Songon dia do Angka Sintua Mangajarajari Donganta Baoa Asa Tarparbaga?
”Jalo ma poda na binegem sian ahu . . . , jala pasahat ma i tu halak na haposan.”—2 TIMOTEUS 2:2, Bibel Siganup Ari.
1. (a) Aha do siingoton ni ruas ni Debata taringot mangajarajari, jala songon dia do mangulahon on saonari? (b) Aha do na laho siulasonta di parsiajaran on?
DIBOTO ruas ni Debata do molo pangajarajarion boi mambahen marhasil. Songon tudosan, diuluhon si Abraham ”naposo angka na somal,” na paluahon si Lot. (1 Musa 14:14-16) Songon i parende di masa ni raja Daud ”angka na pande” mangendehon ende pujian tu Jahowa. (1 Kronika 25:7) Saonari, marungkil do hita mangalo Sibolis dohot portibi na nirajaanna. (Epesus 6:11-13) Jala, ingkon marsitutu do hita mamuji Jahowa tingki mambaritahon goarNa. (Heber 13:15, 16) Songon angka naposo ni Debata najolo na marhasil, hita pe ingkon diajar. Di huria, dilehon Jahowa do tu angka sintua tanggung jawab mangajarajari angka donganta baoa. (2 Timoteus 2:2) Songon dia do bahenon ni sintua laho mangajarajari angka donganta baoa asa manarihon ruas ni Debata?
PATOGU MA HOLONG NI PARSIAJAR TU JAHOWA
2. Andorang so mangajari sahalak parsiajar, aha do na porlu ulahonon ni sintua, jala boasa?
2 Angka sintua dipatudos tu sada pangula. Andorang so manabur boni, sahalak pangula parjolo ingkon mambaen napu tu tano panuananna, asa hatop tubu suansuanan i. Suang songon i do, andorang so mangajari angka parsiajar, sintua porlu patuduhon angka prinsip ni Bibel laho mangurupi parsiajar asa rade manjalo jala mangulahon aha na diparsiajari.—1 Timoteus 4:6.
3. (a) Songon dia do boi hata ni Jesus na adong di Markus 12:29, 30 dipangke tingki manghatahatai dohot sahalak parsiajar? (b) Songon dia do tangiang ni sahalak sintua boi mangonjar roha ni parsiajar?
3 Porlu antusan ni sintua songon dia hasintongan boi marpanghorhon di roha dohot pingkiran ni parsiajar. Laho mangulahon i, boi do sungkunonmu tu nasida songon dia do marunduk ni roha tu Jahowa mampanghorhon tu haputusan na binahen ni nasida di ngoluna. Sungkunsungkun on boi mamungka pangkataion songon dia hita boi mangoloi Jahowa sian nasa roha. (Jaha Markus 12:29, 30.) Boi do tangianghononmu tu Jahowa asa dilehon tondi porbadia na dihaporluhon ibana manjalo parsiajaran i. Tingki di tangihon nasida tangiangmu taringot ibana, on boi mangonjar rohana mangulahon na dumenggan!
4. (a) Lehon ma tudosan sian Bibel na boi mangurupi parsiajar mambaen hamajuon. (b) Aha do na tinuju ni sintua tingki mangajarajari angka donganta baoa?
4 Parjolo laho mangajarajari, denggan patuduhononmu tudosan na adong di Bibel na mangurupi parsiajar, songon ringkot ni ringgas mangurupi, gabe halak na tarparbaga, jala na marserep ni roha. (1 Raja 19:19-21; Nehemia 7:2; 13:13; Ulaon ni Apostel 18:24-26) Angka parange na denggan sisongon on gabe songon napu do on tu tano panuanan. Mambahen parsiajar marhamajuon di partondion. Sahalak sintua sian Prancis na margoar si Jean-Claude mandok asa boi do parsiajar i mambahen haputusan mangihuthon prinsip ni Bibel i do umbahen na porlu pangajarajarion. Ninna ibana: ”Tingki rap manjaha Bibel huida do on gabe dalan laho ’pabuha mata’ ni parsiajar asa ’mangida halongangan’ sian hata ni Debata.” (Psalmen 119:18) Adong dope dalan na asing laho patoguhon parsiajar?
PATUDUHON MA SIPILLITON JALA BOASA I DENGGAN
5. (a) Sadia ringkot do manungkun tu parsiajar aha sintasintana di partondion? (b) Boasa ingkon ajarajaran ni sintua angka na poso sian haposoonna? (Ida surat di toru.)
5 Sungkun ma aha sintasintana di partondion. Molo ndang adong dope urupi ma ibana mangida sintasinta na boi sipillitonna. Hiras ma paboahon songon dia las ni rohamu najolo, ala dapot na pinarsinta ni rohamu di partondion. Sahalak sintua jala parintis di Afrika na margoar si Viktor paboahon: ”Tingki poso dope ahu adong ma sahalak sintua manungkun, aha do sintasintaku. Sungkunsungkunna on mambaen ahu mangarimangi aha do tutu sintasintaku.” Angka sintua na marpangalaman paboahon denggan mangajarajari angka na poso sian haposoonna. Boi do lehononmu ulaon di huria na boi ulahonon ni nasida. Molo diajarajari sintua do angka na poso sian haposoonna, on boi mangurupi nasida asa mamingkirhon sintasinta di partondion dung magodang manang tingki mambaen haputusan.—Jaha Psalmen 71:5, 17.a
Paboa ma tu angka parsiajar boasa nasida porlu mangulahon ulaon na nilehonmu, jala puji ma ibana molo nunga diulahon songon i (Ida paragrap 5-8)
6. Isara na ringkot dia do dibahen Jesus mangajarajari angka donganta baoa?
6 Laho mangonjar roha ni parsiajar asa mambahen na dumenggan, unang holan paboahon sambing aha sibahenonna. Alai porlu do botoonna boasa i ringkot ulahononna. Jesus manuru siseanna laho marbarita. Andorang so laho, dipaboa do tu nasida boasa ingkon ulahononna i. Ninna ibana: ”Nunga sahat tu ahu nasa huaso di banua ginjang dohot na di tano on. Laho ma hamu podai hamu ma saluhut bangso.” (Mateus 28:18, 19) Songon dia do bahenonmu mangihuthon tiruan na binahen ni Jesus mangajarajari?
7, 8. (a) Boha do angka sintua boi maniru Jesus tingki mangajarajari? (b) Songon dia do ringkot ni pujian tu sahalak parsiajar? (c) Hatorangan dia do na boi mangurupi sintua mangajarajari donganta baoa? (Ida kotak ”Songon dia Mangajarajari Dongan na Asing”.)
7 Molo dipangido hamu sahalak donganta baoa laho mangulahon sada ulaon, huhut ma paboa boasa ringkot ulahononna i. Molo songon i dibahen, songon na mangajari nasida ma mangihuthon prinsip ni Bibel, ndang holan ala adong parenta laho mangulahon. Umpamana, molo dipangido hamu sahalak donganta baoa manjaga pintu masuk ni Bale Harajaon asa sai ias jala denggan asa unang adong na tartuktuk, boi jahahononmu ayat di Titus 2:10. Jala paboa tu nasida songon dia do i boi manghorhon na denggan tu ulaon marbarita. Boi dohononmu muse asa ingotonna angka natuatua jala boasa ulaon i boi mangurupi nasida. Angka hatorangan sisongon on mangurupi parsiajar mamingkirhon donganna na asing ndang alani paraturan. Molo diida nasida manghorhon na denggan do ulaon nasida i tu sude dongan sahaporseaon, las ma rohana ala boi mangurupi donganna na asing.
8 Asing ni i muse, puji ma nasida ala naung diulahon nasida aha na sinurumu. Sadia ringkot do mangulahon i? Songon aek porlu tu angka suansuanan asa denggan tubu, pujian pe boi mangurupi parsiajar mambahen hamajuon di partondion.—Bandinghon tu Mateus 3:17.
DEBA NA MAMBAHEN MAOL
9. (a) Boasa gabe songon na bangkol angka sintua di negara na maju laho mangajarajari donganta baoa? (b) Boasa manarihon ulaon di partondion ndang na rumingkot di roha ni deba angka donganta baoa na poso?
9 Angka sintua na tading di negara na maju mangida, adong na mambahen maol angka donganta baoa na marumur 20 sahat tu 30 taon laho mangulahon ulaon di huria. Angka sintua na tading di 20 inganan na marasingasing on, paboahon pangalaman nasida taringot aha do na mambahen bangkol roha ni angka na poso i manjalo manang mangulahon ulaon di huria. Angka sintua on paboahon na poso i ndang diurupi natuatuana asa mangharingkothon ulaon di partondion. Jala tingki adong di roha ni na poso i laho mambahen hamajuon di partondion, natuatua nasida manjujui asa mangharingkothon parsingkolaan na timbo dohot parkarejoan! Alani i, patujolohon ulaon na hombar tu lomo ni roha ni Debata ndang adong di roha nasida.—Mateus 10:24.
10, 11. (a) Boha do bahenon ni sahalak sintua manat mangurupi sahalak donganta baoa asa boi paubahon rohana? (b) Angka ayat na dia ma na boi dipangke sintua mangonjar roha ni sahalak donganta baoa, jala boasa? (Ida ma surat di toru.)
10 Molo ndang lomo roha ni sada donganta baoa mangharingkothon ulaon di huria, ingkon marsitutu do hamu huhut marbenget ni roha laho mangurupi nasida asa paubahon rohana. Songon sahalak pangula na ingkon manat jala nanget manungkol suansuananna asa denggan partubuna. Suang songon i nang hamu, lambok ma mangurupi donganta baoa paubahon rohana asa rade nasida manjalo ulaon di huria. Alai songon dia ma mangulahon i?
11 Lam leleng, boi ma tandaonmu nasida lam jonok. Rap manghatahatai ma hombar tu partondion sian Bibel na mangurupi ibana mangarimangi boasa rade ibana mangalehon diri laho mangoloi Jahowa. (Parjamita 5:3; Jesaya 6:8; Mateus 6:24, 33; Lukas 9:57-62; 1 Korint 15:58; 2 Korint 5:15; 13:5) Jala porlu dodoonmu roha nasida mamangke sungkunsungkun on: ’Tingki tardidi aha do janjimu tu Jahowa? Boha ma panghilalan ni Jahowa tingki na tardidi i hamu?’ (Poda 27:11) ’Boha muse ma panghilalaan ni Sibolis?’ (1 Petrus 5:8) Angka ayat ni Bibel na jinahamu, marhuaso do i jala boi mangonjar roha ni sasahalak.—Jaha Heber 4:12.b
ANGKA PARSIAJAR, GABE HAPOSAN MA HAMU
12, 13. (a) Songon sahalak parsiajar parange aha do dipatuduhon si Elisa? (b) Pasupasu aha do dilehon Jahowa tu si Elisa ala sai marsihohot ibana?
12 Angka na poso, tangkas ma boto hamu na dihaporluhon huria do hamu! Parange na songon dia ma na boi mambahen hamu asa denggan mangoloi Jahowa? Asa tadapot alusna, taulas ma pigapiga angka na masa di tingki naung salpu na mangurupi sahalak parsiajar i ma si Elisa.
13 Hirahira 3.000 taon naung salpu, ditogihon panurirang si Elia ma sahalak na poso asa gabe pangurupi di ibana. Hatop do dioloi si Elisa jala sian serep ni rohana mangurupi si Elia panurirang i. (2 Raja 3:11) Diajarajari si Elia ma si Elisa hirahira onom taon lelengna. Dung laho salpu na ma ulaon ni si Elia di Isarel, dipaboa si Elia ma tu si Elisa na so pola be urupanna ibana. Alai tolu hali si Elisa mandok: ”Na so tupa tadingkononku ho.” Sai dituntun ibana do asa sai rap ibana dohot si Elia guruna i saleleng boi nasida rap. Dipasupasu Jahowa do si Elisa ala sai marsihohot, diloas do ibana mangida si Elia nangkok diboan habahaba.—2 Raja 2:1-12.
14. (a) Songon dia do angka parsiajar saonari on boi mangihuthon tiruan ni si Elisa? (b) Boasa ringkot ingkon haposan sahalak parsiajar i?
14 Hamu angka parsiajar, songon dia do bahenonmu mangihuthon tiruan ni si Elisa? Rade ma hamu manjalo ulaon aha pe na dilehon tu hamu. Ingot ma guru i tongtong do nasida songon alealemu. Patuduhon ma na lomo do rohamu manjalo pangurupion nasida jala na olo do hamu diajarajari. Na rumingkot, haposan ma hamu di sude ulaon muna. Boasa? Molo haposan hamu jala tarparbaga, angka sintua boi marpos ni roha na lomo do roha ni Jahowa mangalehon gumodang tanggung jawab di huria tu hamu.—Psalmen 101:6; jaha 2 Timoteus 2:2.
ARGAI MA ANGKA SINTUA NA MARPANGALAMAN
15, 16. (a) Songon dia do si Elisa patuduhon na diargai ibana do guruna? (Ida gombar di mula ni parsiajaran.) (b) Boasa panurirang na deba nai boi marpos ni roha tu si Elisa?
15 Surat ni Bibel taringot si Elisa patuduhon tama do mangargai angka sintua na marpangalaman. Dunghon ro si Elia dohot si Elisa manopot punguan panurirang di Jeriko, laho ma nasida sian i tu aek Jordan. ”Dung i dibuat si Elia ma sampesampena, disorpi ma i jala dilibashon tu aek, jadi tolak ma i tu jae tu julu.” Marsik do aek Jordan dibolus, jala mardalan ”nasida huhut mangkatai.” Ndang hea ro tu roha ni si Elisa na diantusi ibana do sude manang aha pe. Alai dirohahon ibana do sude na didok ni guruna i jala marsiajar sian sude na binahenna. Dung i laho ma si Elia diboan habahaba jala mulak ma si Elisa tu aek Jordan. Dilibashon ibana ma abit ni si Elia tu aek Jordan jala didok ma ”Didia do nuaeng Jahowa, Debata ni si Elia?” marbagi ma muse aek i.—2 Raja 2:8-14.
16 Dos do diida hamu halongangan na dibahen si Elisa tu halongangan na parpudi na dibahen ni si Elia? Aha do na diajarhonna tu hita? Nang pe naung si Elisa manggantihon si Elia gabe panurirang alai ndang dibahen ibana guru lomona. Diihuthon ibana do dos songon na dibahen ni si Elia. Ala diargai ibana guruna, laos pos ma roha ni angka panurirang tu si Elisa. (2 Raja 2:15) Manurirangi ma si Elisa saleleng onompulu taon jala dilehon Jahowa do godang huaso dohot angka tanda halongangan gumodang sian na dibahen si Elia. Aha do parsiajaran na denggan tu angka parsiajar saonari?
17. (a) Songon dia do angka parsiajar saonari boi mangihuthon tiruan sian si Elisa? (b) Songon dia do Jahowa manggunahon angka parsiajar na sai marsihohot i nuaeng?
17 Dung lam godang dijalo hamu ulaon di huria, ulahon hamu ma i songon naung diajarhon ni sintua tu hamu. Ndang pola luluanmu dalan na asing sian na somal laho mangulahonsa. Alai mangihuthon tudutudu ni orhanisasi jala mangihuthon na ringkot di huria. Dibahen si Elisa do dos songon na diulahon si Elia, on patuduhon molo na diargai si Elisa do guruna. Songon i ma tongtong na diargai hamu do angka sintua na mangajarajari hamu molo diulahon hamu songon na diajarhonna. Jala dongan di huria boi tongtong marpos ni roha tu hamu. (Jaha 1 Korint 4:17.) Dung lam leleng hamu mangulahon ulaon di huria, boi ma urupanmu huria mangihuthon pardalan ni orhanisasi na tongtong marhamajuon. Urupan ni Jahowa ma hamu mangulahon ulaon na umbalga sian na binahen ni gurumu songon naung dibahenNa mangurupi si Elisa.—Johannes 14:12.
18. Boasa mansai ringkot mangajarajari angka donganta baoa di huria?
18 Arop roha nami anggiat ma parsiajaran on dohot parsiajaran di minggu naung salpu, boi mangonjar roha ni angka sintua asa mangalehon tingkina mangajarajari angka donganta baoa. Ditangianghon hami tongtong anggiat ma godang angka donganta baoa na rade diajarajari jala mangihuthon sude songon na diparsiajari i laho mangurupi ulaon di huria. On mambahen togu sude huria di liat portibi on jala mangurupi hita asa sai marsihohot di masa na susa on.
a Molo sahalak na poso idaon togu di partondion jala marserep ni roha, marparange angka na denggan na boi marlaba di huria, boi do nasida mangula songon sada parhobas nang pe umurna ndang sahat tu 20 taon.—1 Timoteus 3:8-10, 12; Ida Menara Pengawal 1 Juli 1989, alaman 29.
b Boi ma idaonmu hatorangan na ringkot di Menara Pengawal, 15 April 2012, alaman 14-16, paragrap 8-13; dohot ”Tetaplah Berada dalam Kasih Allah”, parsiajaran 16, paragrap 1-3.