Arsak ni Roha Alani Mara

Dipaboa si Alona ma pengalamanna, ”Tingki hubege soara ni sirene, taroktokon ma jantungku jala marlojong ma ahu mangalului partabunian. Lam marsak ma ahu tingki ndang adong inganan partabunian di luar. Dung i mardalan ma ahu huhut tumatangis jala pusok hosangku. Dung marjom asa boi huorom diringku. Dung i, hubege ma muse ro soara ni sirene.”

Ndang holan porang na paro mara tu hita. Olo do ra hita manang keluarganta manaon sahit na mambahen marsak rohanta. Jala adong muse na marsak alani ari na naeng ro. Sungkunsungkun roha nasida, ’Masa dope haduan porang, hajahaton, polusi, dohot angka sahit molo dung balga angka ianakhonku?’ Songon dia do hita boi mangadopi arsak ni roha sisongon i?

Molo taboto do na laho masa angka mara, ”diida halak na bisuk do haroro ni jea, gabe laho ibana martabuni.” (Poda 27:12) Songon na tabahen laho mangaramoti pamatangta asa sehat, hita pe ingkon mangaramoti ateate dohot pingkiranta. Barita taringot hajahaton dohot film na marisi porang dohot pamunuan, boi mambahen hita dohot gellengta marsak. Ndang na gabe so olo hita mangadopi angka na masa di parngoluon, molo tapasiding mara. Ndang ditompa Debata hita laho mamingkirhon angka na jahat. Gariada didok, ”pingkiri hamu ma nasa parange na sintong, . . . na daulat, . . . na tigor, . . . na bontor.” Molo taulahon i, ”Debata Sipardame” mangalehon hadameon tu roha dohot tu pingkiranta.​—Pilippi 4:8, 9.

RINGKOT NI TANGIANG

Haporseaon na togu mangurupi hita mangadopi arsak ni roha. Bibel mandok tu hita asa ”manangkas ma rohamuna tu tangiang!” (1 Petrus 4:7) Tapangido ma pangurupion, bisuk dohot habaranion sian Debata, jala pos ma rohanta na ”tangihononna do hita di nasa na tapangido.”​—1 Johannes 5:15.

Bibel patorangkon Sibolis do ”raja ni portibi on” jala ”di bagasan hajahaton do nasa portibi on.” (Johannes 12:31; 1 Johannes 5:19) Jadi tingki diajarhon Jesus tu hita asa manangiangkon: ”Palua ma hami sian na jahat,” paboahon na tutu do adong Sibolis dohot na adong do haluaon sian Debata. (Mateus 6:13) Dipatorang si Alona ma muse, ”Tingki hubege soara ni sirene, hupangido ma tu Debata asa boi ahu mangorom pangkilalaanku. Dung i, dijou tunggani dolingku ma ahu, jala rap martangiang ma hami. Godang do hami diurupi tangiang i.” Songon na nidok ni Bibel: ”Jonok do Ibana tu ganup na manjou goarNa, na joujou tu Ibana sian nasa rohana.”​—Psalmen 145:18, Bibel Siganup ari.

PANGKIRIMON TU ARI NA NAENG RO

Di jamita ni Jesus na di dolok, diajarhon ibana do tu angka siseanna asa manangiangkon ”Sai ro ma harajaonmu.” (Mateus 6:10) Laho ripashonon ni Harajaon ni Debata do arsak ni roha salelengna. Marhite ”Raja ni hadameon,” i ma Jesus, laho pasohothon ni Debata ma ”hamusuon ro di ujung ni tano on.” (Jesaya 9:6 Bibel Siganup ari; Psalmen 46:10) ”Jadi manguhum ma ibana di tongatonga ni torop angka bangso . . . Ndang be sintahon ni bangso dompak bangso podang, jala ndang be guruhonon nasida ruhut ni hamusuon.” (Mika 4:3, 4) Martua ma angka na marsaripe jala ”paulion nasida ma angka bagas, laos inganan nasida, suanon nasida ma hau anggur jala panganon nasida parbuena.” (Jesaya 65:21) ”Ndang adong be sian tongatonganta na morongorong alani parsahiton.”​—Jesaya 33:24, Bibel Siganup ari.

Nang pe marsitutu hita pasidingkon mara, ndang sai boi tapasiding ”tingki tahe dohot parsorion” na so panagaman. Ndang sai boi tapasiding inganan dohot tingki di na ro mara. (Parjamita 9:11) Songon naung taboto, nunga godang halak na mate alani porang, hajahaton manang alani sahit saleleng marratus taon. Adong do pangkirimon tu nasida?

Laho paheheon ni Debata do marjuta halak naung mate. Nang pe naung mate, diingot Debata do nasida. Satongkin nari, ”begeon ni saluhut halak na di angka tanoman i ma soarana. Dung i ruar be ma.” (Johannes 5:28, 29) Taringot haheheon, Bibel paposhon rohanta: ”Songon sauh [jangkar] do pangkirimon i di ngolunta.” (Heber 6:19, Bibel Siganup ari) Jala lehonon ni Debata ma ”dalan tu haporseaon di saluhut jolma, dung  dipahehe Ibana [Jesus] sian na mate.”​—Ulaon ni Apostel 17:31.

Saonari, taadopi dope arsak ni roha nang pe marsitutu hita pasonangkon roha ni Debata. Ala marsitutu do si Paul, si Janet dohot si Alona mangadopi situasi nasida jala manjonok tu Debata, huhut patoguhon pangkirimonna tu bagabaga na adong di Bibel, gabe boi ma diadopi nasida arsak ni roha. Songon naung dihilala nasida di parngoluonna, ”Debata haroroan ni pangkirimon i, manggohi hamu las ni roha dohot dame di bagasan haporseaonmuna.”​—Rom 15:13, Bibel Siganup ari.