Torus do Marbarita Akka Murid ni Jesus

Adong ma sahalak bawa na lumpu na sai mangido-ido di gerbang ni bagas joro. Tikki botari, diida ibana ma si Petrus dohot si Johannes. Ninna ma, ‘Asi ma rohamuna, lehon hamu ma di au manang aha pe taho.’ Didok si Petrus ma, ‘Adong do na naeng lehononnami tu ho, alai dang hepeng. Di bagasan goar ni Jesus, mardalan ma ho!’ Ditogu si Petrus ma ibana asa jongjong. Gabe boi ma mardalan bawa i! Las ma roha ni akka na mangida i. Gabe porsea ma nasida jala gabe murid ni Jesus.

Alai muruk ma akka malim dohot halak Saduse. Diboan ma akka apostel i tu pengadilan ni halak Jahudi. Didok ma, ‘Marhite huaso ni ise do dipamalum hamu bawa i?’ Dialusi si Petrus ma, ‘Huaso sian Jesus Kristus do na dipakke hami. Ibana ma halak na dipamate hamu.’ Gogo ma didok akka pamimpin agama i, ‘Unang be dok hamu goar ni Jesus!’ Alai didok akka murid i ma, ‘Dang adong na boi mangorai hami paboahon taringot Jesus.’

Dung bebas si Petrus dohot si Johannes, didapotton nasida ma murid na asing. Dipaboa nasida ma aha na masa. Dung i martangiang ma nasida jala didok ma, ‘Urupi ma hami asa barani marbarita.’ Dilehon Jahowa ma tu nasida tondi parbadia. Torus ma nasida marbarita dohot pamaluppon na marsahit. Ujungna, lam godang ma na gabe murid ni Jesus. Ditakkup halak Saduse ma akka apostel jala dipenjarahon ala cemburu nasida. Alai di borngin i, disuru Jahowa ma sada malaikat mambukka pintu ni penjara i. Didok malaikat i ma, ‘Hatop, lao ma hamu tu bagas joro jala mangajari ma hamu disi.’

Marsogotna i, adong ma na mandok tu akka pamimpin agama, ‘Tarkucci do penjara i, alai dang disi be akka bawa i! Nungnga mangajari nasida di bagas joro!’ Ujungna, ditakkup ma muse akka murid i jala diboan tu pengadilan ni halak Jahudi. Didok sintua ni malim ma, ‘Kan nungnga disuru hami asa unang didok hamu be goar ni Jesus?’ Dialusi si Petrus ma, ‘Ikkon Debata do dioloi hami, dang jolma.’

Muruk hian ma akka pamimpin agama i jala naeng dibunu ma akka murid i. Alai adong ma sahalak Parise na margoar si Gamaliel mandok, ‘Hati-hati hamu! Debata do ra na mandongani nasida. So tung gabe dialo hamu Debata.’ Dibege akka pamimpin agama i do hata ni si Gamaliel. Gabe dibebasson ma akka murid i, jala disuru asa unang marbarita be nasida. Alai torus do nasida marbarita. Barani do nasida paboahon barita na uli di bagas joro dohot sian jabu tu jabu.