Boasa ma Susa Hita?

Molo ndang Debata na mambahen hita susa, boasa ma masa hapogoson, haraparon, porang, sahit, dohot bencana alam? Didok di Bibel, adong tolu na mambahen hita susa:

1. Parange ni Halak na Jahat. “Jolma mangarajai donganna jolma mambahen ibana marhinamago.” (Parjamita 8:9) Ala mardosa, godang do halak ndang parduli tu donganna jala mangulahon angka na jahat. Gabe susa ma hita alani pambahenan ni nasida.

2. Inganan dohot Tingki na So Panagaman. Aha do muse na mambahen hita susa? Didok di Bibel, “Tingki tahe dohot parsorion mangonai tu nasida luhutna.” (Parjamita 9:11) Di na so panagaman, boi do masa hasusaan tu hita. Ra pas di sada inganan hita, tompu ma masa bencana. Manang adong halak na so manat, umpamana tingki di dalan. On boi parohon jea tu hita.

3. Sibolis. Tangkas do muse dipaboa di Bibel taringot ise na mambahen susa angka jolma. Didok, “Di bagasan huaso ni Sibolis do saluhut portibi on.” (1 Johannes 5:19) Mulana, suru-suruan do Sibolis. Alai “ndang hot ibana di hasintongan”. (Johannes 8:44) Dung i, godang dope suru-suruan na mangihuthon Sibolis asa mangalo tu Debata. Diharingkothon nasida do lomo ni roha ni nasida. Gabe digoari ma nasida angka begu. (1 Musa 6:1-5) Mulai sian najolo, marsitutu do nasida mambahen angka jolma asa mangalo tu Debata. Jala saonari, lam susa do ngolunta dibahen nasida. Didok di Bibel, muruk situtu do Sibolis jala ibana do “na mangaliluhon saluhut portibi on”. I do umbahen gabe “marjea” jala susa hita. (Pangungkapon 12:9, 12) Jahat jala kejam do Sibolis. Las do rohana mangida susa angka jolma jala marsitaonon. Jadi Sibolis do na mambahen hita susa, ndang Debata.

RIMANGI MA: Lomo do roha ni halak na jahat mambahen susa halak na asing. Alai molo Debata, ndang lomo rohana susa jolma. Alana didok di Bibel, “Holong do Debata.” (1 Johannes 4:8) Didok Bibel do muse, “Dao ma sian Debata anggo hajahaton, jala dao sian Nasunhinagogo i uhum hageduhon!”​—Job 34:10.

Olo do ra sungkun-sungkun rohanta, ‘Sai dipasombu Debata do hita susa?’ Songon naung taboto, sogo do roha ni Debata mangida hajahaton jala lungun do rohana mangida hita susa. I do umbahen didok di Bibel, “Pasahat hamu ma sude holso ni rohamuna tu Ibana, ai disarihon do hamu.” (1 Petrus 5:7) Jadi ala marhuaso do Debata jala holong rohana tu hita, naeng salpuhononna do sude hasusaan dohot hajahaton. Diulas ma on di halaman na mangihut.a