Sipaingot tu Parpunguan Bolon
Tingki Ulaon: Pintu dibuka pukul 8.00. Saleleng tolu ari, musik parjolo diputar pukul 9.20. Satingki i, nunga ingkon di hundulanta hita asa boi denggan ulaon i dipungka. Ulaon i dipaujung hirahira pukul 17.00 di ari Jumat dohot Sabtu, Jala ari minggu hirahira pukul 16.00.
’Mangendehon pujipujian tu Jahowa’: Ruas ni Debata sian na jolo mamuji Jahowa marhita ende, jala musik tongtong gabe ruhut na ringkot dipanombaonta. (Ps. 28:7) Sude sesi parpunguan bolon sitolu ari dipungka dohot musik selingan. Musik on dang holan tabo begeon sambing, alai dipatupa asa boi hita marsiajar huhut marsomba tu Jahowa. Jadi, tingki ketua paboahon molo musik selingan laho diputar, i ma tingkina hundul jala hohom manangihon, sian na sai manghatahatai. Marhite i, hita patuduhon pangargaionta tu tingki dohot gogo ni angka donganta di punguan orkestra Menara Pengawal. Dua hali sataon, nasida mamangke ongkos sandiri ro tu Patterson, New York, laho patupahon musik na tabo laho begeonta. Sidung hita manangihon musik selingan, rap ma hita marende mamuji Jahowa marhite logu Harajaon.
Parkir: Di sude parkir na diatur ni donganta di inganan parpunguan bolon, jotjot parkir diatur mangihuthon hatop manang lelengna hita ro. Molo ndang siat sude parkir di inganan i, boi ma lao parkir di inganan na asing na jonok.
Papulikhon Hundulan: Ganup dibuka pintu ni gedung manogotna i, unang ma humarojor mangalului hundulan, songon na marlumba dohot dongan na asing na ro. Mardophon roha ma tu dongan na asing, patujolohon na ringkot tu dongan sahaporseaonta. Marsipajoloanan i do tanda ni halak Kristen situtu jala na mangonjar roha ni halak gabe mamuji Debata. (Joh. 13:34, 35; 1 Kor. 13:4, 5; 1 Ptr. 2:12) Hundulan boi dipapulik tu donganta samotor, sajabu, manang parsiajar Bibelta. Unang ma ta peakhon angka ugasanta di humaliang ni hundulanta, asa di boto donganta molo hundulan i kosong dope. Hundulan tu angka naung matua manang na gale di pardagingon adong do diparade. Marningot dang godang diparade hundulan tu sisongon i, holan sada manang dua halak ma na boi hundul mandongani nasida.
Marpahean na Tama: Pahean na tapangke saleleng di parpunguan bolon naeng ma pahean na tama, ndang mangihuthon tiruan ni pahean na hurang suman na di portibi on. (1 Tim. 2:9) Nang tingki check in dohot check out sian hotel manang tingki na asing tagan manang dunghon sae ulaon i, unang ma marpahean siincakan. Ala songon i, ndang gabe maila hita paboahon barita na uli manang mamangke kartu na tapangke na patandahon tingki di parpunguan bolon sitolu ari. Pahean dohot parniulaonta na denggan tingki ro tu parpunguan bolon, dang holan mambahen gabe lomo roha ni halak marsiajar Bibel na parohon haluaon alai, huhut do palashon roha ni Jahowa.—Sep. 3:17.
Silehonlehon na taronjar sian roha: Porlu ingotonta sude Parpunguan Bolon si Tolu Ari boi tarpatupa ala ni silehonlehonta. Molo denggan dirohahon, sude penyiar boi dohot mangurupi manggohi sigararon na hombar tu ulaon i, jala manghilala las ni roha ala rade mangalehon.—Ul. 20:35; 1 Kor. 16:1, 2; 2 Kor. 9:7.
Patuduhon ma Parange na Denggan Tingki Mamangke Alat Elektronik: Patuduhon na denggan do hita molo handphone manang alat elektronik na asing ndang gabe manggugai tu halak na asing. Molo mamangke kamera, mambahen video, tablet elektronik, manang alatalat na asing ingkon taparrohahon ma unang mangganggu manang mambahen holip halak na asing. Hita pe patuduhon na denggan do molo ndang sai marsms manang mambalos e-mail saleleng ulaon i.
Mangan Arian: Taboan ma bohal sipanganon tu arian, asa unang pola tatadinghon inganan parpunguan i laho manuhor sipanganon tingki jom mangaso arianna. Kotak manang rantang na gelleng inganan ni sipanganon na boi tapeakhon di toru ni hundulanta boi taboan. Alai ndang boi boanon tas na balga manang galas tu gedung inganan parpunguan bolon i.
Silehonlehon: Boi do patuduonta pangargaion tu parpunguan bolon naung di patupa marhite silehonlehon tu ulaon marbarita na di liat portibi on di parpunguan bolon i. Silehonlehon marhite cek ingkon ditujuhon tu ”Saksi-Saksi Yehuwa Indonesia”.
Ubat: Molo diporluhon hamu ubat resep, boan hamu ma sian jabu ndang adong diparade ubat sisongon i di parpunguan. Jarum suntik na dipangke tu na marsahit diabetes boi parohon parmaraan alani i, unang ma asal dibolongkon di inganan ni sampah di parpunguan manang di hotel.
Pasidinghon Parmaraan: Manat ma asa unang hona mara alani na tarsilandit manang tartuktuk. Godang na madabu alani sipatu, tarlumobi ala ni sipatu na martumit na timbo. Pillit ma sipatu na denggan pakeon asa boi mardalan tingki manganangkoki tangga manang lante na landit dohot sude na asing.
Hurang Parbinegean: Ulaon i boi dibege di parpunguan i marhite radio FM. Alani i, porlu boanon mu alat na boi manangkup siaran FM na marbatere dohot earphone laho manangihon sude tording ni ulaon i.
Kareta inganan ni Posoposo dohot Kursi Malas: Kareta inganan ni posoposo dohot kursi malas ndang boi diboan tu parpunguan bolon i. Alai, kursi ni posoposo na somal dipeakhon di motor, boi diboan jala di peakhon ma di lambung ni natuatuana.
Parfum: Godangan parpunguan bolon dipatupa di inganan na tartutup jala na mamangke AC manang kipas angin. Alani i, na tasarihon do donganta molo ndang malobihu mamangke parfum dohot minyak angin na mansai angur na boi mangganggu tu halak na marsahit asma manang na asing.—1 Kor. 10:24.
Formulir Silakan Tindak Lanjuti (S-43): Pangke ma formulir Silakan Tindak Lanjuti laho mangalehon hatorangan tu na olo manjalo barita na uli saleleng di parpunguan bolon i. Formulir naung disurat dilehon ma tu Bagian Informasi di parpunguan bolon i manang tu sekretaris ni huria dung mulak sian parpunguan i.
Restoran: Pasangap ma Jahowa marhite marparange na denggan tingki mangan di restoran. Marpahean na tama ma songon sahalak parbarita na uli. Lehon ma hepeng hamuliateon molo somal do di si songon i.
Siparateatehononhon: Panangko dohot pancopet mangalului halak na marpungu. Ndang denggan molo tatadinghon hepeng manang barang na arga di hundulanta. Kunci ma motor manang kareta jala unang tinggalhon barang na arga.
Hotel:
Unang ditonahon asa diparade kamar lobi sian na dihaporluhon jala godang ni halak di sada kamar unang lobi sian naung ditontuhon.
Unang sundati kamar naung ditonahon molo so alani na mansai ringkot jala hatop ma dipaboa tu parhotel i asa diboto mangatur muse tu halak na asing na mamorluhon. (Mat. 5:37) Molo ingkon do disundati kamar naung ditonahon, porlu taingot marasingasing do paraturan laho manundati di ganup hotel.
Molo hita mamangke kartu debit manang kartu kredit laho manggarar kamar hotel, nunga ulaon na somal molo parhotel i maniop deba hepeng sian rekeningta laho manggarar sewa ni kamar, dohot manggarar molo adong na sega saleleng tapangke kamar i. Alani i, ndang boi tapangke hepengta na ditiop nasida i saleleng so sidung sude paretonganna nang pe naung tatinggalhon hotel i pigapiga ari.
Buat ma troli bagasi holan di tingki porlu jala hatop dipaulak asa boi dipangke halak na asing.
Molo somal di inganan i mangalehon tip, lehon ma hepeng hamuliateon tu parkarejo ni hotel i tingki tasuru mangangkat barang manang koper jala tadingkon ma hepeng hamuliateon tu na paias kamar.
Unang mangalompa di hotel molo ndang dipaloas.
Unang asal dipambuat molo adong diparade parhotel sipanganon dohot siinumon na holan boi dipangan di hotel.
Patuduhon ma parbue ni tondi tingki mangadopi parkarejo ni hotel ganup tingki. Godang do disarihon nasida angka halak na ro alani i, las do roha nasida molo burju, sabar, jala tapatudu roha na marpangantusi.
Angka natuatua diparrohahon ma ianakhonna saleleng di hotel songon di lift, kolam renang, lobi, ruang olahraga, dohot angka na asing.
Arga ni sewa ni kamar na adong dibahen di Daftar Pemondokan yang Disarankan i ma arga ni sewa sadari. Molo dijalo lobi sian arga naung dibahen didaftar i hatop ma dipaboa tu Punguan na Mangaradoti Pemondokan di parpunguan bolon i.
Molo adong parsoalan taringot tu kamar ni hotel i, paboa ma tu Punguan na Mangaradoti Pemondokan asa boi diurupi nasida.
Na Mangurupi: Ise pe na rade laho mangurupi di paboa ma tu Punguan na Mangaradoti Angka Pangurupi di punguan bolon i. Angka dakdanak na umurna ditoru ni 16 taon boi dohot mangurupi alai ingkon diuluhon natuatuana manang halak naung tobang naung dipillit ni natuatuana.