Surat sian Punguan Na Mangaradoti Organisasi

Akka Dongan na Makkaholongi Jahowa:

Taon 1971, massai las do roha ni godang halak na ro tu Kebaktian Distrik “Nama Ilahi”. Di kebaktian i godang do bukku na dirilis. “Dao do dumenggan bukku i sian na boi tabayakkon.” Taringot bukkutta na dirilis, adong do na mandok, “Dang hea dope dapotta bukku sisongon on. Nungnga boi be taboto akka na masa di ari na naeng ro.” Bukku na dia do maksudna? Bukku “Botoon ni Akka Bangso ma na Au do Jahowa”​—Songon dia? (“The Nations Shall Know That I Am Jehovah”​—How?) Aha do na mambahen bukku on massai denggan? Bukku on marisi hatorangan na terbaru taringot surirang ni si Hesekiel. Jala surirang i adong kaitanna tu akka jolma di ari na naeng ro.

Marpulu taon dung dirilis bukku i, tamba godang ma naposo ni Debata. Hira-hira 1,5 juta hian, gabe lobi sian 8 juta. (Jes. 60:22) Adong lobi sian 900 bahasa dipakke nasida. (Sak. 8:23) Godang do sian nasida dang hea dope mamparsiajari bukku na khusus patorakkon taringot surirang ni si Hesekiel.

Dos songon mataniari do hasittongan na sian Bibel na lam tiur sahat tu tonga ari. Mulai taon 1971 sahat tu saonari, godang do hasittongan na lam takkas dipatorang. (Poda 4:18) Taon 1985 takkas ma taboto songon dia akka “biru-biru na asing” boi didok ale-ale ni Debata. (Joh. 10:16; Rom 5:18; Jak. 2:23) Taon 1995, boi ma taattusi saleleng “hasusaan bolon” do diuhumi ise na gabe “biru-biru” jala ise na gabe “hambing”. (Mat. 24:21; 25:31, 32) Sude hatorangan on balga do pengaruhna tu pangattusiotta taringot bukku Hesekiel.

Piga-piga taon na parpudi on, lam takkas ma taboto hasittongan i. Umpamana, lam godang do parsiajaran na boi tadapot sian tudosan ni Jesus. Godang do hatorangan na mambahen lam takkas tudosan i di pikkiranta, jala hona tu rohatta. Piga-piga sian tudosan i manggombarhon aha na lao masa saleleng hasusaan bolon. Dos songon i ma nang piga-piga surirang na di bukku Hesekiel, nungnga disesuaihon be. Songon surirang taringot Gog na sian Magog (bindu 38 dohot 39), bawa na mamboan inganan ni alat tulis ni sekretaris (bindu 9), holi-holi naung koring na adong di rura dohot dua tukkot na dipasada (bindu 37). Sude hatorangan na disesuaihon taringot surirang on manggatti hatorangan na disurat di bukku na dirilis taon 1971.

Alani i, godang do naposo ni Jahowa na mandok, “Andigan do hita mandapot bukku na marisi hatorangan na terbaru taringot surirang ni si Hesekiel on?” Saonari, on ma bukku na dipaima-ima hamu, judulna Ibadat na Sittong tu Jahowa​—Ujungna Dipadenggan! Molo dung dijaha hamu 22 pasal sian bukku i, jala dirimangi hamu akka gambar na disi, pasti longang do rohamuna tu riset na dibahen lao paradehon bukku on. Martangiang do hami tu Jahowa asa diurupi mangattusi aha alasanna paradehon bukku ni si Hesekiel na luar biasa on. Godang do sukkun-sukkun na dipikirhon hami. Misalna, aha do parsiajaranna tu akka halak na di tikki ni si Hesekiel dohot di tikkinta on? Surirang na dia do na lao saut muse di ari na naeng ro? Porlu do dilului hami lapatan ni setiap rincian na di surirang ni si Hesekiel on? Alus ni akka sukkun-sukkun on mambahen hita lam mangattusi jala lam mangargai bukku ni si Hesekiel.

Molo dung dijaha hamu bukku Hesekiel bindu 1 sahat tu na parpudi, pasti longang do rohamuna mamboto bagian organisasi ni Jahowa na di surgo. Pasti luar biasa do dihilala hamu mamboto standar ni Jahowa na timbo na ditottuhon Ibana tu akka toppaanna na di surgo dohot di tano on. Marhite bukku Ibadat na Sittong, diurupi ma hamu mangargai aha naung diulahon Jahowa, dohot aha na lao diulahon Ibana satokkin nai tu naposona. Adong dua bagian na mulak-hulak dipaboa di bukku on. Na parjolo, lao mambahen las roha ni Jahowa, ikkon tatanda jala ikkon taakkui do molo Ibana Debata na tama marhuaso di alam semesta on. Na paduahon, molo naeng tasomba Jahowa, ikkon taihutton do cara na ditottuhon Ibana jala ikkon tasesuaihon do pangalahotta tu standarna.

Sai anggiat ma bukku on boi patoguhon rohamuna lao manomba Jahowa marhite cara na sittong, asa boi dipasangap goarna na badia i. Sai anggiat ma bukku on mangurupi hamu sabar paimahon andigan tikkina dibahen Jahowa sude bangso mamboto ise Ibana.​—Hes. 36:23; 38:23.

Sai anggiat ma dipasu-pasu Jahowa, Bapakta parholong i sude upaya na dibahen hamu lao mangattusi bukku Hesekiel on.