Aha na Masa di Taman Eden Adong do Hubunganna tu Hamu
PIGA-PIGA pakar mandok dang adong cerita taringot Taman Eden dipaboa di ayat na asing di Bibel. Alani i ma, dang porsea nasida tu cerita taringot Taman Eden i. Misalna adong sahalak profesor na meneliti taringot agama na margoar si Paul Morris. Didok ibana do, “Dang hea dipaboa taringot Taman Eden di akka ayat na asing di Bibel.” Jala godang do akka pakar na setuju tu pandapot ni profesor i.
Alai dang songon i sebenarna. Justru godang do ayat ni Bibel na paboahon taringot Taman Eden, si Adam, si Hawa, dohot ulok i.a Jadi dang toho hata ni akka pakar i. Alai umparah dope na dibahen akka pamimpin agama dohot akka halak na so marlomo ni roha tu Bibel. Diparoa-roa nasida do hatorangan di bukku 1 Musa taringot Taman Eden. Secara tidak langsung on patuduhon naeng diparoa-roa nasida do sude isi ni Bibel. Boasa boi didok songon i?
Ikkon taattusi do taringot na masa di Taman Eden asa boi taattusi bagian na asing na adong di Bibel. Contohna holan di Bibel do boi tadapot alus ni sukkun-sukkun na massai rikkot. Jala sude alusna i, sai adong do kaitanna tu na masa di Taman Eden. Taida ma akka sukkun-sukkun i.
● Boasa gabe matua jala mate hita? Sebenarna boi do si Adam dohot si Hawa mangolu saleleng ni lelengna molo dioloi nasida Jahowa. Alai ala dialo nasida Debata, gabe mardosa ma nasida. Dung i, gabe matua ma nasida jala mate. (1 Musa 2:16, 17; 3:19) Jala dohot do akka pinopparna gabe mardosa. Didok di Bibel, “Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma, ala nungnga mardosa sude jolma.”—Rom 5:12.
● Boasa dipasombu Debata masa hajahaton? Tikki di Taman Eden, didok Sibolis do Debata pargabus. Hira na didok ibana do, adong na denggan na ditabunihon Debata sian jolma. (1 Musa 3:3-5) Jala gabe hira na didok ibana do dang denggan cara ni Debata mamaretta. Dipillit si Adam dohot si Hawa do mangoloi Sibolis. Jadi mulai sian i, dang olo nasida diatur Debata. Jala lomo do roha ni nasida manottuhon sandiri dia na denggan dohot na so denggan di nasida. Alai Debata na adil jala na marbisuk do Jahowa. Diboto Ibana do cara na denggan lao pasaehon parsoalan on. Jadi dilehon Ibana ma tikki tu jolma lao mamaretta dirina sandiri. Hasilna gabe lam rarat ma hajahaton di portibi on. Jala tamba sursar do portibi on alani pengaruh ni Sibolis. Sudena on patuduhon dang tolap jolma mamaretta dirina sandiri. Ikkon diurupi Debata do nasida.—Jeremia 10:23.
● Aha do tujuan ni Debata manoppa tano on? Tikki di Taman Eden, dipatudu Debata do lao songon dia bahenonna tano on. Disuru Ibana do si Adam dohot si Hawa marpinoppari lao manggohi tano on. Jala disuru Debata do nasida mangurus tano on asa boi saluhut tano on songon Taman Eden i. (1 Musa 1:28) Jadi ditoppa Debata pe tano on, asa boi do diingani pinoppar ni si Adam dohot si Hawa saleleng ni lelengna jala boi nasida marlas ni roha disi. Alai dipaboa do di Bibel boha cara ni Debata lao pasautton muse tujuanna i.
● Boasa ikkon ro Jesus Kristus tu tano on? Ala mangalo si Adam dohot si Hawa tu Debata, gabe dihukum ma nasida dohot sude pinopparna. Alai parholong do Debata. Dilehon Ibana do harapan. Disuru Ibana do Anakna tu tano on lao paradehon tobusan. (Mateus 20:28) Aha do lapatan ni i? Jesus do “Adam na parpudi”. Sarupa sempurna do ibana songon si Adam, alai tetap do Jesus mangoloi Jahowa sahat tu na mate. Gabe boi ma ibana mangalehon ngoluna na sempurna i lao gabe tobusan asa boi sude jolma dipalua sian dosa dohot hamatean. Jala boi ma nasida mangolu saleleng ni lelengna songon si Adam dohot si Hawa sebelum mardosa. (1 Korint 15:22, 45; Johannes 3:16) Jadi boi dokkonon, Jesus do na gabe jaminan pasti saut do tujuan ni Jahowa lao mambahen tano on gabe Paradeiso.b
Jadi pasti do tujuan ni Debata i, dang holan sada ajaran ni agama na maol diattusi. Sarupa ma i songon Taman Eden na memang tutu hea adong, termasuk ma akka binatang dohot jolma na hea mangolu disi. Jala pasti saut do tujuan ni Debata i di ari na naeng ro. Olo do hamu makkilala hangoluan na saleleng ni lelengna i? Hamu do na manottuhon i. Alai lomo do roha ni Debata asa sude jolma boi makkilala i, termasuk ma akka halak na so hasea pangalahona alai olo muba.—1 Timoteus 2:3, 4.
Tikki naeng mate Jesus, makkatai ma ibana tu sahalak parjahat di labbungna. Diboto parjahat i do na patut ibana dihukum mate. Alai nang pe songon i dipangido ibana do tu Jesus asa diingot ibana. Boha ma alus ni Jesus? Didok Jesus, “Rap do ho dohot au di Paradeiso.” (Lukas 23:43) Haru tu parjahat songon i lomo do roha ni Jesus asa dipahehe ibana jala boi mangolu saleleng ni lelengna di Paradeiso. Jadi pasti lomo do tong rohana asa boi hamu mangolu saleleng ni lelengna, songon i ma Jahowa. Molo lomo rohamuna naeng mangolu saleleng ni lelengna di ari na naeng ro, berusaha ma asa lam godang na diboto hamu taringot Debata na mambahen Taman Eden i.
[Surat na di Toru]
a Contohna ida ma 1 Musa 13:10; 5 Musa 32:8; 2 Samuel 7:14; 1 Kronika 1:1; Jesaya 51:3; Hesekiel 28:13; 31:8, 9; Lukas 3:38; Rom 5:12-14; 1 Korint 15:22, 45; 2 Korint 11:3; 1 Timoteus 2:13, 14; Judas 14; dohot Pangungkapon 12:9.
b Asa boi diboto hamu taringot tobusan ni Jesus Kristus, jaha ma bukku Aha do na Diajarhon Bibel tu Hita? pasal 5, na dibahen Saksi Jahowa.
[Kotak/Gambar]
SURIRANG NA ADONG KAITANNA TU SUDE ISI NI BIBEL
“Bahenokku ma marmusu ho dohot borua i. Jala bahenokku ma marmusu pinopparmu dohot pinopparna. Ropukon ni pinopparna i ma ulum jala turbingonmu ma tumit ni patna.”—1 Musa 3:15.
On ma surirang na parjolo na disurat di Bibel. Debata do na mandokkon surirang on tikki di Taman Eden. Ise do na didok ayat i borua i, pinopparna, ulok i, dohot pinopparna? Songon dia do surirang taringot “marmusu” i saut?
ULOK
Sibolis.—Pangungkapon 12:9.
BORUA
Organisasi ni Jahowa na di surgo. (Galatia 4:26, 27) Dipaboa si Jesaya do tong taringot sahalak “borua” na manubuhon sada bangso.—Jesaya 54:1; 66:8.
PINOPPAR NI ULOK I
Akka halak na mangihutton lomo ni roha ni Sibolis.—Johannes 8:44.
PINOPPAR NI BORUA I
I ma “Israel ni Debata”. Bagian ni bangso i, i ma akka halak Kristen na dimiahi tondi parbadia na lao mamaretta rap dohot Jesus. Jala Jesus Kristus ma bagian utama ni bangso i.—Galatia 3:16, 29; 6:16; 1 Musa 22:18.
TUMIT NI PAT NA DITURBING
Marhasil do Sibolis mambahen Jesus dipamate tikki di tano on. Alai holan satokkin do i, alana dipahehe do muse ibana.
ULU NA DIROPUKKON
Dipamate ma Sibolis. Lao dipamate Jesus do Sibolis saleleng ni lelengna. Alai sebelum i pe, padengganon ni Jesus do sude na sega naung dibahen Sibolis.—1 Johannes 3:8; Pangungkapon 20:10.
Asa boi taboto taringot ringkasan tema ni Bibel, ida ma brosur Bibel—Aha do Isina? na dibahen Saksi Jahowa.
[Gambar]
Gabe susa do si Adam dohot si Hawa dung mardosa nasida