Lehon ma tu ahu hadameon dohot las ni roha holan sataon pe

NGOLUNGKU UJU I:

Hami tinggal di Tellancourt, huta di timur laut ni Prancis. Bapakku halak Prancis, alai omakku halak Italia. Tingki ualu taon umurhu, pinda ma hami tu inganan ni parkarejo angka na pogos, di pinggiran ni kota Roma Italia. Dung i, lam susa ma parngoluonnami. Marbadai ma natuatuangku ala ni parhepengon.

Dung 15 taon umurhu, laho ma ahu sian jabu ala disuru oma ahu mangalului dongan. Gabe jotjot ma ahu ndang mulak be tu jabu. Marsaor ma ahu tu halak na so denggan parangena. Sada tingki, adong ma donganku baoa mangalehon tu ahu narkoba. Asa tarida ahu songon naung dewasa hujalo ma i. Ndang sadia leleng, marnarkoba dohot mangulahon parmainanon ma ahu. Jotjot ahu manaon pelecehan seksual. Ndang husarihon be ngolungku. Jotjot do lungun huhilala. Dung 16 taon umurhu, huinum ma sabotol wiski jala hutimbung tu tao laho maningkot. Dung i, ndang sadar ahu saleleng tolu ari.

Marungkil do ahu asa boi mangolu, alai tong dope jahat parniulaonku. Hutogihon do na asing mangulahon parmainanon, marnarkoba di jabunasida jala hutangkoi barang ni nasida. Dipangke kelompok sindikat kriminal na balga ma ahu pengedar narkoba di Italia. Jotjot do ahu dilelei polisi. Nang pe ndang marlapatan huhilala ngolungku, alai huboto adong do na tinuju ni ngolu on. Martangiang ma ahu tu Debata mangido hadameon dohot las ni roha holan sataon pe.

SONGON DIA BIBEL PAUBAHON NGOLUNGKU:

Dung marumur 24 taon, marsangkap ma ahu pinda tu Inggris. Ala pengedar narkoba do ahu, terancam do ngolungku. Andorang so pinda, hujumpangi ma omakku. Alai, tarsonggot ahu mangida omakku mangkatai dohot si Annunziato Lugarà taringot Bibel.a Huboto godang do hajahaton diulahon ibana. Mabiar do ahu, alai husungkun ma marhua ibana dison. Dipaboa ibana, dibahen ibana hamubaon asa boi gabe Sitindangi Ni Jahowa. Disuru ibana ma ahu manjumpangi Sitindangi Ni Jahowa molo dung sahat di Inggris. Alai dung sahat ahu di Inggris, ndang huingot hatana i jala tongtong dope huulahon hajahaton.

Sada tingki, huida ma sada Sitindangi mangalehon majalah Menara Pengawal dohot Sadarlah! di inganan na ribur di London. Huingot ma janjingku tu si Annunziato. Hupangido ma urupan ni Sitindangi i ahu marsiajar Bibel.

Songgot do rohangku mamboto aha na huparsiajari sian Bibel. Umpamana, taronjar do rohangku tingki manjaha ayat na disurat di 1 Johannes 1:9 taringot Debata, na mandok ”Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon.” Balga do pangkorhon ni ayat on tu ahu ala godang do dosa naung huulahon. Ro ma ahu tu parpunguan ni Sitindangi Ni Jahowa. Las rohanasida manjangkon ahu. Ala togu paralealeon ni nasida—lomo ma rohangku asa boi marsaor di huria i.

Ummaol do ahu paubahon parangengku sian manadingkon narkoba dohot mangulahon parmainanon. Maol do ahu manguba rohangku asa mangargai halak na asing. Marungkil do ahu manadingkon parangengku na roa. Alai, diurupi Jahowa do ahu marhamubaon. Dung onom bulan marsiajar Bibel, taon 1997 tardidi ma ahu gabe Sitindangi Ni Jahowa.

LABA NA HUDAPOT:

Dung tardidi, marhasohotan ma ahu dohot si Barbara na baru gabe Sitindangi Ni Jahowa. Adong muse donganku na olo marsiajar Bibel jala gabe Sitindangi rap dohot ibotona. Dung i, angkang ni ompung borungku naung marumur 80 taon lobi, marsiajar Bibel jala nunga tardidi andorang so marujung ngolu.

Saonari ahu nunga gabe sintua di huria jala rap merintis dohot tunggani borungku, mangurupi halak marsiajar Bibel na marbahasa Italia di London. Olo dope ahu marsak alani hasomalanku na jolo, alai dipatogu si Barbara do ahu. Las rohangku ala martua keluargangku jala adong Ama parholong na sai rade mangurupi ahu. Hupangido hadameon dohot las ni roha nang pe holan sataon tu Debata, alai dilehon do tu ahu lobi sian na hupangido!