“Marsonangsonang ma hita bahenon ni Jahowa, jala gabe ma angka na taula di tanonta.”—PSALMEN 85:12, Bibel siganup ari

Dapot Pahala Salelengna sian Sitoppa Hita

Marjanji do Debata tu nabi Ibrahim. Sian pinopparna ma dapot pahala “saluhut bangso ni tano on”. (1 Musa 22:18) Ise do pinopparna i?

Nabi Isa ma pinoppar ni nabi Ibrahim. Hira-hira 2.000 taon na salpu, dilean Debata ma huaso tu nabi Isa lao mambahen mukjizat. On ma buktina molo nabi Isa pinoppar ni nabi Ibrahim na dijanjihon Debata.—Galatia 3:14.

Sian on taboto ma, nabi Isa do na dipillit Debata lao mangalean pahala tu sude jolma. Jala taboto ma boha cara ni Debata lao mangalean pahala tu hita haduan. Asing ni i, gabe tatanda ma nabi Isa sian mukjizat na dibahen ibana. Songon dia do parangena?

Lambok—Dipamalum nabi Isa na marsahit.

Hea do dipamalum nabi Isa na marsahit kusta. Dijama nabi Isa ma ibana jala didok ma, “Na olo do ahu!” Pittor malum ma ibana.—Markus 1:40-42.

Burju—Dilean nabi Isa mangan na male.

Asi do roha ni nabi Isa mangida halak na male. Dibahen ibana do mukjizat sian saotik roti dohot dekke gabe godang, lao mangalean mangan marribu halak. (Mateus 14:17-21; 15:32-38) Butong do sude na mangan i jala godang dope lobina.

Parasi Roha—Dipahehe nabi Isa halak na mate.

Alani ‘asi ni rohana’, dipahehe nabi Isa do anak sasada ni ina na mabalu.—Lukas 7:12-15.

PAHALA NA SALELENGNA DI TANO ON

Songon mukjizat naung hea dibahen nabi Isa di portibi on, satokkin nai songon i ma muse bahenonna haduan ala dilean Debata huaso tu ibana. Gabe taboto ma, sian akka mukjizat na hea dibahen nabi Isa i patuduhon boi do Debata mangalean pahala tu sude jolma.

Hangoluan na songon dia do na tahilala haduan molo saut janji ni Debata tu nabi Ibrahim? “Tongtong do sonang maringanan di tano i, jala dapotan angka las ni roha” halak na makkaholongi jala mangargai Debata. (Psalmen 37:11, Bibel siganup ari) “Ndang adong be hamatean nang arsak ni roha; nang angguhangguk, nang na hansit, ndang disi be.”—Pangungkapon 21:4.

Gok hadameon nama tokkin nai portibi on. Bayakkon ma boi hamu mangolu salelengna di portibi on. Alai godang nai dope pahala na lao leanon ni Debata. Ida hamu ma hatorangan tambahan di www.jw.org/bbc.