dung sae Paska, mulak ma si Josep dohot si Maria. Dirippu nasida, rap do Jesus mulak dohot rombongan ni nasida. Alai tikki dilului nasida Jesus di rombongan i, dang adong ibana.

Gabe mulak ma muse nasida tu Jerusalem. Dilului nasida ma Jesus saleleng tolu ari. Dung i, lao ma nasida tu bagas joro. Diida nasida ma hundul Jesus di tonga-tonga ni akka guru agama. Ditangihon Jesus do nasida jala godang do sukkun-sukkunna tu nasida. Kagum do akka guru i mangida Jesus. Gabe disukkun nasida ma tong Jesus. Heran do nasida mambege alus ni Jesus. Alana, diattusi Jesus do akka Patik ni Jahowa.

Khawatir hian do si Josep dohot si Maria. Alani i, gabe didok si Maria ma, ‘Sian dia do ho amang? Nungnga dilului hami ho tu sude inganan.’ Didok Jesus ma, ‘Na so diboto hamu do na ikkon di jabu ni Bapakku au?’

Dung i, mulak ma Jesus rap dohot natua-tuana tu Nasaret. Diajari si Josep do Jesus martukkang. Lam balga ma Jesus jala lam malo ma ibana. Lomo do roha ni Debata dohot akka halak tu ibana. Menurutmu, songon dia do sifat ni Jesus tikki dakdanak?