Denggan ma Pangke Fitur na Adong di Buku Na Diajarhon Bibel
Huhut sahalak parsiajar Bibel marsiajar hasintongan jala mangulahon aha na diparsiajari, lam togu ma partondionna jala boi ma dipatudu parange na denggan. (Ps. 1:1-3) Denggan ma tapangke fitur na adong di buku Na Diajarhon Bibel asa lam denggan partondion ni parsiajar Bibelta.
Sungkunsungkun Pamungka: Ganup pasal dipungka dohot sungkunsungkun na laho dialusi di parsiajaran i. Boi do sungkunonmuna sungkunsungkun on tu parsiajar Bibelmuna asa lam lomo rohana mangihuthon parsiajaran i. Manang, boi do pangidoonmu alus na jempek sian nasida taringot sungkunsungkun i. Molo adong alusna na sala unang ma pintor paboa hamu molo alusna i sala. Alai, sian alusna i boi ma botoonmu aha na porlu dipadenggan nasida.—Poda 16:23; 18:13.
Apendiks: Molo parsiajar Bibelmuna nunga mangantusi aha na diparsiajari, jujui ma nasida asa mamparsiajari sandiri apendiks na hombar tu parsiajaran i. Alai di parsiajaran na mangihut, pangido ma asa dipatorang ibana taringot apendiks i. Alai, molo marlaba do apendiks i tu ibana boi do ulasonmu. Jaha ma paragraf na adong di apendiks i jala bahen ma sungkunsungkun naung diparademuna sandiri.
Kotak Siulason: Kotak siulason na adong di alaman parpudi sian ganup pasal, marisi alus ni sungkunsungkun pamungka. Pangke ma fitur on asa diboto hamu naung diantusi parsiajar Bibelmuna do manang ndang parsiajaran i. Patorang ma ganup hatorangan i, marhite manjaha jala mangulas ayat na disurat disi. Dung i, pangido ma tu parsiajar Bibelmuna asa dipangke ayat i patorangkon boasa hatorangan i sintong.—Ul. 17:2, 3.