Diboto Hamu Do?
Di tingki ni Bibel, aha do tugas ni sahalak naposo haposan?
DI tingki ni Bibel, tugas ni naposo haposan i ma, mangurus angka na ringkot di jabu dohot mangurus arta ni sasahalak.
Tingki si Josep anak ni si Jakkob gabe hatoban di Mesir, hea do ibana gabe naposo haposan. Jala “dipasahat si Potipar ma sude na di ibana ramotan ni si Josep”. (1 Mus. 39:2-6, Bibel siganup ari) Dung i, tingki si Josep gabe parhuaso di Mesir, dipillit ibana do sahalak naposo haposan laho mangurus jabu dohot artana.—1 Mus. 44:4.
Di tingki ni Jesus, jotjot do sahalak nampuna tano tading di kota na asing na dao sian ladangna. Alani i, dipillit ibana ma sahalak naposo haposan laho mangurus manang mangawasi ulaon ni angka parkarejo di ladang i ganup ari.
Ise do na boi gabe naposo haposan? Sahalak panurat di abad na parjolo sian Rom na margoar si Columella patorangkon, molo sahalak hatoban na dipillit gabe naposo haposan, i ma “halak na marpengalaman jala ringgas karejo”. Jala ingkon diboto ibana do, denggan do manang na ndang diulahon angka parkarejo i ulaonna. Alai ndang boi lomo-lomona tu angka parkarejo i. Didok ibana muse, “Na rumingkot sian naposo haposan, i ma ndang didok rohana ibana na ummalo sian sude. Jala ingkon olo do ibana marsiajar angka na baru.”
Di Bibel, dipangke do contoh ni sahalak naposo haposan dohot ulaonna laho manggombarhon angka ulaon di huria Kristen. Umpamana, dijujui apostel Petrus do halak Kristen asa gabe naposo haposan na burju na mamangke bakat na sian Debata “laho mangkobasi na asing”.—1 Ptr. 4:10.
Hea do dipangke Jesus tudosan taringot naposo haposan na disurat di Lukas 16:1-8. Asing ni i, di surirang taringot tanda haroro ni Jesus gabe Raja, dipapos ibana do roha ni angka siseanna laho mangalantik “naposo haposan jala na marbisuk”. Tugas ni nasida na rumingkot, i ma paradehon angka na porlu laho patoguhon parale-aleon ni naposo ni Jahowa saleleng ari parpudi. (Mat. 24:45-47; Luk. 12:42) Tontu mandok mauliate do hita ala boi tadapot angka publikasi na diparade naposo haposan jala nunga tarsar di liat portibi on.