Si Paulus Dohot si Timoteus

Sahalak na poso na di huria Listra do si Timoteus. Bapakna halak Junani jala omakna halak Jahudi. Goar ni omakna si Eunike, goar ni oppung boruna si Lois. Sian dakdanak, nungnga diajari omakna dohot oppungna ibana taringot Jahowa.

Ro ma si Paulus tu kota Listra tikki pardalananna na paduahalihon. Diida ibana ma na holong do roha ni si Timoteus tu akka dongan di huria, jala las rohana mangurupi nasida. Alani i, ditogihon si Paulus ma si Timoteus asa rap dohot ibana. Diajari si Paulus ma si Timoteus asa malo marbarita na uli dohot mangajari.

Diurupi tondi parbadia do si Paulus dohot si Timoteus manang tudia pe nasida lao. Di sada tikki, mandapot penglihatan ma si Paulus. Diida ibana ma sahalak bawa manogihon ibana tu kota Makedonia. Alani i lao ma si Paulus, si Timoteus, si Silas, dohot si Lukas tusi. Marbarita ma nasida jala dibahen ma huria disi.

Di Makedonia, adong do kota na margoar Tessalonik. Godang do disi na gabe halak Kristen. Alai adong ma halak Jahudi na sogo rohana tu si Paulus dohot tu akka donganna. Dipapungu halak Jahudi i ma akka jolma, jala diseret nasida ma si Paulus dohot akka donganna i tu jolo ni pamaretta di kota i. Didok nasida ma, ‘Musu ni pamaretta ni Rom do akka bawa on!’ Boi do gabe mate si Paulus dohot si Timoteus molo toktong nasida disi. Alani i di tikki borngin, lao ma nasida tu Berea.

Lomo do roha ni halak Berea mambege barita na uli. Godang do halak Junani dohot halak Jahudi na disi gabe porsea tu Jahowa. Alai ro ma halak Jahudi sian Tessalonik naeng manggugai nasida. Gabe lao ma si Paulus tu Atena. Tinggal do si Silas dohot si Timoteus di Berea lao patoguhon akka dongan na disi. Di pudian ni ari, disuru si Paulus ma muse si Timoteus tu Tessalonik lao patoguhon akka dongan na dianiaya. Dung i, disuru ma muse si Timoteus tu huria na asing lao patoguhon akka dongan.

Didok si Paulus ma tu si Timoteus, ‘Lao dianiaya do akka halak na manomba Jahowa.’ Hea do si Timoteus dianiaya jala dipenjarahon alani haporseaonna. Alai las do rohana ala boi patuduhon na setia ibana tu Jahowa.

Didok si Paulus ma tu huria na di Pilippi, ‘Husuru do si Timoteus ro mangajari hamu asa toktong manomba Jahowa, jala mangajari hamu asa malo marbarita.’ Pos do roha ni si Paulus tu si Timoteus. Saleleng martaon-taon rap do nasida marbarita.