Godang na Gabe Halak Kristen

Dioloi akka muridna do paretta ni Jesus. Marbarita na uli do nasida tu sude luat di portibi on. Taon 47 M, disuru akka dongan di Antiokia ma si Paulus dohot si Barnabas marbarita tu godang inganan. Semangat do nasida marbarita tu Asia Kecil (saonari Turkiye) songon tu Derbe, tu Listra, dohot tu Ikonium.

Marbarita do si Paulus dohot si Barnabas tu sude halak. Godang do na olo manangihon barita taringot Kristus. Tikki i, marbarita ma si Paulus dohot si Barnabas tu gubernur ni Siprus na margoar si Sergius Paulus. Alai adong ma tukkang sihir na mangorai nasida. Didok si Paulus ma tu ibana, ‘Dihukum Jahowa nama ho.’ Gabe buta ma tukkang sihir i. Alani na masa i, gabe porsea ma gubernur i tu Kristus.

Marbarita do si Paulus dohot si Barnabas manang didia pe. Marbarita do nasida sian jabu tu jabu, di pasar, di dalan, dohot di sinagoga. Tikki di Listra, dipamalum si Paulus dohot si Barnabas do sahalak bawa na pincang. Ala dirippu akka halak nasida debata, gabe naeng disomba ma nasida. Alai didok nasida ma, ‘Holan Debata do na ikkon sombaonmuna! Jolma do hami!’ Dung i, adong ma piga-piga halak Jahudi na ro jala mandok hata na so tutu taringot si Paulus. Gabe dilempari nasida ma si Paulus, disarat ma ibana tu luar ni kota, jala ditinggalhon ma ibana ala dirippu naung mate. Hape, mangolu dope ibana! Alani i, ro ma akka dongan mangurupi ibana jala diboan ma tu kota. Di pudian ni ari, mulak ma si Paulus tu Antiokia.

Taon 49 M, lao ma muse si Paulus marbarita tu inganan na asing. Dung pajuppang ibana dohot akka dongan na di Asia Kecil, lao ma ibana tu Eropa. Lao do muse ibana tu Atena, Epesus, Pilippi, Tessalonik, dohot tu inganan na asing. Dohot do si Silas, si Lukas, dohot si Timoteus. Dibahen nasida ma huria disi jala dipatogu ma akka dongan. Di Korint ma si Paulus tinggal jala disi ma ibana sada satonga taon. Diurupi ibana ma akka dongan di huria i asa togu. Lao do ibana marbarita, mangajari, jala dibahen ibana do surat tu akka huria. Mambahen tenda do tong karejo ni si Paulus. Dung i, mulak ma muse si Paulus tu Antiokia.

Taon 52 M, lao ma muse si Paulus tu Asia Kecil. Nungnga tolu hali ibana tusi. Lao ma ibana tu Pilippi dohot tu Korint. Tinggal ma si Paulus di Epesus saleleng piga-piga taon. Mangajari do ibana disi, pamaluppon na marsahit, jala mangurupi huria asa lam togu. Marjamita do ibana ganup ari di aula ni sikkola. Gabe godang ma na manangihon ibana jala muba. Dung marbarita ibana di godang inganan, mulak ma ibana tu Jerusalem.