Hahurangan ni Sains

Na baruon adong pigapiga buku na marisi pandapot ni pigapiga halak na digoari ateis naung maju. Godang do halak na mamparrohahon dohot na mambahen paraloan alani buku on. Sahalak ilmuwan na mamparsiajari taringot saraf na margoar si David Eagleman manurat pandapot taringot buku i: ”Godang na manjaha mandok sude boi botoon ni angka ilmuwan. Hape sains holan papunguhon angka pandapot ni angka jolma. Nasida papunguhon angka na so hea dope dapot ni nasida.”

Sian najolo godang do angka ilmuwan na jago na marhasil mandapot alus ni angka na so diantusi taringot nasa na tinompaNa. Alai godang do na sala sian panulingkiton ni nasida i. Songon si Isaac Newton sahalak ilmuwan naung tarbarita. Dipatudu ibana songon dia gravitasi mamudun angka planet, bintang, dohot galaksi. Ibana do na mandapot parbinotoan taringot Kalkulus, i ma paretongan matematika na dipangke mambahen komputer, pardalanan tu bulan, dohot fisika nuklir. Alai diparsiajari ibana do muse Alkimiah, i ma parbinotoan na mamangke astrologi dohot utiutian na mandok boi do timah dohot logam na asing gabe sere (mas).

Lobi sian 1500 taon andorang so adong dope si Newton, sahalak ahli astronomi na margoar si Ptolomeus sian Junani manulingkiti langit holan mamangke simalolongna sambing. Boi di boto ibana parpeak ni angka planet. Asing ni i, ibana mambahen peta na tingkos alai, didok ibana tano on do pamusatan ni nasa na tinompaNa. Sahalak ahli astrofisika na margoar Carl Sagan manurat taringot si Ptolomeus: ”Saleleng 1.500 taon sintong do di roha ni jolma na mandok tano on do pamusatan ni nasa na tinompaNa. On patuduhon songon dia pe malo ni sasahalak boi do sala ibana.”

Sarupa do parsoalan na diadopi angka ilmuwan nuaeng. Boi do nasida tangkas mangantusi nasa na tinompaNa? Taboto do na godang hamajuon na dibahen sains na marlaba tu hita. Alai porlu taingot adong do hahurangan ni sains. Ahli fisika na margoar Paul Davies mandok: ”Ndang boi taantusi nasa na adong di portibi on alani i ndang boi tadapot alus na sintong tu sungkunsungkun taringot nasa na tinompaNa. Hata on patuduhon na so boi do diantusi jolma nasa na tinompaNa. Alani i, molo adong na mandok boi do patorangon ni sains nasa na adong di hasiangan on, ganggu rohanta disi.

Bibel paboahon mansai longang do roha mangida hasiangan on: ”Ida ma, i ma angka ujung ni dalanna dope, asal pistik hata husiphusip na itabege taringot tusi! Tung ise ma na manahan anggo umbege suara ronggur ni hagogoonna!” (Job 26:14) Godang dope na so boi antusan ni jolma. Hata ni apostel Paulus na disurat 2.000 taon naung salpu mandok toho do hata i: ”Bagasna i, antong, hamoraon, hapistaran dohot parbinotoan ni Debata! Na so hasigatan do angka uhumna jala na so habogasan do angka dalanna!”​—Rom 11:33.