Parsiajaran na Denggan sian Panurirang—Habakuk
1. Boasa dos pangkilalaanta songon si Habakuk?
1 Di liat portibi on, taadopi do godang hajahaton. Ra, dos do pangkilalaanta songon si Habakuk na mandok tu Jahowa, ”Boasa tung pataridahononmu tu ahu hageduhon, jala marsombusombu ho paidaida hangaluton?” (Hab. 1:3; 2 Tim. 3:1, 13) Molo tarimangi hata ni si Habakuk dohot haporseaonna, margogo ma hita mangadopi ari rimas ni Jahowa.—2 Ptr. 3:7.
2. Songon dia do hita patuduhon na marsihohot saonari?
2 Marsihohot: Nang pe diadopi si Habakuk hasusaan, alai tongtong do togu haporseaonna jala marhiras ni roha marbarita. (Hab. 2:1) Dipapos Jahowa do roha ni si Habakuk na laho gohanNa do sude hataNa di tingki na pas, jala ”halak partigor i mangolu do binahen ni parsihohotna marhaporseaon”. (Hab. 2:2-4) Aha do lapatan ni on tu halak Kristen na mangolu di tingki parpudi? Adong do na rumingkot sian mamboto andigan ro ari rimas ni Debata, i ma marpos ni roha molo ari i na laho pasautonNa do. Haporseaon mambahen togu partondionta jala sai manjumolohon ulaon marbarita.—Heb. 10:38, 39.
3. Boasa ingkon tongtong marlas ni roha hita manomba Jahowa?
3 Marlas ni roha: Tingki Gog sian Magog mangaroro naposo ni Jahowa, diuji ma haporseaonta. (Hes. 38:2, 10-12) On parohon hasusaan tu sude halak, songon i nang naposo ni Debata. Masa ma haraparon dohot haleon. Mago ma angka arta jala lam marsingkor ma parngoluon. Songon dia do hita mangadopi ari hasusaan on? Nang pe si Habakuk mangadopi hasusaan, alai tongtong do ibana marlas ni roha manomba Jahowa. (Hab. 3:16-19) Alani i, ”las ni roha mida Jahowa” mangurupi hita margogo mangadopi hasusaan di ari na naeng ro.—Neh. 8:10; Heb. 12:2.
4. Aha do na taulahon saonari dohot di ari na naeng ro?
4 Halak na marsihohot tu Jahowa na malua sian ari rimasNa, tongtong marsiajar taringot Jahowa. (Hab. 2:14) Halak na dipahehe pe, diajari do taringot Jahowa. Alani i, tapangke ma saonari sude tingki laho marbarita, taringot hadirion dohot ulaon ni Jahowa!—Ps. 34:1; 71:17.