Parpunguan laho Marbarita na Manggohi na Tinujuna
1. Aha do na tinuju ni parpunguan laho marbarita na uli?
1 Di sada tingki, marpungu ma Jesus dohot pitupulu siseanna andorang so laho nasida marbarita. (Luk. 10:1-11) Dipatogu Jesus do roha nasida jala dipaingot ibana do na donganan ni ”Nampuna sisabion i,” do nasida i ma Jahowa. Dilehon Jesus do tudutudu na denggan tu nasida laho mangulahon parbaritaon i. Jala ”duadua” do disuru ibana nasida. Saonari, angka parpunguan laho marbarita sarupa do songon na dibahen Jesus—patoguhon, mambahen asa malo, jala asa taratur.
2. Sadia leleng do parpunguan laho marbarita na uli on dibahen?
2 Saleleng on parpunguan laho marbarita dibahen 10 sahat tu 15 minut. Dohot ma i mangalehon dongan marbarita, inganan parbaritaon jala martangiang. Alai, mulai bulan April, parpunguan laho marbarita dibahen gabe 5 sahat tu 7 minut. Alai molo dipatupa i dung sae parpunguan holan satongkin ma parpunguan laho marbarita on dibahen. Alana angka na ro nunga godang mandapot sipanganon partondion. Molo holan satongkin do parpunguan laho marbarita dibahen gabe umgodang ma tingki laho marbarita. Molo perintis manang penyiar nunga marbarita andorang so ro tu parpunguan laho marbarita, gabe tamba ma tingki nasida laho marbarita.
3. Songon dia do parpunguan laho marbarita diparade asa parohon laba tu angka penyiar?
3 Parpunguan laho marbarita ingkon denggan ma dipatupa asa boi angka penyiar mandapot laba. Di godang huria, molo parpunguan laho marbarita dibahen gabe pigapiga kelompok, on mambahen angka penyiar boi jonok tu inganan parpunguan laho marbarita dohot tu inganan marbarita. Penyiar boi taratur jala boi denggan diparateatehon pangaradoti di kelompok. Angka sintua boi do mamingkirhon songon dia na dumenggan tu ulaon parbaritaon di inganan nasida. Andorang so ditutup dope parpunguan on dohot tangiang, ingkon diboto ma tu dia do nasida laho marbarita, jala ise donganna marbarita.
4. Sasintongna, boasa parpunguan laho marbarita ingkon sarupa ringkotna tu angka parpunguanta na asing?
4 Dos do Ringkotna tu Parpunguan na Asing: Parpunguan laho marbarita on dipatupa asa sude na laho marbarita mandapot laba. Ala ndang sude na boi ro tu parpunguan laho marbarita on, ndang na gabe hurang ringkot parpunguan on sian parpunguan na asing di huria. Songon sude angka parpunguanta, parpunguan laho marbarita on pe na diparade Jahowa do asa hita sude boi masipajujuan tu haholongan dohot tu angka ulaon na denggan. (Heb. 10:24, 25) Alani i, ingkon denggan ma dihobasi pangaradoti asa parohon sangap tu Jahowa parpunguan i jala marlaba tu sude angka na ro. Molo denggan do on naeng diulahon, ingkon ro ma angka parbarita tu parpunguan on andorang so laho marbarita.
Parpunguan laho marbarita on, ndang na gabe hurang ringkot sian parpunguan na asing di huria
5. (a) Aha do na porlu aturon ni na manguluhon parpunguan laho marbarita? (b) Aha do na mambahen donganta borua gabe manguluhon parpunguan laho marbarita?
5 Siparrohahonon ni na Manguluhon: Molo dipangido hamu sasahalak laho manghobasi sitotonduron tu parpunguan laho marbarita, ingkon tibu ma dipaboa asa boi diparade dohot denggan. Unang ma dirimpu parpunguan laho marbarita on ndang porlu. Di kelompok parpunguan laho marbarita, na manguluhon dohot na mangurupi ingkon denggan ma manguluhon kelompok nasida. Alai di tingki huria i pungu laho marbarita, pangaradoti parbarita ingkon mangido sasahalak asa denggan manguluhon jala diparade dohot denggan. Ingkon dilehon pangaradoti parbarita ma jadwal tu na naeng manguluhon jala dilongkothon ma di papan pengumuman. Pangaradoti parbaritaon ingkon manat mamillit na laho manguluhon. Alana molo denggan na manguluhon parpunguan i mangajar dohot mangorhanisasi boi do gabe denggan parpunguan i. Molo ndang adong sintua, parhobas manang sahalak donganta baoa naung tardidi na boi manguluhon parpunguan, pangaradoti parbarita boi do mamillit sahalak donganta borua naung tardidi laho manguluhon.—Ida ma parisjaran ”Tingki Sahalak Donganta Borua Ingkon Manguluhon”.
6. Boasa ringkot di na manguluhon parpunguan laho marbarita asa denggan paradehon bagianna?
6 Tingki mandapot tugas di Parpunguan Singkola Panghobasion Teokratis, on ulaon na mansai ringkot. Ingkon denggan ma on tahobasi asa denggan tapasahat. Godang do na maimaima parpunguan on ganup minggu, dihobasi nasida do jala dipingkiri nasida aha na laho sipasahatonna. Tugas ni na manguluhon parpunguan laho marbarita ingkon sarupa ma ringkotna dohot Parpunguan Singkola Panghobasion Teokratis. Saonari, parpunguan laho marbarita dipasahat holan 5 sahat tu 7 minut, alani i ingkon denggan ma dihobasi asa sude boi mandapot laba jala ndang lewat tingki. Panghobasion na denggan dohot ma i mambagi inganan parbaritaon.
7. Angka aha do na boi diulas na manguluhon i tingki parpunguan laho marbarita?
7 Na laho Siulason: Ala angka luat marasingasing, naposo haposan ndang paradehon bahan na laho siulason tu ulaon parbaritaon. Pillit hamu ma bahan na di kotak di alaman 6 ”Na boi Siulason di Parpunguan laho Marbarita”, na pas tu luat i. Somalna, adong siulason di parpunguan on. Alai sipata adong sitotonduron naung dihobasi dohot denggan, manang mamangke video na pas sian jw.org. Di tingki manghobasi aha na laho dipatupa di parpunguan parbaritaon, na manguluhon ingkon denggan paradehon aha na boi patoguhon jala na boi mangurupi angka dongan na laho marbarita di ari i.
Tingki paradehon na laho diulas di parpunguan laho marbarita, na manguluhon ingkon manat mamingkirhon aha do na boi patoguhon jala mangurupi asa lam malo na laho marbarita di ari i
8. Aha do na rumingkot ulason ni na manguluhon parpunguan laho marbarita di ari Sabtu manang ari Minggu?
8 Somalna, angka penyiar mamangke majalah Joujou Paboahon dohot Sadarlah! tingki di ari Sabtu. Pigapiga na laho marbarita di ari Sabtu ndang dope marbarita di bagasan saminggu i, alani i olo nasida ndang marningot sitotonduron na dipatupa di borngin panombaon na sasaripe. Ala ni i marlaba do molo na manguluhon mangulangi muse presentasi sitiruon na adong di alaman parpudi Panghobasion Harajaonta. Boi dipillit mangulas barita, aha na masa di luat i, manang pasarhon majalah di ari libur, manang songon dia mambahen asa boi manjumpangi muse angka na manjalo majalahta. Molo adong di parpunguan i naung pasarhon majalah, boi ma dipangido na manguluhon asa dipaboa ibana isarana manang pengalamanna tingki pasarhon majalah i. Di ari minggu, dipillit na manguluhon ma aha do na pas laho disarhon di bulan i. Buku na boi diparsiajari, songon Barita na Uli, Tangihon ma Debata dohot Apa yang Sebenarnya Alkitab Ajarkan?, boi disarhon manang andigan pe. Na manguluhon boi ma mambahen songon dia isara na denggan laho pasarhon buku i.
9. Tingki adong kampanye, aha do na boi diulas di ari Sabtu?
9 Molo adong kampanye dibahen di ari Sabtu, boi ma dibahen na manguluhon asa majalah disarhon rap dohot gokhon manang risalah jala diulas ma i andorang so marbarita. Manang boi do mambege manang mangalehon pengalaman na denggan sian kampanye i.
10, 11. Asa boi denggan parpunguan laho marbarita i, boasa ringkot dihobasi angka penyiar andorang so lao?
10 Siparrohahonon ni Angka Penyiar: Penyiar pe boi mambahen parpunguan laho marbarita i denggan, dihobasi ma andorang so laho marbarita. On boi dibahen songon na diulahon di borngin panombaon na sasaripe. Aha na dihobasi nasida boi ma dipaboa tu angka dongan penyiar. Panghobasion na denggan i ma paradehon majalah dohot angka buku andorang so laho tu parpunguan laho marbarita, asa boi hatop borhat tu inganan parbaritaon.
11 Tapatibu ma ro tu parpunguan laho marbarita andorang so dipungka parpunguan i. Marusaha do hita asa sahat di tingkina tu sude parpunguan ni huria. Tarlumobi tu parpunguan marbarita na uli, on boi mangganggu molo tarlambat hita ro. Boasa? Dongan na manguluhon nunga mamingkirhon aha na hombar tu parpunguan i andorang so diorhanisasi ibana parpunguan i. Molo holan saotik na ro boi ma suruonna sude tu inganan na so sae dope dikarejoi. Molo adong na ro mardalan pat tu parpunguan laho marbarita, dipillit ma donganna na adong kareta manang motorna. Molo hurang aman do inganan parbaritaon i, na manguluhon porlu mangatur asa dong donganta baoa marbarita di inganan i. Molo adong penyiar na gale pardagingonna, tontu ndang boi marbarita tu jabu na martangga. Molo adong penyiar na baru, denggan molo didongani penyiar naung leleng. Alai, molo adong penyiar na tarlambat ro, olo gabe muba pangaturan naung dibahen. Godang do na mambahen hita boi tarlambat. Alai, molo gabe hasomalanta tarlambat, tasungkun ma dirinta, na humurang do pangargaionta tu parpunguan laho marbarita manang na hurang marbisuk do hita mangatur angka urusan na porlu.
12. Molo somal do hita mambahen pangaturan sandiri laho marbarita, aha do na porlu tapingkirhon?
12 Sada penyiar boi do mamillit ise na laho donganna laho marbarita andorang so dipungka marbarita na uli. Manang, boi dipillit na manguluhon i na laho donganna. Molo somal do hita mamillit donganta sandiri, boi do dohononta nunga ’mambungka roha’ asa unang holan sahalak donganta na jotjot marbarita? (2 Kor. 6:11-13) Boi do sasahali taatur asa marbarita na uli dohot sahalak na baru gabe penyiar asa boi taurupi nasida asa lam denggan laho mangajar? (1 Kor. 10:24; 1 Tim. 4:13, 15) Tangihon ma sude tudutudu na dilehon. Dohot ma i inganan na laho tatuju laho marbarita. Molo dung sae parpunguan laho marbarita unang be taganti pangaturan naung dibahen. Alai pintor borhat ma hita tu inganan naung ditontuhon.
13. Molo taradoti do bagianta be dohot denggan, songon dia do parpunguan laho marbarita boi parohon laba tu angka na ro?
13 Dung marbarita na uli , sisean ni Jesus na 70 halak i ”mardongan las ni roha do mulak.” (Luk. 10:17) Tutu ma parpunguan na binahen ni Jesus dohot angka siseanna andorang so lao marbarita na uli mambahen nasida marhasil. Saonari pe, parpunguan laho marbarita boi do parohon laba songon na dihilala sisean ni Jesus. Molo marsitutu sude laho mangulahon ulaonna be, parpunguan laho marbarita boi patoguhon partondion, mambahen asa malo, jala asa taratur mangulahon tujuanta i ma ”laho manghatindanghonsa tu saluhut bangso.”—Mat. 24:14.
Molo donganta borua na manguluhon parpunguan laho marbarita, ingkon dihungkupi do simajujungna jala rap hundul dohot na asing. Ingkon dos do na diulas ibana tu na diulas donganta baoa. Ndang boi ibana gabe mangajari na asing, alai boi do ibana mambahen siulason di punguan i. Molo dipangido ibana donganta borua na asing asa martangiang, donganta i pe ingkon manghungkupi simajujungna. Molo ro donganta baoa hape nunga dipungka parpunguan i, ingkon pintor dipasahat ma i tu donganta baoa i laho manguluhon. Ingkon parrohahonon ni Pangaradoti Parbaritaon molo masa situasi na so somal. Umpamana, sahalak donganta baoa na poso naung tardidi, ro tingki donganta borua manguluhon parpunguan laho marbarita. Alai, angka sintua mamparrohahon ndang tingkina dope tu donganta baoa na poso i laho manguluhon. Molo masa na songon on, boi do parjolo paboaon ni donganta na mangaradoti parbaritaon tu sude, naung disuru do donganta borua laho manguluhon. Alai, ingkon donganta baoa i ma na manutup dohot tangiang. Manang, olo ra adong disi donganta baoa na tardidi alai ibana mandapot sipasingot dope sian angka sintua, gabe ndang boi manguluhon tangiang dohot parpunguan. On ma gabe siala na mambahen donganta borua na manguluhon parpunguan laho marbarita. Ndang pola paboaon ni sintua i aha na mambahen donganta baoa i ndang boi manguluhon dohot martangiang di punguan i. Jala porlu paboaon ni sintua tu donganta baoa i andigan do donganta borua i laho manguluhon parpunguan i.