Boasa Ikkon Unduk Istri tu Suamina?
“Ulu ni borua i ma bawa.”—1 KOR. 11:3.
1, 2. (a) Aha do na disuru Jahowa asa disurat si Paulus taringot ise na gabe kepala? (b) Sukkun-sukkun aha do na lao tabahas di artikel on?
DISURU Jahowa do Apostel Paulus manurat, “ulu ni ganup bawa i ma Kristus” jala “ulu ni Kristus i ma Debata”. (1 Kor. 11:3) Di artikel sebelumna nungnga tabahas olo do Jesus unduk tu Debata Jahowa na gabe ulu di ibana. Burju do Jesus tu akka halak, lambok rohana, parasi roha, jala dang holan dirina na dipikkiri. Ala Kristus do na gabe ulu ni sude bawa, songon i ma nian na dibahen akka bawa na di huria tu halak na asing, tarlumobi tu istrina.
2 Boha molo akka borua? Ise do na gabe ulu di nasida? Didok Apostel Paulus do, “Ulu ni borua i ma bawa.” Boha do pandangan ni akka borua tu prinsip on? Marlakku dope prinsip on molo dang sahaporseaon suami ni sahalak borua? Ala bawa do na gabe ulu di akka borua, ikkon sip do torus borua jala dang boi mangalehon saran? Aha do na ikkon diulahon sahalak borua asa boi ibana gabe istri sipujion?
“Hubahen ma Sasahalak na Boi Gabe Donganna”
3, 4. Aha do manfaatna molo diihutton suami dohot istri petunjuk naung ditottuhon Jahowa?
3 Jahowa do na manottuhon ise na gabe kepala. Dung ditoppa Ibana si Adam, didok Jahowa do muse, “Dang denggan molo sai sahalak ni bawa i. Hubahen ma sasahalak na boi gabe donganna jala na boi mangurupi ibana.” Dung adong si Hawa las hian ma roha ni si Adam. Alana gabe adong ma donganna dohot na mangurupi ibana. Alani i ma didok ibana, “On ma ujungna holi-holi na sian holi-holikku. Jala sibuk na sian sibukku.” (1 Mus. 2:18-24) Boi do si Adam dohot si Hawa gabe ompu ni sude jolma na sempurna. Jala boi do nasida mangolu saleleng ni lelengna di paradeiso.
4 Alai dialo si Adam dohot si Hawa do Jahowa jala gabe dang sempurna be hita. (Jaha Rom 5:12.) Nang pe songon i, tetap do marlakku naung ditottuhon Debata taringot ise na gabe kepala. Molo diihutton akka halak naung menikah i, pasti godang do manfaatna tu nasida jala boi do i mambahen nasida marlas ni roha. Gabe boi ma dihilala nasida songon na dihilala Jesus ala unduk tu Bapakna, i ma Jahowa. Sebelum ro Jesus tu tano on, ‘marlas ni roha do ibana di jolo ni Jahowa ganup tikki’. (Poda 8:30) Alai ala dang sempurna be jolma, gabe dang boi be akka bawa gabe kepala keluarga na sempurna. Jala akka borua pe, dang boi sempurna unduk tu suamina. Alai molo berusaha do bawa dohot borua mangihutton petunjuk ni Jahowa i, pasti boi do nasida marlas ni roha di perkawinan ni nasida.
5. Boasa ikkon diingot suami dohot istri nasehat na tarsurat di Rom 12:10?
5 Asa bahagia sada perkawinan, ikkon diterappon nasida do nasehat na marlakku tu sude halak Kristen na mandok, “Haholongi ma na asing songon makkaholongi haha anggim. Jala parjolo ma hamu pasangappon halak na asing.” (Rom 12:10) Jadi ikkon berusaha do suami dohot istri asa ‘burju, marasi ni roha, jala rade manalpuhon hasalaan’ ni pasanganna.—Eps. 4:32.
Molo Dang Sahaporseaon Pasanganmuna
6, 7. Aha do manfaatna molo unduk sahalak istri tu suamina, nang pe dang sahaporseaon ibana tu suamina i?
6 Songon dia ma molo dang manomba Jahowa pasanganmuna? Suami do na lebih sering songon i. Molo songon i situasina, ikkon boha do sikap ni istri tu suamina i? Didok di Bibel, “Songon i ma nang hamu akka istri, unduk ma hamu tu suamimuna. Asa molo adong sian nasida na so mangoloi hata ni Debata, gabe porsea ma nasida tu hata i alani pangalahomuna, so pola didok hamu manang aha. Ai idaon ni nasida ma pangalahomuna na denggan dohot unduk ni rohamuna.”—1 Ptr. 3:1, 2.
7 Didok di Bibel ikkon toktong do unduk istri tu suamina, nang pe dang sahaporseaon ibana tu suamina i. Molo tetap ibana burju tu suamina, olo do gabe penasaran suamina i. Ujungna gabe olo ma suamina i marsiajar Bibel jala gabe dohot manomba Jahowa rap dohot ibana.
8, 9. Aha do na ikkon diulahon sahalak istri molo dang berminat suamina mamboto taringot haporseaonna, hape nga burju ibana tu suamina i?
8 Alai boha ma molo tetap dang berminat suamina mamboto taringot haporseaonna? Didok di Bibel ikkon tetap do dipatuduhon istri sifat na denggan nang pe maol sipata mangulahon i. Misalna molo tajaha di 1 Korint 13:4 didok, “Halak na marholong ni roha i sabar.” Jadi ikkon torus do dipatuduhon istri ‘toruk ni roha, lambok ni roha, dohot hasabaron’. Jala torus ma dipatuduhon holong ni roha tu suamina i. (Eps. 4:2) Boi do tondi parbadia mangalehon gogo asa boi ibana patuduhon akka sifat na denggan nang pe maol situasina.
9 Didok Apostel Paulus do, “Margogo do au di sude na masa, ala dilehon Debata do huaso tu au.” (Plp. 4:13) Boi do tondi parbadia ni Debata mangurupi sahalak istri patuduhon sifat na denggan di situasi na maol. Misalna, molo kasar suamina tu ibana, olo do ra terpancing ibana lao mambalos. Alai didok Bibel do tu sude halak Kristen, “Tikki dibahen sasahalak na jahat tu hamu, unang ma balosson na jahat tu ibana. . . . Ai tarsurat do ‘Au do na marhak mambalos. Balosokku do hajahaton ni nasida,’ ninna Jahowa.’” (Rom 12:17-19) Didok do tong di 1 Tessalonik 5:15, “Manat ma hamu, asa unang adong sian hamu na mambahen na jahat balos ni jahat tu manang ise pe. Alai toktong ma bahen hamu na denggan tu dongan sahaporseaon dohot tu sude halak.” Molo diurupi tondi parbadia ni Debata do hita, pasti boi do taulahon na so tolap hian taulahon. Jadi porlu do hita martangiang tu Jahowa lao mangido tondi parbadiana!
10. Aha do na diulahon Jesus molo adong na mambahen na so denggan tu ibana?
10 Dipatuduhon Jesus do sitiruon na denggan. Didok do di 1 Petrus 2:23, “Tikki dileai ibana, dang dibalos ibana mangaleai. Tikki marsitaonon ibana, dang diancam ibana halak na mambahen sitaonon i. Alai dipasahat do dirina tu Debata na tigor manguhumi.” Taihutton ma sitiruon na dibahen Jesus on. Unang ma tabalos halak na mambahen na jahat tu hita. Songon naung dipaboa tu sude halak Kristen, ikkon tapatudu do serep ni roha dohot asi ni roha. Jala unang ma ‘tabalos na jahat dohot na jahat manang issak-issak dohot issak-issak’.—1 Ptr. 3:8, 9.
Ikkon Sip do Torus Borua?
11. Hak istimewa aha do na dilehon Jahowa tu piga-piga borua?
11 Ala ikkon unduk sahalak borua tu suamina, na disuru Jahowa do asa sip nasida torus? Daong. Dilehon Jahowa do hak istimewa tu bawa dohot tu borua. Misalna, dipillit Jahowa do bawa dohot borua gabe bagian sian 144.000 halak na lao mamaretta rap dohot Jesus di surgo. (Gal. 3:26-29) Jadi takkas ma, adong do dilehon Jahowa tugas ni akka borua di organisasina.
12, 13. Paboa ma contoh na patuduhon dohot do borua dipakke Debata paboahon aha na lao masa.
12 Misalna, najolo dipakke Jahowa do piga-piga borua paboahon aha na lao masa. Didok di Joel 2:28, 29, “Gabe dohot ma akka anak dohot borumuna paboahon janjikku. . . . Gari tu hatobanku bawa dohot tu hatobanku borua pe, usehonokku do tondi parbadiakku tu nasida di tikki i.”
13 Di ari Pentakosta taon 33 M, marpungu ma hira-hira 120 sisean ni Jesus di sada kamar parginjang na di Jerusalem. Termasuk do disi akka borua jala sude do nasida dimiahi tondi parbadia. Alani i gabe ditaringoti si Petrus ma tikki i surirang ni Nabi Joel. Didok si Petrus ma, “Alai hea do didok Panurirang Joel, ‘Di akka ari parpudi’, didok Debata, ‘Usehonokku ma deba tondi parbadiakku tu sude jolma na ro sian marragam bangso. Gabe dohot ma akka anak dohot borumuna paboahon janjikku . . . ; Gari tu akka hatobanku bawa dohot tu hatobanku borua pe, usehonokku do deba tondi parbadiakku di ari i jala paboaon ni nasida ma hata ni Debata.’”—Ul. 2:16-18.
14. Aha do na diulahon akka borua di abad na parjolo lao mambahen asa lam godang halak Kristen?
14 Di abad na parjolo, dohot do tong akka borua mambahen lam godang halak Kristen. Dohot do nasida marbarita na uli jala paradehon akka na porlu tusi. (Luk. 8:1-3) Misalna, didok si Paulus do “si Poibe na mangurupi huria na di Kenkrea”. Jala tikki pasahatton tabe tu dongan sahaporseaonna, termasuk do didok si Paulus goar ni akka borua na setia tu Debata. Misalna, “si Tripena dohot tu si Triposa, i ma akka donganta borua na marhobas tu Tuan i”. Jala dipasahat ibana do tong tabena tu “si Persis donganta borua na tahaholongi, naung marsitutu marhobas tu Tuan i”.—Rom 16:1, 12.
15. Aha do na diulahon akka borua di jaman saonari asa lam godang halak Kristen?
15 Di jaman saonari, nungnga lobi sian pitu juta parbarita na uli di liat portibi on. Jala godangan do sian nasida borua. (Mat. 24:14) Godang do sian nasida na gabe perintis, missionaris, dohot keluarga Betel. Najolo nungnga didok si Daud hian, “Dilehon Jahowa do paretta tu bangsona. Akka borua na paboahon barita na uli dos songon tentara na godang.” (Ps. 68:11) Jala memang toho do hatana i. Diargai Jahowa do sude naung diulahon akka borua di ulaon marbarita dohot di akka ulaon organisasina. Jadi nang pe didok ikkon unduk istri tu suamina, on dang patuduhon ikkon sip nasida torus.
Dua Borua na Barani Bertindak
16, 17. Aha do na diulahon si Sara na patuduhon boi do istri mangalehon saran tu suamina?
16 Molo dilehon Jahowa do hak istimewa tu akka borua, berarti porlu do disukkun suami pandapot ni istrina sebelum mambahen keputusan na balga. Marbisuk do nasida molo songon i dibahen nasida. Adong do piga-piga borua na dipaboa di Bibel na barani bertindak manang barani makkatai, nang pe dang disukkun suamina pandapotna. Taida ma dua contohna.
17 Barani do si Sara mandok tu si Abraham, asa dipalao istrina na paduahon dohot anakna. Alana dang diargai nasida si Sara dohot si Isak anakna. Dang lomo roha ni si Abraham mambege hata ni si Sara i. Alai molo Jahowa, dang songon i. Didok Jahowa ma tu si Abraham, “Unang pola sogo roham tu si Sara alani hatana i taringot tu anakmi dohot hatoban borua i. Tangihon ma ibana.” (1 Mus. 21:8-12) Ditangihon si Abraham ma hata ni Jahowa jala dioloi ma pangidoan ni si Sara.
18. Aha do na dibahen si Abigail di na so pamotoan ni suamina?
18 Taparrohahon ma muse taringot si Abigail, istri ni si Nabal. Tikki melarikan diri si Daud ala late roha ni Raja Saul tu ibana, markemah di jonok ni inganan parmahanan ni si Nabal do ibana. Dang hea dibuat ibana dohot tentarana biru-biru ni si Nabal. Gariada dijaga nasida do i. Alai jahat do si Nabal jala “kasar makkatai”. Halak “na so hasea” do ibana jala “na oto”. Tikki lao tentara ni si Daud mangido saotik sipanganon tu si Nabal, dang olo ibana mangalehon. Jala “disonggaki” ibana do akka tentara ni si Daud. Dung dibege si Abigail na masa i, aha ma na diulahon ibana? Di na so pamotoan ni si Nabal, “hatop ma dibuat si Abigail 200 roti, dua gucci na balga na marisi anggur, lima biru-biru naung rade lao diloppa, hira-hira 35 liter gandum na disaok, 100 kue kismis, dohot 200 kue ara” jala dilehon ma i tu si Daud dohot tu akka tentarana. Denggan do na dibahen si Abigail i? Didok Bibel do, “Dibahen Jahowa ma mate si Nabal.” Di pudian ni ari dibahen si Daud ma si Abigail gabe istrina.—1 Sam. 25:3, 14-19, 23-25, 38-42.
Borua Sipujion
19, 20. Aha do na mambahen sahalak borua gabe sipujion?
19 Di Bibel, dipuji do istri na bertindak mangihutton cara ni Jahowa. Di bukku Poda, dipuji do “istri na burju” jala didok do muse, “Dao do i ummarga sian koral. Pos do roha ni suamina tu ibana, jala dang hurangan manang aha suamina i. Saleleng mangolu ibana, dibahen ibana do akka na denggan tu suamina, dang akka na jahat.” Asing ni i, “Marbisuk do ibana tikki makkatai, jala toktong do burju ibana tikki mangajar-ajari. Diparrohahon ibana do akka ulaon ni rumah tanggana, jala dang hea malas ibana. Jongjong do akka anakna jala didok nasida do ibana marlas ni roha. Jongjong do suamina jala dipuji do ibana.”—Poda 31:10-12, 26-28.
20 Aha do na mambahen sahalak istri gabe sipujion? Didok di Poda 31:30, “Boi do tartipu halak alani rupa na bagak, jala parsatokkinan do haulion i. Alai na lao dipuji do borua na makkabiari Jahowa.” Molo dihabiari sahalak borua Jahowa, pasti olo do ibana mangihutton aturan ni Jahowa taringot ise na gabe kepala. Alana nungnga didok di Bibel, “Ulu ni borua i ma bawa.” Dos do i songon, “ulu ni ganup bawa i ma Kristus”, jala “ulu ni Kristus i ma Debata”.—1 Kor. 11:3.
Mandok Mauliate Alani Silehon-lehon ni Debata
21, 22. (a) Aha do na boi dihamauliatehon halak Kristen naung menikah tu Jahowa? (b) Boasa ikkon taargai petunjuk ni Jahowa taringot ise na gabe kepala? (Ida kotak)
21 Godang do na boi dihamauliatehon halak Kristen naung menikah tu Debata. Alana boi ma nasida rap marlas ni roha dohot pasanganna jala rap manomba Jahowa. (Rut 1:9; Mik. 6:8) Ala Jahowa do na mambahen makana adong perkawinan, jadi pasti diboto Ibana do aha na boi mambahen bahagia perkawinan i. Jadi ihutton ma petunjuk ni Jahowa. Dung i lehonon ni Jahowa ma “las ni roha na mambahen hamu togu”, nang pe godang masalah di portibi on.—Neh. 8:10.
22 Molo dihaholongi suami do istrina songon dirina sandiri, pasti lambok ma ibana jala pengertian. Jala molo diargai jala diurupi istri do suamina, pasti dihaholongi suamina ma ibana. Na paling penting, gabe sitiruon ma perkawinan ni nasida jala parohon sangap ma i tu Jahowa.
Diingot Hamu do?
• Songon dia do petunjuk ni Jahowa taringot ise na gabe kepala?
• Boasa ikkon masipasangapan suami dohot istri?
• Ikkon boha do sikap ni istri tu suamina na so sahaporseaon tu ibana?
• Boasa ikkon jolo disukkun suami pandapot ni istrina sebelum mambahen keputusan na balga?
[Kotak]
Boasa Ikkon Taargai Akka na Marhuaso?
Nungnga ditetappon Jahowa akka ise na lao gabe kepala di sude toppaanna. Godang do manfaat ni on tu sude suru-suruan dohot tu akka jolma. Molo diihutton nasida petunjuk ni Jahowa i, boi ma nasida gabe marsada jala parohon sangap do i tu Jahowa.—Ps. 133:1.
Diakkui halak Kristen na dimiahi tondi parbadia do Jesus Kristus na gabe ulu di nasida. (Eps. 1:22, 23) Jesus Kristus pe, diakkui ibana do Jahowa na gabe ulu di ibana. Jala di ujungna, “Anak i sandiri pe patundukonna do dirina tu Debata. Ai Debata do na mambahen sude tunduk tu ibana. Marhite songon i, gabe holan Debata ma na mangarajai sasudena”. (1 Kor. 15:27, 28) Jadi ikkon diihutton jolma do petunjuk ni Jahowa taringot ise na gabe kepala di huria dohot di keluarga! (1 Kor. 11:3; Heb. 13:17) Molo taihutton petunjuk i, gabe las ma roha ni Jahowa tu hita jala dipasu-pasu Ibana ma hita.—Jes. 48:17.
[Gambar]
Boi do tangiang mangurupi sahalak istri asa boi patuduhon sifat na denggan
[Gambar]
Diargai Jahowa do sude na diulahon akka borua tu organisasina