Porlu Dope Tajaha Bibel?

ADONG NA MANDOK, NDANG PORLU. Sahalak dokter mandok, molo taihuthon poda ni Bibel, sarupa ma i songon mamangke buku taon 1920-an laho mangajari halak taringot parsiajaran kimia. Na asing ndang porsea tu isi ni Bibel. Nasida mandok, molo diihuthon poda ni Bibel, sarupa ma i songon mamangke komputer na baru alai mangihuthon petunjuk naung leleng. Sian on taboto, pigapiga halak mandok ndang porlu be manjaha Bibel.

Antong, tutu do ndang porlu be manjaha Bibel di tingkinta saonari? Saonari, godang do artikel di internet na marisi hatorangan na terbaru taringot ngolunta on. Godang do acara TV na manogihon angka psikolog dohot guru asa mangalehon poda taringot ngolunta on. Asing ni i, godang do toko buku na manggadis angka buku na mangurupi godang halak di parngoluon on.

Ala nunga godang hatorangan na terbaru taringot ngolunta on, porlu dope tajaha Bibel naung disurat 2.000 taon naung salpu? Tutu do hata ni halak na mandok molo Bibel i ndang porlu be dijaha? Sasintongna, sala do pandapot sisongon i. Tutu, lam maju do teknologi dohot sains. Alai, adong do na rumingkot na dihaporluhon godang jolma. Godang do na mangalului hatorangan asa boi lam marlas ni roha, dame pangkilalaan, martua parsaripeonna, jala denggan maraleale.

Di Bibel ma boi tadapot angka hatorangan taringot i. Diurupi do hita di ngolunta asa boi mangadopi marragam sitaonon. Asing ni i, tongtong do marlaba poda ni Bibel sahat tu saonari! Didok di Bibel, ”Ai na marngolu do hata ni Debata.” (Heber 4:12) Boasa songon i denggan isi ni Bibel? Alana, sian Debata do Bibel i.​—2 Timoteus 3:16, 17.

Boi do tahaporseai isi ni Bibel? Porlu dope tajaha Bibel? Marlaba dope isina tu hita? Sude siulason di Joujou Paboahon on mangurupi hamu mandapot alus ni sungkunsungkun i.