Dohot do Akka Borua di Saksi Jahowa Mangajarhon Hata ni Debata?

I do. Marjuta do akka borua di Saksi Jahowa na dohot mangajarhon Hata ni Debata. Dohot do nasida paboahon barita na uli taringot Harajaon ni Debata. Songon on ma na didok di Psalmen 68:11 taringot nasida, “Dilehon Jahowa do paretta tu bangsona. Akka borua na paboahon barita na uli dos songon tentara na godang.”

Alai, dang sarupa na diulahon akka borua di Saksi Jahowa dohot na diulahon akka pandita borua. Aha ma bedana?

Molo akka pandita borua, tu jemaatna do diajarhon nasida Hata ni Debata. Alai, molo akka borua di Saksi Jahowa, tu akka halak do diajarhon nasida Hata ni Debata na dijuppangi nasida tikki marbarita.

Asing ni i akka pandita borua di gareja dohot di agama na asing, adong do nasida na gabe pamimpin jala dohot do nasida mangajari sude jemaatna. Alai molo akka borua di Saksi Jahowa, dang dohot nasida mangajari di huria. Apalagi ma molo adong disi bawa naung tardidi. Holan akka bawa do na boi mangajari di huria.​—1 Timoteus 3:2; Jakobus 3:1.

Nungnga didok Bibel hian, holan bawa do na boi gabe pengawas di huria. Parrohahon ma na didok si Paulus tikki dibahen ibana suratna tu si Titus. Didok, “Hutadikkon do ho di Pulo Kreta asa boi padengganonmu akka na hurang disi. Jala pillit ma akka bawa na gabe sintua di ganup kota.” Jala didok si Paulus do muse molo adong bawa na lao dipillit si Titus gabe sintua, “unang ma adong siissakan di bawa na lao dipillit i, ikkon sada istrina”. (Titus 1:5, 6) Songon i do tong na didok si Paulus tu si Timoteus, “Molo marsitutu sahalak bawa naeng gabe sintua, na lomo do rohana mandapot ulaon na denggan. Unang ma adong siissakan di sahalak sintua, holan sada istrina, . . . malo mangajari.”​—1 Timoteus 3:1, 2.

Boasa holan bawa na boi gabe pengawas tu jemaatna? Didok si Paulus, “Dang huloas borua mangajari manang mangarajai bawa. Alani i toktong ma ibana hohom. Ai parjolo do si Adam ditoppa, dung i pe asa si Hawa.” (1 Timoteus 2:12, 13) Jadi ala bawa do na parjolo ditoppa, lomo do roha ni Debata asa bawa na mangajari jala na gabe pemimpin tu jemaat.

Asing ni i, ditiru Saksi Jahowa do pemimpin ni nasida i ma Jesus Kristus. Didok si Lukas, “Borhat ma Jesus sian kota tu kota jala sian huta tu huta lao paboahon barita na uli taringot tu Harajaon ni Debata.” Disuru Jesus do tong akka siseanna asa marbarita na uli. Didok di Bibel, “Borhat ma nasida, mardalan ma nasida sian huta tu huta. Dibaritahon nasida ma barita na uli.”​—Lukas 8:1; 9:​2-6.

Saonari on sude do Saksi Jahowa dohot marbarita na uli, bawa nang borua. Diulahon nasida do na nidok ni Jesus, “Dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna.”​—Mateus 24:14.