“Boasa Ndang Diurupi Debata Ahu?”
“JOTJOT DO HALAK MANUNGKUN, BOASA NDANG DIURUPI DEBATA AHU?”— I ma na didok si Paus Benediktus XVI, tingki ro ibana tu kamp konsentrasi di Auschwitz, Polandia.
TINGKI MASA HASUSAAN, HEA DO SUNGKUN-SUNGKUN ROHAMU, ‘BOASA NDANG DIURUPI DEBATA AHU?’ MANANG ‘DIPARROHAHON DEBATA DO AHU?’
Sarupa do ra pangkilalaanmu songon si Sheila, na tading di Amerika. Didok ibana, “Ringkot do manomba Debata di keluargangku. Sian na gelleng, porsea do ahu na tutu adong Debata. Alana Ibana do Sitompa sasudena. Huboto do, ndang na sogo roha ni Debata tu ahu. Alai ahu pe, ndang pos rohangku na disarihon Ibana ahu.” Boasa songon i pangkilalaan ni si Sheila? Didok ibana, “Ndang marnasuda hasusaan di keluargangku. Hira na so diurupi Debata do hami.”
Songon si Sheila, porsea do ra hamu na tutu adong Debata. Alai sungkun-sungkun do ra rohamu, diparrohahon Debata do hamu manang na ndang. Songon naposo ni Debata najolo, i ma si Job, hea do dihilala ibana songon i. Porsea do ibana tu huaso dohot bisuk ni Debata. (Job 2:3; 9:4) Tingki masa hasusaan na so marnasuda, jala songon na so adong na mangurupi, disungkun si Job do tu Debata, “Ala ni aha umbahen tabunihononmu bohim, jala etongonmu ahu hira musum?”—Job 13:24.
Tutu do Debata na mambahen hita susa? Adong do bukti na patuduhon na tutu diparrohahon Debata hita ganup marsada-sada? Aha do na paposhon rohanta molo Debata mangantusi dirinta, mamboto pangkilalaanta jala olo mangurupi hita? Aha do na didok Bibel taringot on?
Di halaman na mangihut, taboto ma tarida do holong ni Debata tu hita sude sian cara ni Ibana manompa sasude. (Rom 1:20) Dung i, taboto ma sian Bibel na tutu do disarihon Debata hita. Molo diparsiajari hamu taringot Debata sian Bibel dohot angka tompaanna, lam pos ma rohamu na “disarihon do hamu”.—1 Johannes 2:3; 1 Petrus 5:7.