Ise do na Manoppa Debata?

Bayakkon ma sahalak bapak makkatai tu anakna na marumur pitu taon. Didok ibana do tu anakna i, “Najolo, dibahen Debata do tano on dohot sude isina. Dibahen Ibana muse mataniari, bulan, dohot bintang.” Marpikkir ma satokkin anakna i. Dung i disukkun ibana ma bapakna, “Attong bapa, ise do na mambahen Debata?”

Dialusi bapakna ma, “Dang adong na mambahen Debata, amang. Nungnga adong ibana sian najolo.” Tikki i, pos do roha ni anakna i mambege hata ni bapakna i. Alai dung lam magodang, sukkun-sukkun dope rohana taringot i. Maol do dibayakkon ibana, adong Pribadi na so adong asal mulana. Haru alam semesta on pe adong do asal mulana. Jadi sai torus ma sukkun-sukkun rohana, ‘Sian dia do asal mula ni Debata?’

Songon dia do alus ni Bibel taringot i? Sasittongna sarupa do alus ni Bibel tu alus ni bapak na dipaboa di cerita nakkin. Didok si Musa, “Ale Jahowa, . . . andorang so tubu dope akka dolok, andorang so ditoppa Ho portibi dohot tano na subur on, Ho do Debata na so marmula jala na so marujung.” (Psalmen 90:​1, 2) Jala didok panurirang Jesaya do, “Na so diboto ho do? Na so dibege ho do? Debata na toktong adong sahat tu saleleng ni lelengna do Jahowa Sitoppa saluhut na di tano on.” (Jesaya 40:28) Dos songon i ma, didok si Judas do di suratna nungnga adong Debata “sian najolo”.​—Judas 25.

Akka ayat i patuduhon tutu do Debata i “Raja na manoktong”, songon na disurat apostel Paulus. (1 Timoteus 1:​17) Lapatanna, molo taida pe dao tu pudi di ari naung salpu, nungnga adong Debata di tikki i. Jala tu ari na naeng ro pe, toktong do adong Debata. (Pangungkapon 1:8) On ma buktina, Debata Pargogo na So Hatudosan do Ibana.

Olo do ra maol taattusi taringot on. Boasa? Alana jeppek do umurta. Dang sarupa pandanganta tu pandangan ni Jahowa taringot tikki. Ala mangolu saleleng ni lelengna do Debata, saribu taon di hita dos do i songon sadari di Ibana. (2 Petrus 3:8) Pikkirhon ma contoh on: Pasti dang boi belalang na umurna holan 50 ari mangattusi songon dia ngolu ni jolma na umurna boi sappe 70 manang 80 taon. Di Bibel, dipatudos do jolma songon belalang molo dibandingkon tu Debata na manoppa hita. Jala dao do untimbo pikkiran ni Debata sian pikkiran ni jolma. (Jesaya 40:22; 55:​8, 9) Alani i ma, dang tolap jolma mangattusi sude taringot Jahowa.

Nang pe maol ra taattusi sude taringot Debata, alai sasittongna masuk akkal do na didok Bibel taringot i. Molo adong na manoppa Debata, pasti ibana do na didok Panoppa. Hape didok Bibel, Jahowa do na “manoppa saluhutna”. (Pangungkapon 4:​11) Jala taboto adong do na manoppa alam semesta on. (1 Musa 1:​1, 2) Jadi pasti nungnga adong Debata sebelum adong alam semesta on, ala Ibana do na manoppa i. Asing ni i, nungnga adong Jahowa sebelum ditoppa Ibana akka na mangolu di surgo, songon Anakna na sasada i dohot suru-suruan na asing. (Job 38:4, 7; Kolosse 1:15) Takkas ma, holan Ibana do na parjolo adong. Dang adong na manoppa Ibana.

Debata do na manoppa hita dohot alam semesta on. Ibana do na mangatur akka na adong di alam semesta on, jala na mambahen hukum asa taratur i sude. On ma buktina nungnga adong Debata sian najolo. Jala mangolu saleleng ni lelengna do Ibana. Holan Ibana do na boi mangalehon hangoluan tu nasa na mangolu.​—Job 33:⁠4.