Isara Mamangke Rekaman Audio
1. Asing ni manjaha buku, aha do isara na asing asa taboto godang barita di situs webta?
1 Godang do halak marlas ni roha mamangke jw.org/bbc laho manjaha publikasi na marisi hasintongan. (Pjm. 12:10) Alai hea do dipangke hamu rekaman audio? Marhite on, boi ma tangihononmuna godang barita na adong di situs web jw.org/bbc. Songon dia do rekaman audio marlaba tu hita?
2. Songon dia do rekaman audio boi marlaba tu parsiajaranta sandiri manang tu panombaon na sasaripe?
2 Tu Parsiajaranta Sandiri manang tu Panombaon na Sasaripe: Tangihon ma rekaman audio ni Bibel, majalah dohot publikasi na asing di pardalanan manang di ulaon siganup ari, asa denggan hamu mamangke tingki. (Eps. 5:15, 16) Boi ma marragam isara pangkeonmu di panombaon na sasaripe, songon rap manangihon rekaman audio huhut mangihuthon teks na adong di publikasi. Pangke ma rekaman audio tingki marsiajar sahalakmuna asa lam denggan panjahaion Bibelmuna. Manang pangke ma rekaman audio tingki hamu marsiajar sada bahasa.
3. Ise do halak na boi mandapot laba di ingananta sian rekaman audio?
3 Marlaba tingki marbarita: Adong do halak di ingananta na so sanga manjaha, alai rade do nasida manangihon rekaman audio. Olo do muse jumpangta halak na mangkatai di logat na asing manang adong do halak na lomo rohana manangihon barita na uli ”di hatana be”. (Ul. 2:6-8) Di pigapiga inganan, manangihon sada barita nunga gabe hasomalan. Umpamana, hasomalan ni halak Hmong. Somal do angka natuatua mangkatahatai laho paboahon na masa di ari naung salpu tu angka na poso. Jala ingot do angka na poso i tu barita na ditangihonna. Di godang inganan di Afrika, somal do halak marsiajar marhite manangihon aha na laho siparsiajaranna.
4. Aha do na boi tasungkun tu dirinta taringot mangurupi halak di ingananta?
4 Di ingananmuna adong do labana mamutar rekaman audio mamangke bahasa ni parjabu? Boi do sasahalak mandapot laba sian rekaman audio publikasi na takirim sian email? Tingki marbarita, rade do hita mangalehon buku dohot rekamanna naung tabahen tu sada CD? Sude publikasi na dibahen gabe buku elektronik, brosur, majalah dohot risalah boi do talehon tingki marbarita jala dohot do i taetong tu laporan dinas. Rekaman audio dipatupa asa tapangke tingki marsiajar sahalakta dohot tingki mangurupi halak mangantusi barita na uli.—1 Kor. 3:6.