Mangurupi Halak na so Maragama Asa Mananda Debata

1. Aha do na muba piga-piga taon na parpudi on?

NAJOLO, gumodang do halak na mangangku maragama. Alai piga-piga taon na parpudi on, ndang songon i be. Lam godang do halak na so adong be agamana. Di piga-piga negara, nunga gumodang halak mangangku ndang maragama.b—Mat. 24:12.

2. Boasa lam godang halak na so maragama?

² Boasa lam godang saonari halak na so maragama?c Ra, adong na holan naeng marsonang-sonang manang adong na sai mamingkiri hasusaanna. (Luk. 8:14) Adong do piga-piga na so porsea be tu Debata. Na asing porsea do tu Debata alai dihilala nasida nunga ketinggalan jaman be agama, maralo tu ilmu pengetahuan jala ndang masuk angkal. Ra, dibege nasida sian angka donganna, guruna, manang angka barita na mandok sian evolusi do ngolunta on. Jala ndang jotjot dibege nasida halak manaringoti Debata. Adong muse na sogo rohana mangida angka pamimpin agama, alana holan hepeng dohot huaso do na sai dipingkiri nasida. Di piga-piga inganan, dibatasi pamarenta do ulaon ni angka agama.

3. Aha do tujuan ni parsiajaran on?

³ Didok Jesus do, “bahen ma saluhut halak sian nasa bangso gabe siseanku”. (Mat. 28:19) Songon dia caranta mangurupi halak na so maragama asa mangkaholongi Debata jala gabe sisean ni Jesus? Ingkon taantusi do pandapot ni sasahalak tu barita na tapasahat hombar tu ingananna magodang. Umpamana, ndang sarupa pandapot ni halak Eropa tu halak Asia. Boasa? Molo di Eropa, godang do halak na mamboto taringot Bibel jala somal do dibege nasida Debata do na manompa saluhutna. Alai molo di Asia, godangan do halak na so mamboto taringot Bibel jala ra ndang porsea nasida adong na manompa saluhutna. Di parsiajaran on, diurupi ma hita asa boi marbarita tu saluhut halak, manang didia pe jala aha pe na dihaporseai nasida.

NA INGKON TAINGOT TINGKI MARBARITA

4. Boasa ingkon pos rohanta?

⁴ Ingkon Pos ma Rohanta. Ganup taon, adong do halak na so maragama na gabe Sitindangi Ni Jahowa. Godang do sian nasida na denggan pangalahona jala sogo rohana mangida angka agama na munafik. Alai na asing adong do na roa pangalahona jala adong hasomalanna na ingkon dipauba. Pos ma rohanta, urupan ni Jahowa do hita asa boi tadapot angka halak na “tama mandapot hangoluan saleleng ni lelengna”.​—Ul. 13:48; 1 Tim. 2:3, 4.

5. Aha do na jotjotan mambahen halak gabe olo manangihon barita na tapasahat?

⁵ Burju ma jala Marbisuk. Jotjotan do halak olo manangihon barita na tapasahat ndang alani barita i, alai sian caranta pasahathon barita i do. Lomo do roha ni nasida molo burju hita, marbisuk jala lambok mangkatai tu nasida. Unang ma tapaksahon pandapotta tu nasida. Gariada, ingkon taantusi do pandapot ni nasida taringot agama. Umpamana, adong do na so lomo rohana mangkatai taringot agama tu halak na baru ditanda. Na asing mangkilala ndang denggan molo tasungkuni pandapot ni halak taringot Debata. Adong muse na maila molo diida halak ibana manjaha Bibel, tarlumobi molo rap dohot Sitindangi Ni Jahowa. Aha pe alasanna ni, ingkon taantusi do pangkilalaanna nasida.​—2 Tim. 2:24.

6. Songon dia do si Paulus menyesuaihon carana mangkatai, jala songon dia do hita maniru ibana?

⁶ Boha do molo ndang lomo roha ni sasahalak molo tapangke hata “Bibel”, “tompaan”, “Debata”, dohot “agama” tingki mangkatai? Tatiru ma cara ni si Paulus jala tasesuaihon ma caranta mangkatai. Tingki mangkatai si Paulus dohot halak Jahudi, dipangke ibana do ayat sian na tarsurat. Alai tingki mangkatai ibana dohot halak Junani di Areopagus, ndang pintor dienet ibana ayat sian na tarsurat. (Ul. 17:2, 3, 22-31) Tatiru ma si Paulus. Molo na jumpangmuna i ndang porsea tu Bibel, unang ma pintor tapaboa ayat na sian Bibel. Molo dihilala hamu ndang lomo rohana diida halak manjaha Bibel, pangke ma cara na asing. Umpamana, jahahon ma ayat sian HP manang tablet.

7. Songon na dipaboa di 1 Korint 9:20-23, aha do na boi tatiru sian si Paulus?

⁷ Tangihon jala Antusi ma. Ingkon taantusi do boasa songon i dihilala halak na tajumpangi i. (Poda 20:5) Tatiru ma si Paulus. Halak Jahudi do ibana. Alai disesuaihon ibana do carana marbarita tu angka na so halak Jahudi. Alana, ndang pola diboto nasida taringot Jahowa dohot taringot na tarsurat. Porlu do tabahen riset manang tasungkun ma angka naung berpengalaman di hurianta asa taantusi pandapot ni angka halak di ingananta.​—Jaha 1 Korint 9:20-23.

8. Songon dia do carana asa boi mangkatai taringot Bibel tu angka halak?

⁸ Tujuanta, i ma mangalului halak “na olo manjalo” barita na tapasahat. (Mat. 10:11) Asa denggan taulahon on, ingkon tasungkun do pandapot ni angka halak jala manat ma tatangihon pandapot ni nasida. Sahalak donganta baoa di Inggris manungkun pandapot ni halak taringot songon dia asa denggan parsaripeon, pagodang-godangkon ianakhon, manang songon dia molo adong na manusai hita. Dung ditangihon pandapot ni nasida, didok ibana ma, “Adong sada poda na disurat 2.000 taon naung salpu. Boha do menurutmu poda on?” Ndang pola didok ibana i na sian “Bibel”. Alai dipatudu do isi ni ayat naung diparade hian di HP-na.

ASA OLO ANGKA HALAK MANANGIHON

9. Songon dia do caranta marbarita tu halak na so olo mangkatai taringot Debata?

⁹ Molo ndang olo halak na tajumpangi i mangkatai taringot Debata, boi ma tahatai taringot angka naung ditanda nasida. Umpamana, godang do na lomo rohana mangida angka tompaan. Boi ma tadok songon on, “Ra diboto hamu do tingki dibahen ilmuwan sada benda, sasintongna angka na adong di humaliangta do na ditiru nasida. Boi do dibahen mikrofon ala diparsiajari nasida songon dia jolma boi marbinege. Dibahen kamera ala diparsiajari nasida songon dia jolma boi marnida. Menurut hamu, boasa boi adong na di humaliangta on? Na adong sandiri do i, manang adong na manompa?” Dung tabege pandapotna tadok ma, “Menurut hamu, sian ise do angka ilmuwan marsiajar? Adong sada puisi najolo mandok songon on, ‘[Ibana] do na mambahen pinggolta, lam Ibana ma ndang marbinege? Ibana do mambahen matanta, lam Ibana ma ndang marnida? . . . Ibana do mangajarhon sude parbinotoan, lam Ibana ma so marbinoto?’ Angka ilmuwan pe setuju do tu na didok dison.” (Ps. 94:9, 10, Bibel siganup ari) Boi do tapatudu video sian jw.org/bbc^® di seri “Pandapot taringot tu Mula ni Hangoluan”. (Ida di bagian NA DIAJARHON DI BIBEL > SAINS & BIBEL.) Manang boi do talehon brosur Benarkah Kehidupan Diciptakan? manang brosur Asal Mula Kehidupan—Lima Pertanyaan yang Patut Direnungkan.

10. Songon dia do hita mamungka pangkataion tu halak na so lomo rohana mangkatai taringot Debata?

¹⁰ Godangan halak mangkirim asa lam denggan parngoluonna. Alai godang do na mabiar molo gabe hancur portibi on manang ndang boi be diingani. Adong sahalak pengawas wilayah di Norwegia na mandok, molo halak disi ndang lomo rohana mangkatai taringot Debata. Alai jotjot do nasida mangkatai taringot angka na masa di portibi on. Dung marsitandaan, didok ibana do, “Menurut hamu, boha do annon ngolunta di ari na naeng ro? Boi do gabe lam denggan ngolunta dibahen angka pamarenta, ilmuwan, manang na asing?” Dung ditangihon ibana pandapotna, dijahahon manang dienet ma ayat taringot pangkirimon di ari na naeng ro. Adong do na las rohana mambege janji na sian Bibel taringot hangoluan salelenglelengna tu angka halak na tigor.​—Ps. 37:29; Pjm. 1:4.

11. Boasa ingkon marragam caranta mangkatai, jala songon na didok di Rom 1:14-16, songon dia do hita boi maniru si Paulus?

¹¹ Ala marasing-asing do ganup halak na tajumpangi, ingkon marragam do caranta mangkatai tu nasida. Aha na dihalomohon sasahalak ndang sarupa tu na dihalomohon halak na asing. Adong do na lomo rohana mangkatai taringot Debata manang taringot Bibel, alai na asing ndang olo pintor mangkatai taringot i. Alani i, ingkon marsitutu do hita mangkatai tu marragam halak. (Jaha Rom 1:14-16.) Taingot ma, Jahowa do na patubuhon hasintongan di roha ni sasahalak.​—1 Kor. 3:6, 7.

PABOAHON HASINTONGAN TU HALAK NA SO PORSEA TU DEBATA

12. Songon dia hita boi marbarita tu halak di negara Asia na so hea mamingkirhon taringot Debata?

¹² Di liat portibi on, godang do parbarita na pajumpang dohot halak na so porsea tu Debata. Dohot ma i angka halak sian negara na membatasi ulaon ni agama. Di piga-piga negara Asia, godang halak ndang hea mamingkirhon taringot Debata. Adong do sian nasida na lomo rohana mamparsiajari Bibel, alai adong do muse na so olo mamparsiajari ajaran na baru. Songon dia do caranta marbarita tu nasida? Piga-piga parbarita naung berpengalaman, paboahon cara na denggan marbarita tu nasida. Somalna, ndang pintor taringot Bibel na dihatai tu nasida. Alai dipatudu parbarita i do na lomo rohana mananda nasida. Dung i molo pas tingkina, dipaboa ma laba na boi didapot molo mangihuthon prinsip ni Bibel.

13. Songon dia do carana asa lomo roha ni halak mamboto taringot Bibel? (Ida gambar sampul.)

¹³ Godang do halak lomo rohana mambege poda sian Bibel. (Pjm. 7:12) Di New York, adong sahalak donganta borua na marbarita tu angka halak na marbahasa Mandarin. Didok ibana, “Hupatudu do na lomo rohangku mananda nasida jala hutangihon do nasida. Molo huboto sian negara na asing nasida, husungkun ma, ‘Las do rohamuna dison? Nunga dapot karejo hamu? Burju-burju do halak dison tu hamu?’” Sipata boi do on gabe cara na denggan laho paboahon taringot Bibel. Molo pas tingkina didok ibana do muse, “Menurutmu, aha do kuncina asa boi mardame dohot angka halak? Boi do hupatudu poda sian Bibel? Didok songon on, ‘Mula ni parsalisian suman do i tu tambok ni aek na marigat; padenggan ma i andorang so mapulha.’ Menurutmu, boi do poda on mangurupi hita asa mardame dohot na asing?” (Poda 17:14, Bibel siganup ari) Sian na tahatai, gabe taboto ma ise na lomo rohana tajumpangi muse.

14. Songon dia do sahalak donganta baoa di Asia Timur marbarita tu angka halak na so porsea tu Debata?

¹⁴ Alai boha do molo didok halak na tajumpangi i ndang porsea ibana tu Debata? Adong sahalak donganta baoa na jotjot marbarita tu angka halak na so maragama di Asia Timur. Didok ibana, “Somalna molo didok halak, ‘Ndang porsea ahu tu Debata,’ maksudna ndang porsea ibana tu angka debata na disomba godangan halak disi. Alani i hudok ma, setuju do ahu molo saonari godang debata na dibahen jolma jala ndang debata na sintong i. Jotjot do hujahahon Jeremia 16:20 na mandok, ‘Tung tarbahen jolma ma mambahen angka debata di ibana? So manang tutu angka debata nasida!’ Dung i husungkun ma, ‘Songon dia do asa taboto dia Debata na sintong?’ Hutangihon ma pandapotna, dung i hujahahon ma Jesaya 41:23, na mandok, ‘Paboa hamu ma [taringot] angka na ro muse, asa tung hutanda hami angka debata hamu tutu.’ Dung i, hupatudu ma contoh songon dia Jahowa paboahon na laho masa di ari na naeng ro jala tutu do i masa.”

15. Aha do muse na boi tatiru sian donganta baoa di Asia Timur?

¹⁵ Tingki manjumpangi muse, sahalak donganta baoa na asing di Asia Timur mandok, “Hupatudu ma sian Bibel taringot poda na denggan, angka surirang naung masa, dohot taringot hukum na mangatur alam semesta. Dung i hupaboa ma songon dia i sude patuduhon na adong do na manompa hita. Molo nunga dihaporseai nasida na tutu adong Debata, hupatudu ma sian Bibel taringot Jahowa.”

16. Hombar tu Heber 11:6, boasa parsiajar Bibel porlu marhaporseaon tu Debata dohot tu Bibel, jala songon dia hita boi mangurupi nasida?

¹⁶ Tingki taurupi angka halak na so maragama marsiajar Bibel, ingkon jotjot do tapatogu haporseaon ni nasida na tutu adong Debata. (Jaha Heber 11:6.) Jala ingkon taurupi do nasida asa porsea tu Bibel. Alani i, ingkon marulak-ulak do taajarhon taringot i. Tingki marsiajar Bibel, porlu do taulas angka bukti na patuduhon Bibel i Hata ni Debata. Dohot ma i taringot surirang di Bibel naung masa, jala sadalan do Bibel tu ilmu pengetahuan dohot sejarah. Manang boi do tapaboa angka poda na boi tapangke ganup ari.

17. Aha do pengaruhna molo tapatudu holong tu angka halak?

¹⁷ Taurupi ma sude halak asa gabe sisean ni Jesus, ndang soal maragama nasida manang na ndang. Carana, tapatudu ma holong tu nasida. (1 Kor. 13:1) Tingki mangajari nasida, tapatudu ma na holong do roha ni Debata tu hita jala lomo do rohana asa tahaholongi Ibana. Ganup taon, marribu halak na so maragama tardidi ala dihaholongi nasida Debata. Alani i, pos ma rohamuna, jala patudu ma holong tu sude halak. Tangihon jala antusi ma pangkilalaan ni nasida. Jala gabe sitiruon ma hamu asa olo nasida gabe sisean ni Jesus.