Sahalak Panjaga Penjara Mananda Jahowa

Di Pilippi, adong ma sahalak borua na gabe budak dirasuki malaikat na jahat. Jala dibahen malaikat na jahat i do borua i boi meramal. Gabe godang ma dapot ni tuanna hepeng alani ulaonna i. Tikki ro si Paulus dohot si Silas tu Pilippi, diihutton borua i ma nasida saleleng piga-piga ari. Dibahen malaikat na jahat i ma borua i marsurak, ‘Ai akka naposo ni Debata Natumimbul i do halak on.’ Ujungna, didok si Paulus ma tu malaikat na jahat i, ‘Marhite goar ni Jesus, kaluar ma ho sian ibana!’ Gabe kaluar ma malaikat na jahat i sian borua i.

Ala dang boi be borua i meramal, gabe muruk ma tuanna. Disarat ma si Paulus dohot si Silas tu pengadilan. Didok ma, ‘Melanggar hukum do akka bawa on jala digugai do akka halak na di kota!’ Disuru pejabat pengadilan i ma asa dipukkuli jala dipenjarahon si Paulus dohot si Silas. Dibahen ma nasida di penjara na massai golap. Dung i, diratte ma pat ni nasida.

Tikki na di penjara i, dibege akka tahanan na asing ma si Paulus dohot si Silas marende mamuji Jahowa. Di tonga borngin, toppu ma ro gempa na gogo makkutur penjara i. Masuk ma panjaga penjara i, jala diida ibana ma nungnga tarbukka sude pintu ni penjara i. Tarsonggot ma ibana, dibuat ibana ma podangna naeng bunu diri, ala dirippu ibana nungnga lari sude akka tahanan i.

Gogo ma didok si Paulus, ‘Unang bunu diri ho! Dison do hami sude!’ Gabe berlutut ma ibana di jolo ni si Paulus dohot si Silas. Disukkun panjaga i ma, “Aha do sibahenokku asa diselamatton Debata au?” Didok nasida ma, ‘Ikkon porsea do ho dohot keluargam tu Jesus.’ Diajarhon si Paulus dohot si Silas ma tu nasida hata ni Jahowa. Dung i, tardidi ma panjaga penjara i dohot keluargana.