Pangke ma ”Hata Patujolo na Adong di Bibel”—Laho Mamungka Panghataion
1. Aha do isara na baru na boi tapangke laho marbarita?
1 Salinan naung dipaimbaru sian Terjemahan Dunia Baru di alaman na parjolo adong na boi tapangke songon sada isara na baru laho marbarita na uli di bagian na digoari ”Hata Patujolo sian Bibel.” Songon dia do hita boi mamangke hata patujolo on laho mangurupi hita marbarita na uli? Di hata patujolo on adong do marragam siulason taringot Bibel, jala dos do on tu buku Bertukar Pikiran, boi do on denggan dipangke laho mamungka panghataion.
2. Songon dia do hita mamangke ”Hata Patujolo na adong di Bibel” laho marbarita?
2 Pangke hamu ma sungkunsungkun di nomor 8 jala dok ma: ”Adong sipasahaton nami satongkin tu angka hombar jabu dison ala godang do halak na manungkun songon on, ’Debata do na mambahen parungkilon ni angka jolma?’ [Di pigapiga inganan, mansai denggan do molo tapatuduhon sungkunsungkun on tu parjabu.] Songon dia pandapot mu? [Tangihon ma aha alusna.] Bibel mangalehon alus na boi paposhon roha. ”Jaha jala ulas hamu ma sada manang piga ayat na disurat disi. Molo lomo roha ni parjabu i, patudu ma 20 sungkunsungkun na diparade di hata patujolo i jala pangido ma asa dipillit ibana na laho siulason tingki pajumpang muse. Manang boi do lehononmu sada buku na boi dipangke laho marsiajar na pas tu na dipillitna i.
3. Songon dia do hita mamangke ”Hata Patujolo na adong di Bibel” laho mamungka panghataion tu halak na so Karisten?
3 Sungkunsungkun di nomor 4 dohot 13-17 boi mangurupi hita tingki marbarita na uli tu halak na so Karisten. Umpamana boi ma tapangke sungkunsungkun nomor 17 huhut tadok: ”Ro hami satongkin laho pajumpang dohot angka keluarga dison. Tutu do didok rohamu molo angka keluarga saonari on mangadopi godang angka hasusaan? [Tangihon ma aha alusna.] Pigapiga keluarga mandapot laba sian hata sipaingot on: ”Alai dihabiari parompuan i ma baoana.” [ndang pola porlu paboaonmu hata on dienet sian Epesus 5:33. Molo manghatai hamu tu sahalak borua, enet hamu ma hata na tarsurat di Epesus 5:28.] Songon dia do pandapotmu asa boi marlaba hata on tu naung marsaripe?”
4. Aha do na laho boi bahenonmu di ujung ni panghataion dohot halak na so Karisten?
4 Di ujung ni panghataionmu bahen ma asa boi udutanmu muse panghataion i di ari na naeng ro. Ra boi pillitonmu muse sada sian sungkunsungkun na adong di hata patujolo ni Bibel i. Di tingki na pas paboa hamu ma tu parjabu i angka hata sipaingot naung diulas i dibuat sian Bibel. Mangihuthon tu panghataionmu dohot pandapot ni parjabu i taringot Bibel lehon ma sada buku na pas jahaon ni ibana.—Ida ma aha na didok di Panghobasion Harajaonta bulan Desember 2013.